حوار: ريم جميل
مافيش حاجه علا رشدي مابتعرفش تعملها. تمثيل، ستاند أب كوميدي، إنتاج، فلوجينج، أغاني كله موجود (نمسك الخشب). الأمومه حاجة مهمة فى حياة علا رشدي مش بس فى البيت لكن كمان على السوشيال ميديا. قررنا نقعد ندردش معاها على الجواز، الأطفال، السينما وأكيد الانترنت.
إيه الجديد فى حياتك خلال الفترة اللى فاتت ؟
خلال السبع سنين اللى فاتوا حاجات كتير إتغيرت ،زى انى خلفت طفلين واتجوزت، وطبيعى يبقى فى نضوج لإن الجواز بينضج اى حد والخلفة كمان بتخلى المسؤولية اكبر، ويمكن الشغل اتأثر وده علشان أوصل لحتة معينة فى الحياة العائلية والشخصية، لكن برضه علشان اوصل لحتة معينة فى الشغل كان لازم شخصيتى تنضج، وده هيفدنى انى لما ارجع اشتغل دلوقتى ابقى فى حتة تانية، انا دلوقتى جاهزة اكتر بكتير عن ما كنت من ٧ سنين ، عندى حماس مختلف وبفكر بطريقة تانية .
الأطفال بتعمل ايه فى الجواز ؟
الجواز لوحده المفروض الواحد يقعد يشتغل عليه، الست قبل ما تخلف لازم تشتغل شوية على الجواز ولازم هى وجوزها يفهموا بعض كويس وبعدين يفكروا يجيبوا شخص تالت، المفروض نتجوز علشان تتجوز ونخلف لما نكون جاهزين اننا نخلف .
فى ناس متخيلة ان الاطفال هما اللى واخدينك علشان كده مش فاضية للسينما ؟
انا كنت بصوّر وبنتى معايا فى التصوير، وفى ناس افتكرت انى علشان عملت “وجهة مظر” ودى حاجة ليها علاقة بالامومة ، انى خلاص مش عاوزة اشتغل او مش عاوزة امثل! دايما اللى عنده موهبة فى اى مجال مبيبقاش قادر يبطل ، الموضوع مالوش علاقة بالعيال ، بس كل حاجة ليها وقت، وانا شايفة ان ربنا عمل كده علشان يدينى فرصة اقعد مع ولادى وهما صغيرين.
إيه رأيك فى فكرة ان الملل بياخذ وضعه بعد ٧سنين جواز ؟
فى جميع المراحل الملل بيبقى موجود، ويمكن علشان إحنا عارفين ان فى حاجة اسمها ملل بعد سبع سنين بنبقى مستنينها، ويمكن عملوها كده علشان كل سبع سنين البنى آدم بيتغير، بصراحة السبع سنين مش بس ملل، هو انتوا الاتنين بتتغيروا فيبتتغيروا وتكملوا يا بتتغيروا وتفترقوا .
ليه الأم المثالية عندنا فى مصر لازم تبقى متبهدلة؟
الأم المثالية عندنا فعلا هى اللى بتعمل كل حاجة وشايلة البيت وبتشتغل وبتصرف، احنا دايما فى مصر بنيجى على الست وبنيجى على الأم، والراجل بيتعود على كده علشان احنا بنديهم فرصة لده وكمان امهاتهم علمتهم كده.
إزاى عرفتى تكونى مسؤوله بعد الجواز؟
انا على طول بحب اكون مسؤولة، مينفعش يكون فى حاجة لازم تتعمل ومتتعملش، ابنى مينفعش يكون شاطر فى الرسم وموادهوش ياخد دروس رسم، مش عايزة اسيبلهم حاجة كان ممكن يطورا نفسهم فيها ومعملهاش، مش معنى ده انهم يتدلعوا، لكن لازم نوجهم، مين هيوجهم لو مكناش احنا نوجهم.
إنتى شايفة المشهد إزاى دلوقتى فى السينما ؟
للأسف لحد دلوقتى الإختيارات بتكون على أساس مين عمل إيه قبل كده، بمعنى انى مش هاخاطر انى اجرب حد جديد ممكن يكون حتى هيعمل الدور جامد جدا، بقت العملية ١٠ ممثلين كل واحد متخصص فى حاجة، مع ان الممثلين دول اكيد برضه نفسهم يمثلوا حاجات تانية، انا بدأت كوميدى ولحد دلوقتى كوميدى، انا شايفة ان الحظ بيلعب دور كبير جدا فى الشغلانة بتاعتنا دى، ومش دايما الموهبة بتكون أول حاجة بينقوا على اساسها، انا قعدت فترة أعمل كوميدى حاجات انا مش عاوزه اعملها.كل حاجة ليها وقت، وانا بجهز نفسى علشان لما الدور اللى عوزاه ييجى اكون جاهزه.
مش شايفة ان الأدوار الكوميدى بالنسبة للستات اتطورت عن زمان ؟
مفيش أدوار ستات كوميدى مختلفة، دايما عايزينك بس تطلعى تقولى افيهات، اى حد دمة خفيف بنى ادم ولازم يكون عنده جوانب تانيه، الفكرة انك تعرفى تعملى تنوع فى الادوار، مش بس تضحكى .
قد ايه كان صعب انك تبقى ممثلة وبعدين تروحى اون لاين ؟ مكنتيش خايفة ده يأثر عليكى كممثلة ؟
انا كنت خايفة جدا وانا بطلع “وجهة مظر” بس مكنش ينفع مطلعهاش، وفى نفس الوقت حد جوايا بيقولى انتى مجنونة، وطبعا كنت خايفة يأثر على التمثيل بس كنت عارفة انه حاجة جديدة فى مصر متعملتش، وده الجانب الإيجابى للموضوع .
هل بتشاركى انتى وجوزك فى اختيارات بعض بإعتبار انك انتى وجوزك فى نفس المهنه؟
انا وهو مبندخلش فى اختيارات بعض نهائى.
