الإحترام
درجة تقدم المجتمعات بتتقاس بمدى احترامه للمرأة. احترام المرأة ده بقى حضرتك مالوش علاقة بإنها لابسة زى ما المجتمع اسم النبي حارسه وصاينه عايز يلبّسها، ولا برضو له علاقة بشكلها أو لونها أو إختياراتها الشخصية في التعبير عن تفّردها في شكلها. الاحترام هو احترام اختيارات المرأة من أول مظهرها الخارجي لحد الشكل اللي مقررة تعيش بيه حياتها.
بقول الكلمتين دول وأنا قاعدة في تجمع إجتماعي ممل وحاسة إن مخي بيغرق من الملل في مخدات ساتان وملايات مكوية وشباكنا ستايره حرير! ببص حواليا واشوف في عيون الآخرين نظرات لجنة التحكيم ومش ناقص غير إن كل حد يرفع لوحة مكتوب عليها تقييمه الخاص بالأرقام لكل واحدة بتدخل المكان! والطريف إن هذه المهذلة المجتمعية بتحصل من الرجالة والستات على حد سواء! كله بيعلّى على غيره لسبب مجهول.
طبعًا منغير ما أقول عارفين إيه اللي وصّلنا للنقطة دي! ما هو لو كان الموروث الاجتماعي أي كائن كنت ضربته بالنار وخلّصت العالم من شروره!
الفيل اللي في الأوضة
طب وبعدين؟ عارفين فكرة “الفيل اللي في الأوضة”؟ ده مصطلح إنجليزي كدة بنعبر بيه عن أي حاجة غريبة حاصلة بتسبب للناس الحرج وبيعملوا نفسهم مش واخدين بالهم منها بس من كتر ما هي كبيرة زي الفيل مش بينفع يتجاهلوها. أنا بقول لكل ست إنها متخافش تبقى الفيل اللي فى الأوضة، خليهم يتفرجوا ويندهشوا ويعملوا تقييمات لأن أي موقف تحسي إنك محتاجة فيه تثبتي للآخرين إنك “عادية” عشان ميخافوش منك ويدوكي موافقتهم على إختياراتك ده موقف بيركّبك الحلزونة ومش هتعرفي تنزلي منها بسهولة.
“أنت حر إذا لم تضر” وأنا بقول إنتي حرة حتى لو تسببتي بالضرر لنفسك أحيانًا لأن دي قراراتك إنتي وإختياراتك إنتي وإحنا بنتعلم من الأخطاء أكتر ما بنتعلم من القرارات الصح اللي بناخدها لأن القرار السليم مش بيكون واضح بالنسبة لنا إلا بعد ما بنبني خبرتنا عن طريق إتخاذ شوية قرارات خاطئة.
ومن موقعي هذا بقولك اعملي اللي إنتي عايزاه: إلبسي مايوه، إلبسي بوركيني زي حالاتي، إعملي تاتو، غيّري شامبو وعيشي حياتك وسيبيهم يستمتعوا بالفرجة على الفيل!
أنا ريجينا عنانى لايف كوتش وبركز اكتر على مواضيع اللايف ستايل والكاريير. أنا من HR الطيبيين وإشتغلت فى شركات مختلفة جوّة وبرة مصر.
عندى إدمان للكتب وشرب القهوة! أنا بحب أقدم محتوى مختلف مبنى على خبرتى.
إيه اكتر حاجة نفسى فيها؟ نفسى أشوف ستات اكتر فى مناصب مؤثرة وعندهم فرص لامتناهية فى النمو والنجاح.
