للأسف التعميم لسة موجود في مصر بشكل كبير، خصوصاً لما نتكلم عن دور الأم والأب في البيت. ومع ذلك الجيل الجديد من الرجالة بيحاولوا يكسروا الصورة المتعارف عليها في المجتمع عن شخصية الأب في البيت، بإنهم يكونوا مُتاحين عاطفياً لأولادهم، ويشاركوهم تفاصيل يومهم، ويكون ليهم دور مؤثر في تربيتهم. إلى جانب كونهم الطرف الأساسي المُعيل للأسرة، والمسؤول عن مصارفيهم، همّا كمان بيغيّروا البامبرز، بيغنّوا للأولاد قبل ما يناموا، بيودّوهم المدرسة، وكمان بيطبخولهم. اتكلمنا مع مجموعة من الأبهات اللي شغلهم واخد حيّز كبير من وقتهم وحياتهم، لكن وبرغم إنشغالهم، دايماً بيلاقوا وقت يقضوه مع ولادهم.
يوسف خليل: نائب الرئيس في شركة فريش للأجهزة المنزلية
يوسف كونه رائد أعمال، خلاه يواجه تحدي حقيقي علشان يلاقي وقت يقضيه مع أولاده. لكنّه قدر يخلق التوازن بين الشغل والبيت، زي ما بيقول “الحل هو إنك تخلق روتين، أو عادات، وتلتزم بيها. دايماً بحاول أكون حريص إني أتعشى مع الأولاد، ونقضي وقت جميل مع بعض، نترابط فيه مع بعض أكتر، وأسمع منهم أخبارهم وتفاصيل يومهم..”
فترات الأجازات مهمة جداً لترابط العيلة، يوسف بيحكلنا إزاي بيقضي وقته في الأجازة، بيقول “برتب مواعيد أجازتي مع مواعيد أجازات أولادي؛ وقت ما يبقوا هما أجازة لازم أنا كمان آخد أجازة. عندي جدول المدرسة بتاعهم على تليفوني. بظبط مواعيد الاجتماعات بتاعتي بحيث ماتتعارضش مع مواعيد أنشطتهم، علشان أكون حاضر معاهم دايماً”. وجود الأب شيء ضروري في حياة أولاده. دوره ماينفعش يكون محدود في إنه آلة صرافة، بيجيب فلوس وبيصرف على البيت وبس. الأب لازم يخلي أولاده يحسّوا معاه بالأمان، والثقة بالنفس.
أحمد عماد: مديرقسم التجارة الإلكترونية، بالشرق الأوسط وأفريقيا في شركة موندليز الدولية
كل ما كنت بعيد عن أولادك، كل ما كان تأثير الحاجات المحيطة بيهم أقوى في تشكيل شخصياتهم، ومش دايماً بتكون البيئة الموجودين فيها صحية. أحمد بيقول “الشغل مهم، لكن آخر اليوم لو ماكنتش بتلاقي وقت تقضيه مع عيلتك فلازمته إيه الشغل من الأساس؟ احساس مُرضي جداً إنك تقضي وقت جميل مع عيلتك، وتكون جزء من نشاطاتهم اليومية”. أحمد بيشارك أولاده نشاطات كتير زي لعب الكورة، بلايستيشن، وبيحب يفرّجهم على الأفلام والمسلسلات القديمة اللي كان بيحبها في طفولته، وكمان بيلعبوا مزيكا سوا. أحمد بيقول “ضروري جداً إنك تكون موجود جنبهم طول الوقت. مع ارتفاع معدلات الطلاق، مش كل الأطفال عندهم رفاهية إنهم يقضوا وقت مع أبوهم وأمهم في نفس الوقت. مهم لأي أب إنه يقضي وقت مع إبنه. لإنهم أولادنا إحنا كمان مش بس أولاد مراتاتنا”.
هشام خرما: موسيقي
كلنا عارفين قد إيه حياة الفنان الموسيقي بتبقى زحمة وكلها انشغالات. لكن الوضع بيختلف شوية بالنسبة لهشام خرما، لإن بالنسباله الوقت اللي بيقضيه مع عيلته شيء مقدّس. برغم جدوله المليان، هشام دايماً بيحرص إنه ياخد أجازة من وقت للتاني ويخطط لرحلة مع العيلة. بيحب يشارك في كل أنواع النشاطات مع أولاده؛ أي حاجة هاتبسطهم، وهاتخليه يقضي وقت جميل معاهم. هشام بيقول “بنلعب رياضة، بنتفرج على أفلام، وبنطبخ كمان. وساعات باخدهم معايا الاستوديو علشان يشاركوني اللي أنا بعمله”. لو عايز عيالك يكونوا أصحاء، واثقين من نفسهم، ومؤدبين، يبقى لازم يكون الأب حاضر ومُشارك في تربيتهم.
هيثم رفاعي: رئيس قطاع البيع بالتجزئة في بنك كريدي أجريكول مصر
أما بالنسبة لهيثم، فله طريقة مختلفة علشان يقدر يخصص وقت يقضيه مع أولاده، وهي طريقة التخطيط، هيثم بيقول “انا ومراتي بنعمل جدول لأولادنا على أساس جداول مواعدنا. لإن إحنا الأتنين بنشتغل، وبكدة بنضمن إننا نقضي وقت مع العيال على قد ما نقدر”. وقت الأب ثمين جداً بالنسبة له ولأولاده. دور الأب الأهم من وجهة نظر هيثم هو إنه يخلي أولاده يحسّوا بالأمان، “لما أولادي بيخافوا من حاجة، أو يقلقوا، على طول بيلجأولي. كمان هما لسه صغيرين فدايما مهيبرين وبيتنططوا ويلعبوا، فدوري إني ألاقيلهم حاجة يخرجوا فيها الطاقة اللي جواهم ويستمتعوا بيها”.
الأبهات دلوقتي بيحاولوا يغيّروا فكرة “راجل البيت”، وإن الراجل عبارة عن آلة صرافة متحركة. دور الأب في البيت زي دور الأم بىالظبط – بيروح يشتري احتياجات البيت من السوبرماركت، بيودّي العيال المدرسة، بيغير البامبرز، وكمان بيقعد مع العيال لما تكون الأم محتاجة شوية وقت لنفسها.
ونصيحة لأي أب مدمن شغل، لازم تخصص وقت تقضيه مع أولادك –علشان بعد كدة لما هما يكبروا يخصصوا وقت يقضوه معاك.
كتبت: فرح أحمد
ترجمة: تسنيم عبدالله
