7 علامات انكم محتاجين تروحوا لاستشاري علاقات زوجية

خلينا في البداية نعرف يعني ايه استشارة زوجية، و ايه اللي بيحصل في جلسات الاستشارة؟

الاستشارة الزوجية هي جلسات بيحضرها الزوجين مرة كل اسبوع أو كل اسبوعين مع متخصصين في العلاقات عشان يحسنوا من علاقتهم الزوجية و يفهموا اكتر عن العلاقات، أو عشان يحلوا خلاف أو مشكلة موجودة بينهم.

في الجلسات دي، بيتكلم الزوجين بكل صراحة عن مشاعرهم ناحية بعض أو حتى عن أمور جنسية في علاقتهم ببعض و بكده بيبقى عند الاستشاري خلفية عن طبيعة علاقتهم، و بيبدأ يديهم نصايح يحسنوا بيها علاقتهم و يعلمهم أكتر عن طبيعة العلاقات السليمة، و بيديهم الاستشاري تدريبات يقدروا يعملوها في فترة الجلسة نفسها او بين كل جلسة و جلسة.

هو فعًلا الجلسات بتاخد وقت كتير؟

فعًلا ممكن جلسات الاستشارات الزوجية تاخد وقت كتير و بتختلف من زوجين لغيرهم، و ده على حسب طبيعة علاقتهم وطبيعة المشاكل اللي بينهم وأعباء الحياة اللي بيواجهوها، من اهم الحاجات اللي بتحدد الوقت هي قدرتهم انهم يتعاونوا فعلًا و يستجيبوا لكل الواجبات اللي بيديها لهم استشاري العلاقات و انهم يختاروا شخص يكونوا مرتاحين و هم بيتكلموا معاه و مش حاسين انه  ممكن يحكم عليهم أو يحسسهم بالذنب.

العلامة رقم 1

طبيعة العلاقات الزوجية انها مش بتمشي في خط مستقيم، فلو علاقتك مع شريكك ماشية في خط مستقيم دي مش علامة كويسة أبدًا لانكم بالشكل ده بتكرروا نفس الروتين و نفس نمط الحياة بتاع كل يوم و نفس كل حاجة، و دي عمرها ما هتكون حاجة كويسة حتى ليكي كطرف في العلاقة لأنها مع الوقت هتخليكي تفقدي جزء من شخصيتك، مش علاقتك بجوزك بس.

العلامة رقم 2

لو علاقتكم الجنسية هي الحاجة الوحيدة الكويسة في علاقتكم، ممكن تكون علاقتكم الجنسية كويسة بسبب ان طرف فيكوا أو حتى الطرفين ماعندهمش توقعات كبيرة، بس في متطلبات الحياة اليومية عندكم مشاكل، في الحالة دي انتوا محتاجين استشاري علاقات زوجية.

العلامة رقم 3

حياتكم ماشية كويس جدًا و بتبقوا مبسوطين و أنتوا مع بعض خارجين، مسافرين، بس لما يجي وقت العلاقة الجنسية ماحدش بيبقى راضي و مبسوط، في الحالة دي انتوا محتاجين برضو استشارة لإن حالة الإحباط دي هتخرج بعد كده و هتأثر حتى على حياتكم العادية اللي ماشية كويس.

العلامة رقم 4

مفيش لغة حوار أو تواصل بينكم، ده بكل مراحله، من انك تتكلمي و مايفهمكيش أو مايسمعكيش، لحد مرحلة انك تقرري ماتتكلميش عشان مش حاسة براحة او انك في ال(الكومفرت زون) لما بتتكلمي في مواضيع حساسة، في الحالة دي الاستشارة هتوفر لكم مساحة واسعة عشان كل واحد يعبر عن نفسه.

العلامة رقم 5

“احنا مختلفين تمامًا زي الشرق و الغرب مابيناش حاجة مشتركة”  جملة بنسمعها كتير، لو حاسين ان علاقتكم بقت كده يبقى ده الوقت المناسب انكم تاخدوا خطوة الإستشارة الزوجية اللي هتقرب مسافات كتير بينكم.

العلامة رقم 6

كل العلاقات ما بين زوجين طبيعي تمر بالحلو و الوحش، بس مش الطبيعي انكم تلاقوا نفسكوا معظم الأوقات بتمروا بوحش بس، و مش عارفين تخرجوا العلاقة من المنطقة دي، لو ده بيحصل لكم لازم ترجعوا لاستشاري علاقات زوجية.

العلامة رقم 7

لو أنتي حابة تربي اولادك بطريقة معينة و جوزك عايز يربيهم بطريقة تانية و على طول بتتخانقوا على المشكلة دي، أو لو لقيتي نفسك مش عارفة توازني بين علاقتك بأولادك و علاقتك بجوزك، في الحالتين دول لازم تروحوا لاستشاري علاقات زوجية.

ماتستنوش لما جوازكم يتحول لجحيم و تكتر المشاكل بينكوا عشان تقرروا تروحوا لإستشاري علاقات زوجية، الاسهل انكم تروحوا لإستشاري و تبنوا علاقتكم من الأول، بدل ما تتحملوا عواقب علاقة سيئة هتأثر على نفسيتكم و تستهلككم، الأسهل انكم تصلحوا علاقتكم الجنسية، مش انكم تحسوا ان عندكم احتياجات جنسية مش عارفين تاخدوها بشكل كامل و سليم.

مترجم عن مقال لرشا سلامة، و هي اخصائية علاقات حاصلة على درجة بكالوريوس في علم النفس من الجامعة الأمريكية، و درجة الماجستير في علم النفس الإرشادي من نفس الجامعة، عندها شغف و حب للمغامرة و السفر، في 2017 عملت The Relation Retreat اللي يعتبر أول منصة لإعادة تأهيل الأزواج في الشرق الأوسط.

No Comments Yet

Leave a Reply

Your email address will not be published.