إزاي تسافر برا لوحدك بتكلفة قليلة وتروح أماكن تحفة!

أنا موظفة عادية جدًا وباخد مرتب عادي جدًا يا دوب بيكفيني لحد آخر الشهر زي حال كل المصريين تقريبًا. لا أمتلك أي عقارات ساحلية وعشان كدة كان بقالي 10 سنين بعمل جمعية عشان أطلع أصيف في الساحل… آه والله زمبؤلك كدة.. جمعية عشان أصيف 5 أيام وأقصى طموحاتي يكونوا أسبوع كامل! السنة دي بقى قررت بدل ما أروح الساحل أصرف اللي ورايا واللي قدامي.. أسافر برة مصر.. واكتشفت إن تكلفة السفر برا مصر لمدة أسبوعين هي هي نفس الفلوس اللي بتتصرف في أسبوع واحد بس في الساحل. طبعًا أنا بتكلم على السفر برة مصر بتكلفة منخفضة يعني نيجي على نفسنا شوية ونتنازل عن حاجات كتير.

قررت أسافر كرواتيا. عشان الفيزا بتاعتها سهلة (مش تشنجن) ومواعيد التأشيرة متاحة وتذاكر الطيران سعرها معقول جدًا

أنا طبعًا حجزت أرخص طيارة وعملت ترانزيت 11 ساعة وأنا رايحة. مع إن الطيران نفسه ما كملش 4-5 ساعات. جهزت كل ورقي وأخدت المعاد وروحت مكتب التأشيرات وأخدوا الورق وكله زي الفل والباسبور جالي بعدها بأسبوعين بالظبط!

ياللا بقى أقولكم عملت إيه وروحت فين وأديكم شوية نصايح كدة ممكن تساعدكم وتشجعكم.

الشنط

سافروا بشنطة صغيرة تاخدوها معاكم على الطيارة.. والله ما حد هيعد عليكم لبستوا كام طقم.. إغسلوا هدومكم هناك عادي.

أحلى حاجة في السفر إنكم ما تبقوش شايلين هم الشنط اللي انتوا مضطرين تجرجروها وراكم من مدينة لمدينة.

البرنامج

قبل ما تسافروا اعملوا برنامج السفر بتاعكم وذاكروا البلد كويس والمدن اللي انتوا هتزوروها.

أنا كنت محتفظة بكل الطرق من وأنا هنا في مصر.

كنت بدخل على google maps وأشوف إزاي هوصل من مكان لمكان وأعمل screenshot وأحتفظ بالصورة على الموبايل عشان حتى لو باقة الإنترنت خلصت يكون معايا خريطة الطريق.

البحث قبل ما تسافروا

اقروا كويس أوي واعملوا بحث مستوفي عن البلد وما تعتمدوش على بوستات إنستجرام أو فيسبوك، إقروا travel blogs كتيرة واستفيدوا من خبرات الناس اللي بتسافر كتير.

ممكن كمان تتفرجوا على فيديوهات بتاعت المسافرين على يوتيوب عشان تشوفوا البلد بعين حقيقية مش بس الفيديوهات الدعائية.

الإقامة

أنا عشان كنت مسافرة بميزانية قليلة، حجزت كل الإقامات في هوستيل – اللي هي بتكون غرفة مشتركة فيها كذا سرير. أهم حاجة تقروا الـreviews كويس. فيه كذا تطبيق ممكن تشوفوا من عليه الهوستيل المناسب ليكم، منهم تطبيق إسمه Hostelworld.

باقة الإنترنت

إشتروا e-sim قبل ما تسافروا. دة بيكون شريحة إفتراضية (virtual).. هتنزلوا تطبيق Airalo أو Mobimatter وتشتروا رقم دولي حسب المنطقة اللي انتوا رايحنها والرقم دة هيديكم باقة إنترنت وكمان تقدروا تتكلموا منه داخل المنطقة مكالمات محلية.

العملة

كرواتيا العملة المحلية بتاعتها إسمها كونا Kuna. 1 Kuna = 0.13 USD. عملتهم رخيصة والبلد نفسها مش غالية خالص.

الأكل

أنا كنت بنزل كل يوم الصبح أروح السوبر ماركت وأطلب شرحتين جبنة (من البقالة) ورغيف عيش باجيت وثمرة أو اتنين فاكهة.

في نص اليوم كنت باكل فاكهة أو أي حاجة خفيفة وبالليل كنت بتعشى.. السي فوود هناك تحفة!

المواصلات داخل المدينة

هناك لما تشغلوا google maps وتعملوها على transportation mode التطبيق هيقول لكم هتمشوا أد إيه وهتركبوا مواصلات إيه. مافيش أسهل من كدة صدقوني.

السفر من مدينة لمدينة

كنت بحجز قبلها بيوم أو يومين الباص اللي هسافر بيه من مدينة لمدينة. ممكن تشتروا تذاكر الباص من المحطة نفسها أو تنزلوا تطبيق FlixBus على الموبايل وتشتروا من عليه التذاكر.

التكلفة اليومية

50 دولار أمريكي في اليوم هيكفوا مواصلات وأكل وكمان مزارات سياحية.

الأنشطة

المدن الساحلية في كرواتيا أكتر من رائعة وهناك ممكن تعملوا نشاطات كتير جدًا… حاولوا ما تركبوش مواصلات كتير واستمتعوا بالمشي.. أنا كنت بمشي من 17 لـ 20 كيلو في اليوم الواحد. أهم حاجة تاخدوا معاكم جزمة بحر عشان الشواطئ هناك مش رملة.

المدن اللي زرتها

زغرب (يوم وليلة عند والوصل – ومن زغرب بدأت الرحلة الساحلية: زادار (3 أيام ليلتين) – سبليت (4 أيام 3 ليالي) – جزيرة هفار (رحلة يومية بالعبارة من سبليت) – جزيرة براش (رحلة يومية بالعبارة من سبليت)– دبروفنيك (4 أيام 3 ليالي) – زغرب (يومين وليلتين بعد ماخلصت الرحلة الساحلية).

لكل عشاق مسلسل Game of Thrones، المسلسل اتصور في دوبروفنيك وتقدروا تروحوا كل الأماكن اللي اتصور فيها المسلسل وتشوفوا كل الأماكن اللي اتصورت فيها المشاهد اللي أثرت فينا كلنا.

مش المثل بيقول للسفر سبع فوايد.. أنا بقى بقول السفر فوايده ما تتعدش!

سافروا كتير وسافروا لوحدكم، اكسروا حاجز الخوف.. لما تسافروا لوحدكم هتعيدوا اكتشاف نفسكم

هيكون عندكم فرصة أكبر تتعرفوا على ناس جديدة، هتعملوا مغامرات ماكنتوش تتخيلوها.

ما تخلوش حاجة توقفكم وماتخلوش حاجة تخوفكم. سافروا لوحدكم هتعرفوا قيمة نفسكم أكتر وهتتعرفوا على حاجات كتير جديدة في شخصيتكم. هيكون عندكم وقت تقيموا فيه حاجات كتير في حياتكم ولما ترجعوا من السفر هتحسوا إنكم جددتم طاقة الحياة.

هي جمعية كل شهر. تحوشوا بيها للسفر. قوموا يلا افتحوا google maps وحطوا عينكم على البلد اللي انتوا عايزين تزوروها وابدأوا خططوا من دلوقتي.