بوركينى كل سنة مرة

بوركينى glo

خناقة كل سنة

الجو حّرر كدة والصيف دخل؟ طيب يلا نبدأ الخناقة بتاعة كل سنة الله لا يسيئك عشان عملت جردل فشار وهقعد آكله وأنا بمسح دموعي بكم البوريكيني.

بصوا بصراحة أنا زهقت وعايزة أقول كلمتين كده… إحنا قاعدين بنتكلم هنا مع بعض في أوضة مقفولة والعقول اللي محتاجة تتغيّر مش سامعانا ولا شايفانا. عشان هما مش هنا ولا مهتمين، هما حاطين دماغهم فى البكابورت الفكري اللي غرقانين فيه عشان يفضلوا دايما حاسين إنهم أحسن وأشيك وإن كل بنت لابسة بوركينى مش هتبوّظلهم الڤيو الشيك أوي بتاع البحر.

الستات لبعضيها

السؤال بقى اللي واقف في زوري: الناس اللي زي حالاتي كدهون، اللي شايفين إن كل واحدة تلبس أو تقلع أو تمشي على الحيطة أو السقف حرة، بيسكتوا ليه أما يشوفوا إن الظلم ده واقع على أي واحدة؟ حلو إني أروح أعمل دوشة على السوشال ميديا ويبقى في تريند ومشاهدات وطبلة وزمارات ولايكات… بس لما بنكون واقفين فى الموقف نفسه، ليه مش بنلتف حوالين البنت أو الست اللي واقع عليها الظلم. مش بقول نتخانق ولا نحتد، لكن وقفة، دعم، ضهر، إنتي مش لوحدك. أنا مش لابسة زيك بس أنا بدعمك في كل اختياراتك وحالاتك. ليه اللي لابسة بيكيني أو مايوه عادي ماتروحش مع اللي لابسة بوركينى ويعملوا الشكوى مع بعض؟ في إيد بعض، صف واحد.

ولا عشان خلاص الحجاب للأسف بقى بيتبص عليه على إنه حاجة “بلدي”؟ مظهر مش حضاري… مطلوب سكرتيرة حسنة المظهر مش محجبة و مش بتلبس بوركينى. أنا مرة رحت إنترفيو والراجل أول حاجة قالهالي أما بص فى وشي بإمتعاض: “إيه ده إنتي محجبة”؟ اللي هو : “هو أنا ماقلتلكش؟ يقطعني!”

الحرية

الحرية دي شارع إتجاهين! يعني حرية أقلع وألبس والحرية مش بتتكفل. أصلها مش تورتاية مستنية حد لامؤاخذة يديني خرطة! دي بتتاخد! بالعافية! هي الثورات اللي نجحت وأدت غرضها فى التغيير كانت بالطبطبة؟

أنا مش بحاول ولا مفروض إني أكافح عشان ألاقي لنفسي مكان على خريطة المجتمع. أنا عندي مكان وصلتله بمجهودي وتعبي وإشتغلت على نفسي سنين ولسة هفضل أشتغل على نفسي لحد ما أموت. وفي وسط هذا الخضم ونبي متطلعليش تقولي ممنوع يا مدام اللي إنتي لابساه ده! عشان ده يديني أنا كمان الحق إني أقولك ممنوع يا بيه اللي أنت لابسه ده والمايوه بتاعك مش مطابق للمقاييس الإستراتيچية اللي أنا حاطاها للجماليات اللي أحب أشوفها وأنا بصيِّف. يعني معقول يبقى عادي أشوف راجل لابس مايوه مرسوم عليه شوية جرجير وأسكت؟ ده حتى بلدي أوي يا حسين!

شفتوا الكلام وحش وجارح ورخم إزاي؟ طيب ليه مقبول من جهة ومش مقبول من الجهة التانية؟ ولا هو التنمر في فصل الصيف متركز على المحجبات وبقية السنة عادي على بقية البشر؟
إرحمونا بقى، مش هيبقى إنتو وحرارة الصيف علينا!

 

Regina Inani الجواز
Regina Inani

أنا ريجينا عنانى لايف كوتش وبركز اكتر على مواضيع اللايف ستايل والكاريير. أنا من HR الطيبيين وإشتغلت فى شركات مختلفة جوّة وبرة مصر.
عندى إدمان للكتب وشرب القهوة! أنا بحب أقدم محتوى مختلف مبنى على خبرتى.
إيه اكتر حاجة نفسى فيها؟ نفسى أشوف ستات اكتر فى مناصب مؤثرة وعندهم فرص لامتناهية فى النمو والنجاح.

No Comments Yet

Leave a Reply

Your email address will not be published.