حوار : ريم جميل
يسرا اللوزى هى الفنانة اللى أى حد يفخر إنها كانت قاعدة جنبة فى الفصل زمان أو شافها فى الشارع ووافقت تتصور معاك من غير مكياج. هى بسيطة وطبيعية وده مش كليشيه ده حقيقي جدا. بسيطة في أفكارها، لبسها، شكلها وتخليك تحس إنكوا صحاب خلاص وانتوا لسه متقابلين من ٥ دقايق بس، وعشان كده، مافيش حد ينفع مايحبش يسرا اللوزى.
إزاى بتقدرى تحافظى على إنك تظهرى بشكل طبيعى معظم الوقت ؟
أنا شخص عملى، معنديش وقت ولا طاقة أفكر هالبس إيه وإزاى وإمتى، ودى بعتبرها حاجة حلوة علشان بتعبر عن طبيعتى وإنى مش بحاول ابقى زى بقيت الناس، بس فى نفس الوقت فى شغلتنا ومع تطور السوشيال ميديا وإعتماد الناس على الصور بقيت حاسة إنى متأخرة، فا بقيت بحاول مؤخراً آجارى ده علشان حسابات السوق والشكل العام بس مجرد محاوله .
تفتكرى هييجى يوم الست تكون مكان الراجل زى ما شوفنا فى فيلم “هاتولى راجل” ؟
أعتقد إن دى حاجة خيالية، فى سطو للرجالة وإحساس إن من حقهم يتحكموا فى الستات حواليهم وانهم اصحاب القرارت الكبرى، ودى حاجة موجودة فى كل ثقافات وبلاد العالم، وموجودة من أول التاريخ فمعتقدش إنها هتتغير.
السوشيال ميديا فادتك ولا ضرتك كممثلة ؟
طبعا السوشيال ميديا مهمة، بس أنا عندى مشكلة معاها بشكل عام إنها إبتدت تعمل مشاكل نفسية، الناس دايما بتحاول تصدر فكرة إن كلهم مبسوطين وشكلهم حلو طول الوقت، وبيتصورا صور مخصوص للسوشيال ميديا علشان الناس التانية هتشوفهم إزاى، فى حين إن محدش بيبين الواقع ، فبالتالى لو إنتى قاعدة فى البيت عادى هتحسى إنك لازم تعملى زى الناس دى، وتبينى قد إيه إنتى مبسوطة وسعيدة، الناس بتحاول تورى صورة مش حقيقة عن نفسها، وده ممكن يسبب مشاكل نفسيه لحد مش مدرك اللى ورا الكواليس، علشان كده بحاول انزل صور طبيعية علشان اعمل توازن، إحنا كلنا بشر بنتعب وبنكتئب وبنتدايق.
إزاى بتحاولى تمكنى بنتك؟
بشتغل معاها على مواقف زى الخوف من حاجات معينه. بحاول احكي لها قصص يبقى العبرة من وراها إنها متبقاش أنثى ضعيفة مستنية الأمير اللى ييجى على الحصان يسعدها، أحد أسباب الطلاق من وجهة نظرى هى الأفلام اللى بنشوفها وإحنا صغيرين لإنها بترسم صوره عن اللى المفروض يحصل لما تقابلى شريك حياتك وكإن الحياة هيبقى لونها بمبى، وإن الغرض من الحياة كلها إننا نتجوز وبس، بس محدش بيبين اللى بيحصل من أول النقطة دى، فبقيت حاسه ان الاطفال عندهم صورة عن الجواز طالعة من أفلام الكرتون، ولما ده مش بيحصل مبيكملوش، وعشان كده بوريها حاجة مختلفة أقرب للواقع.
إيه الفرق بين تربيتك وإنتى صغيرة وتربيتك لبنتك دلوقتى ؟
أنا حاسه إن فى حاجات ثابتة مش بتتغير، أنا كنت بلعب كورة وأنا صغيرة و كانت ساعتها حاجة للولاد بس، دلوقتى بقى فى مثلا دورة رمضانية للبنات بس، بس برضه فى حاجات ليها علاقة ب”إنتى بنوته”، فبحاول اخلق توازن معاها بين الأتنين، يعنى ممكن يكون عندها عروسة بس برضة تلعب بالعربيات، وبتهيألى التفكير ده اتغير عند أهالى كتير دلوقتى.
شايفه إيه اللى انتى محتجاه عشان تقدرى تحسى بسلام داخلى ؟
لازم ابطل احاول ارضى كل الناس، واتعلم اقول لا مش هاقدر أعمل ده أو معنديش طاقة أعمل ده، أو ماليش نفس أعمل ده ، أنا بعمل كل حاجة لكل الناس فدايما أنا اللى ببقى مستهلكة.
إيه اللى حاولتى تغيريه فى شخصيتك ومش عارفه خالص؟
إنى يبقى عندى ثقة فى نفسى اكتر بعيد عن التمثيل واقدَر نفسى كفايه.
بتحضرى لإيه خلال الفترة اللى جاية؟
بحضر لمسلسلين فى رمضان 2019، اول مسلسل “كلبش 3″، وتانى مسلسل “قمر هادى”.
الستات عايزين إيه ؟
الستات عليهم عبىء فى البيت بشكل عام سواء بيشتغلوا أو لأ، لانهم لازم يركزوا فى كل التفاصيل حتى لو الزوج بيساعد وبيلعب دوره كزوج أو كأب، فى حاجات مهما كانت الست حواليها ناس بتساعدها، فى الآخر الست هى اللى لازم تفكر فيها، الستات محتاجين راحة البال اللى عند الرجالة، إنهم يقعدوا على الكنبه وميفكروش فى حاجة، الراجل عنده القدرة انه يفصل مهما كانت مسئولياته.
