في مصطلح اسمه الأثاث الذكي، يعني المنتجات والعفش، المصمم علشان يسهل استخدامه لكل الناس، ومن ضمنهم اللي بيعانوا من إعاقات جسدية. اللي كان موجود قبل كد كان الأثاث سهل الوصول، اللي تصاميمه بتخدم احتياجات الناس الغير قادرين جسدياً على وجه الخصوص. المختلف بقى في الأثاث الذكي هو إنه بيخلق بيئة مريحة لكل الناس، من غير ما يخصصها لحد معين.
في عناصر ممكن تتعمل بكل سهولة، وفي حاجات منها بتحتاج فني أو متخصص علشان يركبها.
المدخل:
المداخل اللي مفيهاش سلالم بتقلل من التفات الأنظار لدخول أصحاب الإعاقة الجسدية اللي مابيقدروش يستعملوا السلالم. وكمان بتسهل على الأهالي اللي عندهم عربيات أطفال، أو بيشيلوا حاجات كتيرة.
نقطة تانية مهمة، هي إن عتبة الباب تبقى مستوية، علشان ماحدش يتكعبل فيها ويقع. أما من الناحية البصرية فلازم الإضاءة تكون قوية في المدخل علشان تعرف تحط المفتاح في الباب، وجرس الباب يكون في ارتفاع يقدر أي حد يوصله خصوصاً الأطفال.
الحمامات
استخدموا حوض لازق في الحيطة وفيه مساحة كافية علشان يتحط فيه فرش السنان، غسول الوجه، الخ. ويبقوا قريبين وسهل الوصول ليهم. وكمان لازم يكون في مكان مخصص للركبة تحت الحوض للكراسي المتحركة.
مراية الحمام لازم تكون في مكان مناسب لكل الناس، بما فيهم الأطفال والمعقدين كمان، علشان يقدروا يشوفوا نفسهم بكل أريحية. طبعاً مساند جنب قعدة الحمام وجنب البانيو ضرورية جداً. بالإضافة لقعدة حمام بديلة علشان يبقى ارتفاعها مناسب لكل أفرد العيلة. وضيفوا على كل النقط دي، بانيو أرضي علشان يقدر يدخله كرسي متحرك.
أوضة الليفنج
ممكن تستعملوا ترابيزات حوافها بارزة علشان تساعد أي حد بيقوم أو بيقعد يسند عليها. كراسي بتتحرك لقدام أو ورا علشان تساعد الغير قادر جسدياً إنه يقوم من غير ما يبذل مجهود كبير. دلوقتي بقى سهل جداً إن يبقى عندك ريموت كنترول لكل حاجة. من أول التليفزيون لحد اللمبة والشباك. خطوة رصّ العفش دي مهمة جداً، لإنها لازم توفر مساحة مريحة للحركة، لإن الترتيب بشكل زحمة ممكن يسبب حوادث.
أوضة النوم
كومود جنب السرير. علشان اللي بيحتاج حاجة يسند عليها لما يقوم. زائد سرير ارتفاعاته مظبوطة هايبقى مريح جداً. زرار النور جنب السرير على طول علشان ماحدش يتكعبل في الضلمة. مساحات تخزين فيها أرفف ودوارات علشان تسهل الوصول للحاجات البعيدة في الدولاب.