في حاجات كتير أمهاتنا علموهالنا وإحنا صغيرين عن الأنوثة وإزاي لما نكبر نبقى ستات صح، لما بقيت مراهقة، اكتشفت إن معظم الحاجات اللي اتعلمتها كانت بتوديني للفشل. أفكار أمهاتنا اللي جداتنا علموهالهم كانت حوّلنا عبيد لسلطة الرجالة، خلونا نبقى ضعاف جداً قدّام قدرة وقوة الرجالة، ودلوقتي بنتمنى لو كنّا اتعلمنا أسس ومبادئ تانية غير اللي اتعلمناها دي.
1- الجمال مش كل حاجة
إحنا اتربينا على فكرة إن لازم يبقى شكلنا “حلو” قبل ما نبقى شاطرين، أو أقوياء، أو حتى لطاف مع الناس، وده بيخليني فريسة سهلة لأي حد يلعب بينا بكلمتين حلوين، سهل نتكسر، ونتهزم بسرعة. كان نفسي أمي تعلمني أنا صغيرة، إني أتصالح مع نفسي، كان نفسي تعلمني إني أستاهل أتحب مهما كان شكلي إيه.
2- الستات اللي حواليا مش منافسيين ليا!
إحنا اتعلمنا إننا ننافس أي ست تانية حاولينا، وإن الحياة سباق بنعرف فيه مين الست الأحلى، والأمثل، وكأن الجمال والكمال شيء محدد وله مقاييس، وكأن ده كل هدفنا في الحياة، وكل اللي نقدر نكونه إننا نبقى أحسن من الستات اللي حوالينا. اتعلمنا إننا لازم نبقى دائماً سابقين صاحبتنا بخطوة في كل حاجة.
ده حطم علاقة الأخوة اللي بينا، خصوصاً وإحنا بنحاول نثبت مين أحسن من التانية. ده اللي بيغذي سلطة الرجالة وتحكمهم فينا أكتر، والتغيير بسيط جداً، كل اللي محتاجين نعمله إننا نفهم إننا مش موجودين في الدنيا دي علشان ننافس بعض، بالعكس إحنا موجودين علشان نقوّي بعض ونثبت لبعض إننا نستحق.
3- أنا مش لازم أبقى رقيقة
المتعارف عليه إننا اتولدنا رقيقيين، ناعمين، وحساسيين جداً. أكيد في كتير مننا كدة، بس في كتير مننا مش كدة! وكتير مننا كانوا كدة ومابقوش دلوقتي. في مننا بيدفنوا علاقات حب فشلت، وبيحاولوا يتجاوزها، ويصلحوا قلوبهم وروحهم اللي اتكسرت، أو يتجاوزوا صدمة ما. في كتير مننا عدّوا بحاجات أصعب من أنها تتحكي، ماسابتش جوّانا أي احساس بالجمال، والرقة. لكن رفضنا نفضل مكسورين، رفضنا نخضع للاضطهاد، ونسمح للعالم إنه يهزمنا، ده خلانا نبقى أقوياء جداً، حادين، ومابنلينش بسهولة. إحنا مش ماشيين جنب الحيط بنوزع ابتسامات وخلاص، إحنا بنحارب الظلم وبنطالب بالإنتقام. كنت أتمنى لو أمي علمتني إن كوني ست قوية وقاسية مابيقللش من كوني ست أبداً.
4- الجواز اختيار
بنضيع ساعات في الميك-أب واللبس علشان نظهر بأحسن شكل، ونتصرف بطريقة لبقة ومثالية؛ كل ده على أمل إن راجل يعجب بينا ويشوف إننا جاذبيين كفاية للجواز.
اتعلمنا إن النجاح في الحياة هو إنك تتجوزي جوازة حلوة وناجحة وبس على كدة.
الراجل مش هو محور وجودي في هذه الحياة، أنا ماتخلقتش علشان أبقى لعبة في إيد الراجل، ولا علشان يبقى هدفي كله إني أبقى شكلي حلو، وأربي العيال وأبسط جوزي. أنا مش عايزة أتجوز، أنا عايزة أجري ورا أحلامي وأحققها، أنا عندي طموحاتي، اللي ولا واحد منهم بيعتمد على الراجل في حياتي. وده مش عيب، ولا غلط، أنا حرة في قراراتي واختياراتي، وأنا اختارات إن الراجل مايبقاش جزء من أحلامي وطموحاتي، وكنت أتمنى لو أمي كانت علمتني إن ده مش عيب فيا.
