الفن والمرأة: بفرشة عبير عادل

الفن عبير عادل

شغف وحب عبير عادل للفن دايمًا واضح في شغلها. ألوانها وأسلوبها في التعبير بيعكسوا حبها لبيتها أسوان. فنها دايمًا بيناقش المرأة والدور الكبير اللي بتشكله في العيلة، بيعرض حاجات تانية كتير زي شكل الأسرة والطفولة والبيت.

إحنا اتكلمنا مع عبير عشان نتعرف أكتر عليها وعلى فنها!

الفن عبير عادل
فن عبير عادل

إزاي بدأت رحلتك مع الفن؟

كلية الفنون الجميلة كانت البداية بالنسبة لي. وقتها بدأ يبان أسلوبي في الفن من سنة تالتة كلية وبدأت أشارك في معارض في سنة ٢٠١٥.

في سنة رابعة، عملت مشروع تخرجي بأسلوبي وأخدت درجة الامتياز ومن بعدها شاركت في معارض مختلفة وأخدت جوائز منها اقتناء الهيئة العامة لقصور الثقافة، وجائزة اقتناء متحف الصين للطباعة، وغيرهم كتير.

معظم فنك فيه ست ظاهرة بشكل معين، مين هي؟ وايه سر حبك في رسمها؟

فن عبير عادل
فن عبير عادل

أنا في الأساس بحب العرايس وفي أعمالي بستخدمها كرمز للتعبير عن المرأة بجميع أشكالها ومشاكلها في الحياة اللي بتقابلها. دائما بحب إني أنصف وأعزز المرأة بأسلوبي الفني.

إيه مصدر إلهامك؟ هل ليكي طقوس معينة بتتبعيها قبل الرسم؟

دايمًا لما بشوف كادر من الطبيعة بتأثر بعيني قبل أي حاجة وبعدين بحس بيه وبنفذه بأسلوبي وطريقتي. مثلاً، ممكن أكون مسرحة شعري بشكل معين وأتأثر بيه وألاقي نفسي بمسك ورقتي وقلمي وابتدي أرسم، لدرجة إن العروسة اللي موجودة في اللوح بتاعتي بقت جزء كبير من شخصيتي.

فن عبير عادل
فن عبير عادل

أول ما بدأت رحلتي مع الفن كنت بستخدم أقلام التحبير السودا بس، وبعد كدة بدأت أزود لون واحد.

وبعدين بدأت مرحلة جديدة خالص وهي إني أستخدم أكثر من لون في تصميماتي ومع كل مرحلة، الألوان كانت بتلهمني بشكل كبير.

فين الناس تقدر تشوف أعمالك؟

بعرض أعمالي الفنية دايمًا في أكتر من جاليري فني في القاهرة ولبنان واليابان، وكمان بشارك في المعارض الفنية اللي بتنظمها الحكومة زي صالون الشباب، وصالون أبيض وأسود وغيرهم.

هل عديتي بتحديات في رحلتك الفنية؟ لو آه، إزاي تخطيتيها؟

أيوة كتير جدًا، دايمًا بواجه صعوبات كتير إني أشارك في المعارض وإني أبقي موجودة في الوسط الفني لأني عايشة في أسوان والمسافة كبيرة للقاهرة والإسكندرية.

 

الفن عبير عادل
فن عبير عادل

بس دايمًا بحاول إني أتخطي كل ده وإني أبعت أعمالي لمعارض مختلفة وإني كمان أحضر افتتاحات المعارض اللي بشارك فيها.

تقولي إيه للبنات اللي ممكن تكون عايزة تدخل مجال الفن والرسم بس خايفة؟

نصيحتي مش بس للرسم، لكن أي حد عنده حلم لازم يكون مُصِر عليه ويكون صبور عشان يحققه.

كلنا محتاجين إننا نشتغل علي نفسنا كتير ومانستسلمش لأن اللي عنده حلم، ربنا بيوصله له وبيديله علي قد تعبه.

إيه هي أهدافك؟

هدفي إن أعمالي الفنية تلف العالم كله!

وإني أسافر وأشارك في كل الملتقيات الفنية جوة مصر أو برة لأن ده بيضيف كتير ليا وبيخليني أتعرف علي ثقافات مختلفة. وأخيرًا إن يكون عندي لوحات في كل بلد.

تقدروا تتابعوا عبير عادل و فنها هنا.

No Comments Yet

Leave a Reply

Your email address will not be published.