ترجمة: تسنيم عبدالله
لفّي حجابك، واستعدي للصيف باستايلات أنيقة ومختلفة
أغلبنا ما بنصدق إن الشتا يخلص، علشان نشيل الجاكتتات والبلوفرات الشتوي، ونلبس لبس خفيف، ألوانه مبهجة ،يقلل من حرارة الصيف. لكن بالنسبة للبنات المحجبات الصيف مش بيبقى إنهم يشيلوا اللبس الشتوي وبس، إلى جانب ده بيكون فيه تحضريات وتجهيز لبس يساعدهم يتعاملوا مع الحر والشمس، وفي نفس الوقت يكون شكله حلو وأنيق؛ في بنات مُحجبات كتير بيواجهوا صعوبة كبيرة في إنهم يلاقوا اللي بيدوروا عليه. علشان كدة حبينا نقدم لكم بعض الاستايلات الصيفية، الأنيقة، والعصرية، اللي عينيا وقعت عليها علشان تكون مصدر إلهام ليكوا.
جديد، عصري، ومبهج
اللبس الفضفاض، أو الـModest له مستويات مختلفة، كتير مننا بيحس إنه مرتاح أكتر في الاستايل ده من اللبس، بس دايماً بنلاقي إن الخيارات المتاحة فيه مش ماشية مع الموضة ومش أنيقة كفاية. إيمان، الـblogger المغربية أثبتتلنا إن في خيارات شيك جداً، وبسيطة، ومن غير تكلف،. غير لبس العبايات أو الجيبات الواسعة. اختيار نوع القماش، ولون الموف الفاتح هنا، بيخلينا نحس بإحساسها بالإنتعاش، والاستعداد للصيف. وعجبنا كمان اختيار لون الطرحة، لإنه لايق، ومناسب جداً لـ اللون البنفسجي الفاتح. وعلشان تكمّل أناقة الطقم أضافة له كوتشي أبيض، ونضارة شمس ألوانها متناسقة جداً، وبتزوّد من شياكة الطقم.
أنيق، مريح، ومناسب للحوامل
لكل الستات الحوامل المحجبات، اللي حابيين يلبسوا في فترة الحمل لبس أنيق، ومريح في نفس الوقت؛ استوحينا اللوك من الـ blogger الكويتية الأمريكية آسيا الفرج، اللي قدرت تتألق في فترة حملها، وتخلق استايل خاص بيها في غاية الأناقة، وفي نفس الوقت مريح. آسيا اختارت تلبس الفساتين الطويلة بألوان فاتحة، وخفيفة، وأضافت عليها “كارديجان” طويل ممن نفس اللون الزهري الفاتح. كوني حريصة إن ألوان القطعتين تكون متناسقة مع بعضها، وكمان لون الturban يكون لايق على ألوان الطقم. وكمان خلي إختيارك للألوان يكون فيه إيحاء للي حواليكي بنوع المولود ولد أو بنت.
جريء، راقي، وخفيف
اللون الإسود مفيش غنى عنه حتى في الصيف. بس أوقات مابنعرفش نوظف وجوده في لبسنا صح. لكن الـblogger الفلسطينية أميّة زين قدرت تحل المعادلة دي، وتدخل اللون الإسود في لبسها بشكل يضيف أناقة، ورقيّ لاستايلها. حبينا جداً اختيارها للكارديجان وألوان نقشات الورد الفاتحة المبهجة، اللي تناسبت بشكل مثالي مع القطع السوداء تحتها.
مختلف، غير تقليدي، وجذّاب
بتعتبري نفسك كيوت؟ عايزة تظهري ده في لبسك ومظهرك؟ ممكن تبقي بتضحكي وإنتي بتقرأي الكلام ده، بس الحقيقة إن مفيش حاجة تكسف في كدة! لو الـblogger الإنجليزية المصرية دينا طوكيو بتقدر تعمل كدة بكل ثقة، يبقى أكيد إنتي كمان تقدري! حبينا التيشيرت الأبيض، لإنه أنيق وجذاب في نفس الوقت. البوي فريند جينز بيدي للطقم روح عصرية ومرحة، لكن أكتر حاجة لفتت نظرنا وأُغرمنا بيها هي ألوان ونقشات ال turban، اللي لايقة جداً مع ألوان الطقم، وبتضيف لأناقته وجاذبيته. الاستايل ده مش بس بيظهر بساطتها وبيخليها مرتاحة لشكلها وجسمها، وبيجذب عيون الناس؛ لكن كمان مختلف، ومش تقليدي! ودي دايماً حاجة جميلة.
كاجول، متناسق، وشيك
لو بتحبي الاستايل الكاجول، بس دايماً بتلاقي صعوبة في إنك تلبقي لبسك على بعضه، الـblogger الإمارتيه سهى بتورينا إزاي بتقدر تعمل استايل كاجول وأنيق في نفس الوقت. مين كان ممكن يفكر إن الoveralls يكون شكلها حلو مع الحجاب، لكن سهى قدرت توظفها بطريقة مثالية، وتخلي شكلها حلو جداً؛ وكمان التيشيرت الأبيض تحتها، والكوتشي الرياضي الأبيض أضافوا لايقين جداً مع اللوك.
كتبت: سهيلة الشيخ