احنا كبنات بنهتم بالتفاصيل ونفتكر حاجات صغيرة بالذات التواريخ واللي ممكن ماتفرقش قوي مع الرجالة. لو انتوا الاتنين عشتوا قصة حب مؤثرة جدًا ومن النوع الحساس، غالبًا هتبقي انتي فاكرة تواريخ كتير هي بالنسبة له أصلًا مش موجودة. عشان احنا كتير، جمعنا كل التواريخ اللي ممكن تبقي انتي فاكرة أحداثها كويس جدًا وهو مش مستوعب إنه عاشها في الأساس.
أول يوم اتعرفتوا فيه على بعض
غالبًا انتي هتبقي فاكرة اليوم اللي شفتيه فيه أول مرة وكان لابس إيه وانتي كنتي رايحة المكان ده ليه واتعرفتوا إزاي وقد إيه كنتي حاساه رخم بس بعد كدة استلطفتيه. مش حابين نصدمك، بس في الغالب هو مش هيبقى فاكر كل التفاصيل دي، ولا نصها والاحتمال الأكبر هو إنه مش هيبقى عارف تاريخ اليوم ده.
أول يوم خرجتوا فيه لوحدكوا
أو زي ما بيقولوا عليه، The first date. اليوم ده اللي خرجتوا فيه مع بعض وانتي في الغالب رجعتي قعدتي تحكي لصاحبتك كل حاجة حصلت في اليوم وقعدتوا تحللوا في شخصيته. اليوم ده هو كمان اتبسط فيه…إن شاء الله يعني، بس مش معناه خالص إنه يبقى فاكر التاريخ ده ولو حصل وكان فاكره، مش لازم يحتفل بيه معاكي كل سنة.
يوم الاعتراف
مع إنها مش قاعدة، بس غالبًا الولد هو اللي بيبدأ بالاعتراف بمشاعره وبالتالي اليوم اللي هو قالك فيه إنه بيحبك بيبقى يوم مهم ومؤثر وحاجات حلوة كتير كدة. بس احنا محتاجين نفتكر حاجة مهمة، هو غالبًا قال “بحبك” لبنات أكتر ما أكل ملوخية مثلًا فمش هيركز قوي هو قالهالك يوم إيه.
يوم الارتباط
لو بعد ما قالك بحبك خدتي وقت عشان تفكري، أو بعدتي، أو قلتيله انك مش بتفكري في الموضوع دلوقتي، يبقى اليوم اللي اتصاحبتوا فيه ده يوم مختلف تمامًا بس ده سهل. هتلاقيكوا انتوا الاتنين فاكرينه وبتحتفلوا بيه تحت مسمى الأنيفرساري. هو طبعًا بيحبك وبيحب اليوم ده جدًا، بس هو مش فاكره عشان كدة خالص. هو في الغالب فاكره من كتر مانتي بتكرري التاريخ قدامه كتير فمش مدياله فرصة قوي ينساه.
يوم ما حكيتي لأهلك عنه
هو يوم طبيعي جدًا حتى ممكن يبقى اتنين أو أربع عادي، فبالنسبة له اليوم ده مش موجود أصلًا بس احنا بالنسبة لنا ده يوم كبير وعشان كدة بنفتكر تفاصيله.
أول خناقة
كان بالنسبة لك انتوا فركشتوا ومش هترجعوا لبعض عمركوا وجريتي عملتي بلاي ليست حماقي وتامر عاشور بس هو بالنسبة له إن الخناقات كتير والنكد على طول فمش فارقة أول خناقة قوي. احتمال يبقى فاكر الخناقة دي كويس في حالة واحدة وهي لو نكدتي عليه بعد خروجة حلوة مع صحابه أو ماتش الأهلي كان كسبان فيه.
المناسبات العادية
يوم ما قابل باباكي ويوم قراية الفاتحة والخطوبة وكتب الكتاب والفرح وشهر العسل دي كلها بديهيات، لازم تفتكروها سوا وتحتفلوا بيها. هو اه هيسقط حاجات منها وهيتلخبط بين اتنين منهم عادي، بس بما إن ناس كتير حضروا الحاجات دي فاحتمال إنهم يفكروه ويبقى الموضوع ألطف.
