الحفاظ على العلاقات مش حاجة سهلة، والخناقات ما بين الأزواج عادية وكمان ممكن تكون صحية لأن مافيش علاقة مابتعديش
بظروف صعبة، لكن اللي يقلق هو ان العلاقة تبقى سامة، العلاقات السامة بتخلق أشخاص سامة على المدى الطويل، دي معلومات ممكن تساعدك تعرفي اذا كانت العلاقة اللي انتي فيها سامة.
قلة الإحترام
الإحترام المتبادل مهم لنجاح اي علاقة، فقدانكم لاحترامكم لبعض من اسوأ المراحل اللي ممكن توصلوا لها في علاقتكم، مهما حاولتم تصليح ده عمركم ما هتقدروا ترجعوا تشوفوا بعض زي الأول.
كسر الثقة
الثقة احد احجار الأساس لأي علاقة، لما بنكسر ثقة حد بنكسر نظرتهم لنا وللعلاقة كلها، من غير الثقة حتى لو فضلتي في العلاقة دي فهي مش هتتقدم ابداً.
التعاسة
لما العلاقة تبدأ تخليكي تعيسة بدل ما تسعدك يبقى في حاجة غلط، العلاقات اللي فيها حب بتسعد الناس اللي فيها، مهما كان يومك وحش كون انك عارف ان في حد مستعد يسعدك ده مهم جداً، لو اللحظات التعيسة اكتر من اللحظات اللي فيها فرح يبقى انتي بتضيعي حياتك.
الغيرة الشديدة
الغيرة الشديدة بتؤدي لسلوك مدمر في العلاقة، ازاي ممكن لعلاقة ان تستمر لما طرف واحد بيكون مسيطر على التاني في قراراته وافعاله؟ لما تكوني مش قادرة تعبري عن نفسك عشان مايحصلش مشاكل في العلاقة دي علامة واضحة انك مش هتتقدمي في العلاقة دي.
دعم غير كافي
لو شريكك مش اكبر داعم ليكي يبقى مايستاهلش حبك، لما تحسي انك دايما لوحدك يبقى النهاية واحدة، هتبدأي تتجنبي تتكلمي عن احلامك واحتياجاتك ومشاكلك عشان انتي عارفة انه هيتجاهلك او هيقول انك زنانة او هيديكي وعود فارغة.
بيحملك اللوم
في ناس بتقدر تتلاعب باللي قدامهم بأنهم دايما يلوموهم، انك تتحملي اللوم على كل الغلطات اللي حصلت في العلاقة ده هيستنزفك، لما تحسي ان لازم تفكري مليون مرة في كل حاجة عشان خايفة انك تزعلي شريكك يبقى دي علامة أن العلاقة سامة.
قلة التقدير للذات والثقة في النفس
أن شريكك يحسسك انك مالكيش قيمة فده من اوحش الحاجات اللي ممكن تحصل منه في العلاقة، الشريك اللي دايماً بينتقدك ويحرجك ويكسر ثقتك في نفسك شريك سام.
فقدانك لروحك
من اكبر الغلطات اللي الناس بتعملها في العلاقات انهم يتغيروا ويبقوا اشخاص تانيين عشان حد، لو مش قادرة تبقي نفسك قدام شريك يبقى اكيد في مشكلة، انك تفقدي نفسك وتستغني عن احلامك وشغفك وتسيبي كل حاجة بتخليكي “انتي” دي كلها علامات ان العلاقة هتبقى سامة اكتر.
بيطلع اسوأ ما فيكي
لما تفضلي تدي حب ودعم وتنازلات لفترة طويلة، بتوصلي لمرحلة بتبقي مش عايزة تدّي خلاص، ماعندكيش الطاقة او مش شايفة الفايدة انك تدّي مادام ماحدش بيقدر، انتي مدينة لنفسك بإنك تسيبي الشخص ده، مش ممكن حاجة ايجابية تطلع من شراكة مليانة طاقة سلبية كدة.
لو بتتعرضي للإساءة
سواء اساءة عاطفية او لفظية او جسدية، كل دي علامات خطر انك لازم تمشي، لو حاسة انك خايفة من شريكك او انك مش في أمان يبقى انتي مش المفروض تبقي مع الشخص ده، دايماً افتكري ان لو شخص عمل الحاجة اكتر من مرة يبقى هو بيعمل كدة باختياره ودي مش غلطة، لو شريكك بيختار انه دايماً يعرضك لأي نوع من الإساءة سيبيه لأن مافيش علاقة سامة اكتر من كدة.
معظمنا دايما بنتمسك على قد ما نقدر، في مننا كمان بيبقوا شايفين ان مافيش مجال للهروب، حتى لو كنا تعساء مابنقدرش نمشي، الحقيقة ان لما العلاقة بتكون سامة، من الاحسن لنا اننا نمشي، اننا نفهم اننا فعلا في علاقة سامة هو اول خطوة تجاه انقاذ نفسنا.
بعد ما حصلت على بكالوريوس وماجيستير في العلوم السياسية، بدأ حب رنا للكتابة في الظهور، الحياة علمتها ان مافيش حاجة اقوى من الكلمات، لما بقت ام اولوياتها اتغيرت ومدونتها بقت المكان اللي فيه بتسيب كل حاجة وبتخلي عقلها وقلبها يقولوا اللي هم عايزينه. انستجرام: @ranagawishsays
