رائدة في العلاقات العامة، طباخة محترفة، ومجنونة أكل.
نيّرة عندها نصائح كتير تقدمها للتجهيز لشهر رمضان الكريم.
المقال ده هايساعدكوا تعرفوا إزاي تقضوا رمضان صح من كل النواحي، وتطلعوا منه مبسوطين مش مرهقين، مع جميلتنا، صاحبتنا صفحتنا المفضلة على إنستاجرام @taste_and_tell_p
إيه نصيحتك للناس اللي بيطبخوا لنفسهم لأول مرة في رمضان؟
ابحثوا في جوجل عن وصفات سهلة وسريعة، بعد عن المطبخ المصري لإنه هايبقى صعب جداً يبدأوا بيه خصوصا في رمضان.
عندك أكلة معينة بتحبي تاكليها في رمضان بس؟ لو عندك إيه هي؟
بحب جداً الرز بالخلطة، بس زهقت منه على آخر رمضان، فبدأت أعمل شعرية بالخلطة. بحس إنها أخف، وكمان بعملها بالزبيب والمكسرات، واللحمة المفرومة، وكبدة الفراخ.
بيقولوا ماتفطروش برّا أبداً في رمضان، هل دي نصيحة في محلها؟ ولو لأ تنصحي الناس يفكروا ازاي وهما بيختاروا مكان الفطار؟
أنا شخصياً مش بفضل الفطار برّا في رمضان لإن الخدمة بتبقى سيئة جداً، طاقم العمل مابيقدرش يقدم خدمة لكل الناس في نفس الوقت، فأكيد هايكون في تأخير، ده غير إن اللي شغالين دول بيكونو صايمين برضه، فأكيد تعبانين جداً، زائد إنك بعد الفطار بتبقى عايز تريّح في بيتك أو في بيت حد قرب منك.
إيه الأماكن اللي بتحبي تتسحري فيها؟
بحب خيمة الداون تاون، وخان الخليلي كمان. بحب السحورالتقليدي، وطبعاً بحب اتسحر في البيت.
عندك طبق مخصص لرمضان؟ لو آه، إيه هو؟
بحب الرز بالخلطة، بس ساعات بزهق منه، فبحب أعمل شعرية بالخلطة. بحس إنها أخف. بعملها بالزبيب والمكسرات، ولحمة مفرومة أو فراخ أو كبدة.
إيه أسهل تحلية ممكن تتعمل في رمضان لما يكون مفيش وقت؟
أم علي والقطايف، الإتنين مابياخدوش وقت خالص.
إيه مكونات الأكل اللي لازم تبقى موجودة دائماً في الثلاجة خصوصاً في رمضان؟
زبادي، سمبوسك، وجبنة علشان السمبوسك!
