“مش بفهم إلا بالحواديت” – دي الجملة اللي خلت إسراء صالح (أو سوبر أبلة) تبدأ رحلتها مع التدريس. بعد ما مريم، بنت في ٣ إعدادي وصاحبة متلازمة داون قالتلها الجملة دي. ساعتها سوبر أبلة كتبت حدوتة ورسمتها في ٥ دقايق وبعدها مريم جابت درجة عالية جدًا في النحو. لما جه وقت الكورونا، إسراء قررت تعمل منهج تدريس بدأ بالعامية المصرية ووصل للفصحى ووصل لنتايج عالية جدًا بين الطلاب. وده كله حصل عشان إسراء قررت تحب الأطفال اللي هي بتدرسلهم وتديلهم المساحة اللي هم محتاجينها عشان يتعلموا، وكمان تحكيلهم حواديت. سوبر أبلة مش بس فكرة جميلة ومهمة. هي بداية لتغيير تجارب صعبة كتير الأطفال ممكن يمروا بيها مع بعض من مدرسيهم. تجارب إحنا كلنا مرينا بيها في جزء من حياتنا. سوبر أبلة بداية للتفهم والحب والحكاوي اللي مش بنشبع منها.
اتكلمنا مع إسراء عشان نتعرف عليها وعلى سوبر أبلة أكتر!
دايمًا بتتكلمي عن المدرسين القاسيين وتأثيرهم على التلاميذ، إيه تجاربك الشخصية مع حاجة زي دي؟ وخليتك تغيري إيه في أسلوبك كمدرسة؟
ميس نبيلة لسه فاكرة اسمها وعصايتها المرعبة ورغم حفظي للشعر من قبل حتى ما أدخل المدرسة إلا إن ده مشفعليش علقة بسبب إني جبت 35 من 50 في امتحان الشهر. كرهت العربي لحد ما جت ميس عزة ولاحظت حبي للقراءة وشطارتي في الإلقاء والتعبير. بقيت بفضلها بحقق مراكز للمدرسة في الشعر وطلعت من أوائل إدارة المعادي التعليمية. وكرموا أمي كأم مثالية لتفوقي على مستوى الدراسة والأخلاق مع إني كنت عفريتة بس دحيحة فالمدرسين بتفوت لي.
مش بحب أصنف نفسي كمدرسة بشوف نفسي ملهمة.
أنا أبلة فعلًا بالمعنى الحرفي للأخت الكبيرة اللي بتخاف على العيال كأنهم مني وأنا منهم.
بحاول أعلمهم بالطريقة اللي تحترم دماغهم وأفكارهم وأسئلتهم ونفكر سوا.
سوبر أبلة خليتك تعرفي إيه عن نفسك أكتر؟
إني بعرف أقع وأقوم عادي وإني لسه عنيدة وبجري وبعافر ورا أحلامي وعمري ما باخد لا كإجابة وبخبط على 10000 باب لحد ما اعمل اللي يعجبني.
تشرحي سوبر أبلة إزاي لحد ميعرفهاش لسه؟
منصة إلكترونية لتعليم اللغة العربية للأطفال من سن 3 ل 6 عن طريق العامية المصرية وصولًا للفصحى وربط اللغة بالثقافة والتاريخ والجغرافيا.
إيه اللي سوبر أبلة بتقدمه دلوقتي؟ سمعنا عن ألعاب جديدة، احكيلنا عنها
لا شركة الأبلة بتعمل بلاوي ههههه احنا بنكتب منهج للأطفال من 3 ل 6 وبندرب المدرسين وممكن تحجزوا مدرسين عربي عندنا وتشتروا من دكانتنا ألعابنا وألعاب ناس تانية بس لعبتنا بقى أول كروت تعليمية بتقدم معلومات كتير وبتتلعب ب 9 طرق وبتعلم الولاد عن حيوانات بيئتنا المصرية ,أكلاتنا زي الطعمية والفسيخ والقصب وغزل البنات مثلا.
View this post on Instagram
إيه اللي نفسك تغيريه في أساليب التعليم دلوقتي أو في منظومة التعليم بشكل عام؟
احترام عقلية الطفل ونقدمله موضوعات تهمه وتفتح مداركه مش تعلمه التلقين ونفسي نعمم تجربة ال ib هنشوف مصر في حتة تانية مع ولادنا.
إيه التغيير اللي بتشوفيه في الأطفال لما المدرسين بتوعهم بيتعاملوا معاهم بأسلوب أحسن؟
أكاديميًا وسلوكيًا بنشوف طفل مسؤول متسائل ومفكر
إيه التحديات اللي واجهتك أو بتواجهك مع سوبر أبلة؟ وبتتخطيهم إزاي؟
أنا مبخططش أنا بحلم وأشوف حلمي واخرج برة الفقاعة واكتبه في خطواط وادق على كل البيبان بس هحكيلك حكاية مكنش معانا فلوس نعمل الموقع ولا التطبيق وفجأة فكرنا في فكرة تعيين الانترنز أكبر تحدي هو الفلوس ورغم كده ربك كريم وبيفتح ألف طاقة نور.
إيه اللي بيشجعك إنك تكملي مع سوبر أبلة؟
ميكا بنت أخويا اللي عندها 3 سنين هي ملهمتي لصناعة منهج يخليها هي وكل الولاد على تواصل بهويتنا المصرية ولغتنا ينبهر أما الاقيها استوعبت وهضمت وحاليًا عارفة خريطة مصر ماشاء الله ونهر النيل ومين بيعيش في النهر من الحيوانات مثلًا.
سوبر أبلة محتاجة إيه دلوقتي؟
محتاجة استثمار ومحتاجة فريق العمل بتاع شركتنا أركز معاه أكتر وألاقي بدائل دايمة لنقص الفلوس.
نفسك سوبر أبلة توصل لإيه؟ إيه أهدافك ليها؟
لا هو مش نفسي أنا بسعى إنه يحصل وهيحصل ربنا قال أنا عند ظن عبدي بي وظني بربنا يقيني، سوبر أبلة هتبقى طريقة معتمدة لتعليم العربي وتتدرس ويتعمل فيها أبحاث زي منتسوري وريجيوايميليا.
