فيه أفكار إستهلاكية موجودة من زمان في حياتنا وجزء من عاداتنا وتقاليدنا، زي مثلاً جهاز العروسة اللي لازم كله يكون جديد، أو إننا نشتري هدوم كتير إحنا مش محتاجنها عشان ماينفعش نكرر اللبس وحاجات تانية كتير. مبادرة مينيماليزم بالعربي هدفها هو نشر الوعي عن أضرار الإستهلاكية وفكرة الحياة البسيطة. الرسالة دي المبادرة بتوصلها من خلال صفحتها على إنستجرام، إحنا قعدنا مع طالبة كلية الهندسة ومؤسسة الصفحة نهال السيد عشان نعرف أكتر عن المينيماليزم وإزاي نطبقه بالعربي!
يعني إيه مينيماليزم؟ وإيه هي الحياة البسيطة؟
هو أسلوب حياة هدفه تبسيط الحياة عن طريق الاستهلاك أقل وده بالتالي هيدينا شعور بالرضا عن الي عندنا وهيخلينا نركز في المهم في حياتنا (العيلة، الصحاب، العلاقات، الانشطة،…) عشان دي كلها حاجات لا تشترى بالمال.
ليه مبادرة مينيماليزم بالعربي مهمة لمصر؟ إيه اللي ألهمك تنشئيها؟
View this post on Instagram
فيه محتوى كتير عن المينيماليزم علي الانترنت بس للأسف معظمه بالانجليزي فاللي دفعني إن أنا أعمل الصفحة هو أولا إن مفيش محتوي كتير بالعربي وثانيا إن أسلوب الحياة ده أبعد ما يكون عن ثقافتنا الشرقية.
في جيل أمهاتنا بنلاحظ إن كل بيت فيه صالون وطقم صينى وكريستالات وفي كل طبقات المجتمع فيه إسراف في جهاز الزواج.
جيلنا حاليا كشباب متأثر باللإنفلونسرز اللي معظم الوقت بيحسسونا ان احنا عندنا ناقصين حاجة ودي ظاهرة عالمية.
إزاي الواحد ممكن يبدأ يتبع أسلوب الحياة البسيطة؟
أنا بحب أشوف أسلوب الحياة ده علي إنه عملية أو رحلة، مش خطوة واحدة بتتعمل. كل واحد عارف إيه الحاجات الي بيشتريها بزيادة إن كانت هدوم أو كتب أو غيرها.
المهم إننا نحاول نفكر قبل ما نشتري إذا كان الشئ ده فعلا مهم وهيضيف قيمة في حياتنا ولا لأ.
مفيش عدد معين دي حاجة ترجع لكل شخص بس الفكرة إن يبقي كل اللي عندي بستخدمه. أنا لسة موصلتش للمرحلة دي بس واحده واحده بتبرع بحاجات أو أبيعها في سبيل البساطة.
إيه أكتر عادات في مجتمعنا لازم تتغير؟
View this post on Instagram
قواعد تجهيز البيت (النيش، الصالون، إلخ …) ونفسي يبقي عادي إننا نشتري لبس مستعمل أو نكرر نفس الطقم كتير أو نلبس نفس الفستان السواريه في كذا فرح.
احكيلنا عن أضرار الاستهلاكية والموضة السريعة
أضرارها رهيبة! من أول التصنيع لنهاية المنتج والتخلص منه. معظم اللبس بتاع الماركات الكبيرة هنلاقيه متصنع في دول نامية زي بنجلاديش وفيتنام والصين. وفي البلاد دي مفيش قوانين مفعلة بتحمي العمال أو البيئة فبالتالي المصانع بتتخلص من الكيماويات بتاعة الصبغات في الأنهار. ده غير إن صناعة اللبس بتستهلك مياه كتير وكمان بتساهم في ١٠% من انبعاثات ثاني أوكسيد الكاربون.
العمال الي بيشتغلوا معظمهم ستات وبياخدوا أجور قليلة جدا وأحيانا بيتم التحرش بيهم. ده غير ظروف العمل غير الآدمية. فيه حادثة معروفة باسم رانا بلازا ده مبني ٨ ادوار انهار بالعمال الي فيه بسبب الإهمال و أدي لوفاة فوق الألف عامل/ة.
إزاي الناس بتشوف اهتمامك بالـminimalism؟
أنا شايفة في ناس كتير عاجبها المينيماليزم وفيه ناس عايشة كده أصلًا في مصر.
أنا أول ما عملت الصفحة لقيت دعم كبير من ناس معرفهاش كان نفسهم يشوفوا المحتوي ده بالعربي.
إيه التحديات الي قابلتك؟
إن أنا أطبق اللي أنا بقوله مهما كان في مُغريات. أكيد بحب إن أنا ابقي متماشية مع صحابي في الموضة والهدوم. بتخطي ده بإني أدور وألاقي الستايل بتاعي بغض النظر عن اللي موجود في السوق دلوقتي.
نفسك تحققي إيه بمينيماليزم بالعربي؟
نفسي أكٌبر الصفحة وأوصل لناس أكتر. ويبقي فيه مجموعة من الناس عايشة بالأسلوب ده وواحده واحده نغير العادات و الثقافة الاستهلاكية الي في بلدنا.
دوسوا هنا عشان تعرفوا أكتر عن مينيماليزم بالعربيز
