ترجمة: تسنيم عبد الله
الرياضية/ ومصممة الأزياء الرياضية مونيكا يوسف منصور بتُحدث موجة تغيير جذري في الأزياء الرياضية. كون إن والدها بطل الكونج فو والممثل الكبير يوسف منصور، ساعدها إنها تستقر في مجال اللايقة البدنية بسهولة. إتكلمنا مع الرياضية الشابة المتفردة، اللي بتغيّر بكل قوتها المفاهيم الخاطئة عن اللايقة البدنية والجمال.
مونيكا نشأت في عيلة بتعشق الرياضة، ولقت فيها شغفها. بتحكيلنا “والدي أصرّ إنه يدربني أنا وأختي وإحنا في سن صغير جداً، علشان ينمّي فينا أهمية أسلوب الحياة الصحي.” مع الأسف، في ناس فاكرة إن الجمال واللياقة البدنية حاجتين مختلفين. مونيكا بتقول “الحقيقة أنا بشوف إن الستات اللي بيلعبوا رياضة وبيتمرنّوا دايماً بيبقوا كلهم أنوثة. مفيش حاجة وحشة في الست اللي بتلعب رياضة علشان تعيش حياة صحية.”
مع إزدهار مجال تصميم الأزياء في مصر يوم عن يوم، اللبس الرياضي في مصر لسة زي ما هو مابيتطورش. مونيكا بتحكيلنا بتقول “من حوالي خمس أو ست سنين بدأت أتدرب كتير في الجيم، ولاحظت إن مفيش خيارات كتير في اللبس الرياضي. كنت عايزة ألبس حاجة مختلفة حاجة تخليني أتميز وأكون متفردة. علشان كدة قررت أرسم تصاميمي، ومن هنا إتولدت ماركة Monni K”
الوورك أوت والرياضة مش رفاهية، ده أسلوب حياة، وإن يبقى عندك روتين رياضي ملتزمة بيه بينقذ حياتك حرفياً. مونيكا بتقول “في تمارين كتير تقدر الست اللي بتشتغل تعملها في 30 دقيقة. تقدر تعمل شوية push ups، sit ups، سكواتس أو نط الحبل قبل ما تروح الشغل. في حاجات كتير ممكن تعملها هي بس لازم تكون ملتزمة وحريصة عليها 100 في المية. في ستات كتير في العشرينات مابيتمرنوش خالص، وبيملوا جسمهم بالجانك فود. وعلى العكس في ستات عندهم حاجة وأربعين سنة جسمهم رشيق وصحي. الفكرة في الإلتزام. إحنا محتاجين ناكل أكل صحي، ونتمرن بشكل دائم على الأقل ثلاث مرات في الأسبوع.
