فن فاطمة رمضان: الحياة بعدسة السريالية

فن فاطمة رمضان

فاطمة رمضان فنانة تشكيلية بدأت مسيرتها الفنية في ٢٠٠٩ لما كانت بتدرس في فنون جميلة قسم جرافيك. بتشجيع أهلها ودكاترتها، فاطمة قررت تبدأ رحلتها مع الفن السريالي. الشخصيات اللي بترسمها دايمًا فيها جزء منها وده بيخلي فنها قوي ومختلف.

إحنا اتكلمنا مع فاطمة رمضان عشان نتعرف عليها وعلى فنها!فن فاطمة رمضان

ممكن توصفي أسلوبك في الرسم إزاي؟

بميل للأسلوب السريالي في أعمالي زي مثلًا إني أرسم الجسم باستطالة عشان يكون غير واقعي. وفي نفس الوقت.

بحب أستخدم عناصر حقيقية عشان أحقق التوازن في لوحاتي.

إيه اللي بيلهمك؟ وبتجيلك أفكار للوحاتك إزاي؟

الإلهام بيكون من الحياة اللي إحنا عايشين فيها. كل اللى بيحصلنا من حاجات بنفرح بيها وحاجات بنزعل منها ومشاكل بنعيشها وحلول بنلاقيها عشان الحياة تستمر.

معظم شخصيات أعمالك ستات، هل دي حاجة مقصودة؟

مش مقصود بس بحب أحكي عن الست بشكل عام، ومؤخرًا دخّلت رجالة عشان الصورة تكمل.

زى أى حد بيحاول يعبر عن اللى جواه برسم نفسي في الشخصيات اللي في اللوحات.

أهم حاجة بالنسبالي إن يكون الفن في فكره جديده وغير تقليديه، تكون حاجة فيها إبداع وتغيير.

 

فن فاطمة رمضان

احكيلنا عن المعارض اللي شاركتي فيها، وفين الناس تقدر تشوف أعمالك دلوقتي؟

الناس تقدر تروح جاليري كليج بالشيخ زايد أعمالي معروضة عندهم وكمان في كذا جاليري شغلى موجود فيه أو يتبعوني على السوشيال ميديا على الانستجرام.

 

 

View this post on Instagram

 

A post shared by FATMA RAMADAN (@fatmaramadan__)

عملت 5 معارض فردية منهم واحد في أسبانيا وواحد أونلاين في فترة الكورونا في إيطاليا والتلاته التانين فى مصر آخرهم كان يوم ١ أكتوبر ٢٠٢١ فى جاليري كليج بالشيخ زايد.

شاركت برضه في معارض جماعية كتير جدا في مصر وبره في جده وفرنسا وبانكوك وأرمينيا والهند وايطاليا واسبانيا والمغرب وتونس ونيجيريا والشارقة وغيرهم كتير.

كمان شاركت في ملتقيات دولية وورش عمل محلية وحصلت على جوائز ومنح من وزارة الثقافة المصرية.

هل واجهتي تحديات في رحلتك الفنية؟

واجهت تحديات كتير في طريقي الفني علشان أوصل لقاعات أعرض فيها أعمالي.

دايمًا كان عندي هدف عايزة أوصله وده اللي ساعدني أتخطي التحديات.

إيه هي خططك للمستقبل وتحبي تحققي إيه؟

نفسى أسافر دول كتير جدا أوّصل فيها فنى وأسلوبى وأشارك في ملتقيات فنية تخلي العالم كله يعرفني من شغلى.

 

View this post on Instagram

 

A post shared by FATMA RAMADAN (@fatmaramadan__)

إيه النصيحة اللى حابة تقدميها للبنات اللي ممكن تكون عايزة تتبع الفن والرسم؟

اللى شايف فى نفسه إنه موهوب لازم ينمى موهبته دى ويحط هدف ويتعلم.

إحنا هنفضل نتعلم طول ما احنا عايشين وهنفضل نسأل ونتفرج كتير على اللى قبلنا ونسمع نصايحهم لحد ما نوصل لأول الطريق.

لو حابين تعرفوا أكتر عن فاطمة رمضان وفنها، تابعوها هنا.

No Comments Yet

Leave a Reply

Your email address will not be published.