الستات في مصر قدروا يشتغلوا في كل حاجة، حققوا نجاحات كتيرة، وإحتلوا أعلى المناصب في المؤسسات الكبيرة. بس في أوقات روتين الحياة العملية وتحكُمات المجتمع، بتخليهم يملّوا وييجي عليهم وقت يبقوا عايزين يهربوا من كل ده؛ والحل الأمثل بيكون السفر.
في أسباب كتير تخليكي تفكري تهاجري برّة مصر زي:
- فرص شغل أكتر، بمرتبات أعلى
لو بتفكري في المرتب والشغل وفرص أحسن يبقى ماتقعديش في مصر وسافري دولة من دول الخليج، وأول بلد لازم تفكري فيها هي دبي لأنها دولة إقتصادها قوي جداً، متحررة، فرص الشغل فيها كتير، وفيها ثقافات من كل دول العالم.
- تهربي من تحكمات المجتمع
لما تسافري هاتقدري تخلصي من عادات وتقاليد المجتمع المصري، اللي بتأيّدك وبتتحكم فيكي، وهتبقي مستقلة وحرة أكتر.
- تجرّبي حاجات جديدة وتستكشفي العالم
في نشاطات كتير جداً ممكن تعمليها لو سافرتي برّة مصر، هاتتعرفي على ناس جديدة بعقليات متفتحتة ومختلفة، هاتقابلي ثقافات تانية هايضيفوا لثقافتك وخبراتك، وفي فرصة كبيرة إنك تحبي وتتجوزي راجل مش مصري.
- شخصيتك هاتبقى قوية وإندبندنت
لما ترجعي من السفر أهلك وصحابك هايتعاملوا معاكي كـ ست مستقلة قدرت تعيش لوحدها في بلد غريبة، وكلامك وآراءك هاتبقى مهمة أكتر من قبل كدة، وهايبقالك مساحتك الخاصة محدش يقدر يتدخل فيها.
- هاتهربي من ضغوطات أهلك عليكي علشان تتجوزي
هاتهربي من فكرة الجواز علشان بس أهلك بيضغطوا عليكي وعايزين يفرحوا بيكي.
- هاتثبتي إنك مختلفة ومش شبه حد
سفرك برّة مصر هايثبت إنك مش عايزة تعيشي في الروتين بتاعها، عايزة تعيشي في مكان مختلف بنمط حياة مختلف، وده بيقول إنك شخصية مش عادية، وهايخليكي جذّابة أكتر.
بس زي ما السفر برّة مميزاته كتير، لكن برضه له عيوب، زي إنك تعيشي بعيد عن أهلك وصحابك، وإنك هتبدأي حياتك من أول وجديد، وأحياناً مش هاتكوني حاسة بأمان وإنتي في بلد غريبة لوحدك، ولما تقرري ترجعي مصر هاتاخدي وقت على ما تتأقلمي وتظبطي شغلك وحياتك تاني.
وفي النهاية، كل حاجة ليها مميزاتها وليها عيوبها، فلازم لما تفكري تسافري وتسيبي مصر، تحطي كل الإعتبارات في بالك، وتكوني مهيئة لكل الإحتمالات وقادرة تكوني مستقلة بعيدعن أهلك وصحابك، وتحددي أولوياتك.
كتابة: أماني عيد
ترجمة: تسنيم عبدالله
