من زوجة وزوج لشركاء، ازاي تبقوا شركاء لبعض بجد في 6 خطوات سهلة!

الجواز شراكة، وزي اي شراكة ممكن تكون كويسة وصحية وناجحة، او طبعاً ممكن تكون العكس، الشراكة بتتبني ما بين اتنين اجتمعوا على هدف واحد، في الجواز الهدف ده بيكون انهم يبنوا أسرة ويشاركوا بعض حياتهم، في نقطة ما في الطريق الناس بتبعد عن بعض، مع ان هدفنا واحد لكن الطرق اللي بناخدها للوصول للهدف ده ممكن تختلف، وده ببساطة بسبب سوء التفاهم أو تعارض في قيمنا.

تخيل طرف بيقدر الشفافية وطرف بيقدر الاهتمام بالمشاعر، لما بيتحطوا في موقف الواحد فيه المفروض يعبر عن غضبه، الطرف اللي بيقدر الاهتمام بالمشاعر هيتجنب انه يكون قاسي عن طريق انه يلعب بالكلام، والطرف اللي بيقدر الشفافية والصدق هيتجنب تجميل الكلام وهيقول كل حاجة زي ما هي، النتيجة أن الطرفين هيتجرحوا، الطرف اللي بيقدر الاهتمام هيشوف شفافية الطرف التاني على انها قسوة، والطرف اللي بيقدر الشفافية هيشوف ان طريقة الطرف التاني متلاعبة.

الثقة جزء اساسي في اي علاقة ناجحة،  وجزء حاسم في الجواز، ده يستلزم انك تثق ان شريكك هيكون معاك لما تحتاجه، تثق فيه انه هيختار الاختيارات الصح عشان اسرتكم، لما تثق في شريكك هتقدر تتقبل اللي الخبراء جوتمان وجوتمان وصفوه ب: تأثيره عليك.

بالرغم من اننا شخصين مستقلين بيشاركوا بعض حياة واحدة وهدف واحد، احنا مازلنا عندنا احلام مستقلة واختلافات، الأحلام دي هي اللي بتدي لحياتنا معنى، كشريكة في الجواز ده نجاح عيلتي مرتبط بشكل مباشر بنجاح شريكي، وكمان جزء من اختلافاتنا هو قدراتنا المختلفة، فإحترامنا لإختلافاتنا معناه اننا هنستغل قوانا المختلفة، وده بيؤدي لشراكة أقوى، في الشراكة مافيش طرف عنده القدرة انه يعمل كل حاجة، وعشان كدة مجهودنا المشترك بقوانا الخاصة هيبقى حاجة تفكرنا بأننا بنكمل بعض مش بننافس بعض.

فعشان تحولوا جوازكم لشراكة ناجحة تعيش سنين، انتوا محتاجين تعملوا الآتي:

  1. حددوا هدف الجواز.
  2. اشتغلوا على التواصل الإيجابي.
  3. اعرفوا وافهموا قيم بعض.
  4. ابنوا الثقة ما بينكم وتقبلوا تأثيركم على بعض.
  5. ادعموا احلام بعض.
  6. احترموا اختلافات بعض واعرفوا ان اختلاف الرأي لا يفسد للود قضية.

واخيراً وليس آخراً، لما تلاقوا حاجة تعملوها مع بعض ده هيحول جوازكم لصداقة ودي احسن اشكال الشراكة.

 

رشا سلامة مستشارة علاقات حاصلة على بكالوريوس في علم النفس وماجستير في علم النفس الإرشادي من الجامعة الأمريكية في القاهرة، رشا كان دايماً عندها شغف بالسفر وبتحب المغامرات، في 2017 أسست The RE اول خدمة سفر للأزواج في الشرق الأوسط بهدف مساعدة الناس اللي في علاقة انهم يحسنوا علاقتهم.

No Comments Yet

Leave a Reply

Your email address will not be published.