نورا شوقي- عالمة آثار: “ناشونال جيوجرافيك أدوني الثقة في الوقت اللي كانوا فيه في مصر شايفين اني لسة صغيرة وناقصني الخبرة”

التاريخ، لأول مرة تقرأ الكلمة دي هييجي في دماغك كلمات و صور كتير، تاريخ ميلاد شخص عزيز عليك، تاريخ النهارده، أو حضارة و آثار عمرها آلاف السنين بدايتها في مصر، اللي قدرت تقدم أعظم مثال للبشرية في التقدم في كافة المجالات من آلاف السنين. و بمرور الأيام و السنين، حاول كتير انهم يلاقوا مظاهر الحضارة العظيمة دي عشان يسجلوا بيها انجازات لايمكن تتكرر. نور شوقي هي عالمة آثار مصرية بدأ شغفها بالآثار من سن صغير و عرفت توصل بحلمها لحاجات ناس كتير اكبر معرفوش يوصلولها.

امتي بدأ شغفك بالآثار؟

شغفي بالآثار ابتدى من سن صغير من وقت المدرسة، ماكانش قدامي حاجة اعملها وقتها غير اني اقرا كتير في التاريخ و الأثار. بس البداية الحقيقة كانت و أنا في الجامعة و بعدها لما بدأت أروح عمليات التنقيب على الآثار.

ايه الحاجة اللي دايمًا بتشجعك انك تحققي أكتر في شغلك؟

الحاجة اللي دايمًا بتشجعني اني مش دايمًا الوقت في ايدي عشان اكتشف مقبرة أو معبد، لإن الأماكن دي كتير منها موجود في الدلتا و بيبقي حواليها عشوائيات و ناس ساكنين هناك، وفي أماكن كتير بيبقي في ناس ساكنين فوق المواقع.

ازاي ابتدت رحلتك مع ناشيونال جيوجرافيك؟

اخدت منح كتير قبل منحة ناشونال جيوجرافيك، بس بصراحة مكنتش متوقعة اني هاخد المنحة دي لإني كنت مقدمة اني اكون مشرفة ومديرة علي موقع أثري و ده كان جزء من دراستي للماجستير، بعدها ب 9 شهور ردوا عليا اني اقدر ابدأ في الموقع.

ايه قصة آخر تمثال لاقيتيه؟

آخر قصة كانت قبل كورونا، كنت في السودان في موقع أثري مصري ولاقينا مقبرة. كان فيها هيكلين عظميين لستات من الصفوة على سرير. ده كان بالنسبة لي حاجة مختلفة لان كان الطبيعي في الدولة الحديثة انهم بيكفنوهم و يلفوهم في المقبرة فدي كانت حاجة مختلفة.

 

في كل عصور مصر الفرعونية شايفه مين اكتر السيدات المؤثرات؟

حتشبسوت بالنسبة لي كانت من أكثر السيدات المؤثرات باعتبارها كانت من أهم القادة. و كمان الملكة تي أم الملك أخناتون و كان ليها تأثير كبير جدًا كسيدة بتحكم في الوقت ده.

ايه الفرق من وجهة نظرك بين دراسة الآثار في مصر و انجلترا؟

الموضوع مختلف من كل النواحي، يعني في إيجابيات وسلبيات للأتنين. إنجلترا طبعًا النظام التعليمي أحسن من مصر خصوصًا كمان انهم بيقدروا جدًا الحضارة المصرية و الآثار. لكن الجانب الإيجابي في مصر انك عندك حرية تشوفي كل حاجة على أرض الواقع،

ممكن تعملي زيارات لمتاحف، وكل رحلات التنقيب عن الآثار.

ايه أصعب مشكلة واجهتيها في عملية التنقيب عن الآثار ؟

الجو، آخر حاجة واجهتها كنا في مقبرة و سقف المقبرة وقع علينا، و دي حاجات بتحصل كتير بسبب عواصف ترابية و بتبقي حاجات غير متوقعة و أكيد بتبقي خطر خصوصا لو انتي 4 متر تحت الأرض.

 

ايه أكبر التحديات اللي بتحاولي تواجهيها في الفترة دي؟

أكبر تحدياتي مع وزارة الأثار انها بتسمح بس للمفتشين و العاملين بالوزارة انهم يكون ليهم فرصة انهم يبقى ليهم الموقع بتاعهم و يستكشفوا، و مش بيدوا نفس الحقوق دي للدارسين أو علماء الآثار المستقلين، و بسبب قوانين قديمة دايمًا الاقتناع بيكون ان الناس الأكبر في السن هي الأكفأ و ده مش صح.

ايه أكتر المحطات المهمة في رحلتك؟

أهم محطة بالنسبالي كانت شغلي مع ناشونال جيوجرافيك لانهم أعطوني الثقة و انا عندي 25 سنة في الوقت اللي كانوا في مصر بيقولولي اني صغيرة و أكيد ناقصني خبرة و وقت. و بعتبر كل عملية تنقيب هي محطة مهمة في حياتي.

No Comments Yet

Leave a Reply

Your email address will not be published.