يا ترى إيه الفيروس اللى بيصيب الراجل بعد الجواز ويخلى الأداء بتاعهم بسرعة السلحفة؟ يعنى الشاب من دول فى بداية علاقتك بيه لو دخلتى تحت البطانية بليل وإخنّفيتى كأنك بتكلمى أسامة منير فى عز البرد وقولتيله “نفسى فى مكدونالدز” هتلاقيه نازل بالفانلة يجبلك اتنين بيج ماك كومبو وواحد بيج تيستى عشان متخليش فى نفسك حاجة.
ولا لما كنتى تعرفى شاب من سكان زايد وإنتى فى مصرالجديدة ويجيلك المشوار وهو مبسوط ويقولك ده ألذ مشوار بسوقه ده أنا مش بحس بالوقت، أنا بحب الكبارى والشوارع والمحاور.
“النفسية محتاجة إسكندرية”
طب فاكرة لما كان عندك قراية فاتحة صاحبتك أم دم تقيل اللى مش بتحبيها بس كنتي لازم تروحى وكنتى عايزة تجيبى فستان يغّطى على فساتين مهرجان الجونة؟ مش جه معاكى ولفيته كل المولات والمحلات والبوتيكات وأكاونتات إنستاجرام لحد ما لاقيتى فستان الأحلام اللى هيخليكى ملكة جمال رأس البر؟
أكيد مش ناسية لما قلتيله إنك نفسك فى فطيرة بالسدق وجيلاتى عزة وطلعتوا على اسكندرية صد رد فى نفس اليوم. وقعدتى على البحر وشميتى هوا البحرالأحمر وقعد يغنيلك “النفسية محتاجة إسكندرية”
تتجوزيه بقى!!
بس لقد وقعتى فى الفخ! يدخل من الشغل يسّلم على التلاجة قبل ما يسلم عليكى ويسأل على الغدا قبل ما يسأل عليكى. وياكل وهو عينه فى موبايله ويخلص أكل ويقوم يشرب سيجارته وإنتى لسة قاعدة بتاكلى ويقعد على الكنبة.
ويفضل على الكنبة
والعيال تروح تمارين وترجع وهو على الكنبة
وإنتى تعملى اللنش بوكس بتاع تانى يوم وهو على الكنبة
تنشرى الغسيل وهو على الكنبة
تلمى المطبخ وهو على الكنبة
بعدين تروحى تفّكريه يا جاحدة إنه يغّيرلك لمبة الحمام اللى محروقة من أسبوعين….
شوفوا، مهو إنتو يا ستات مفتريين بأمانة يعنى الراجل هيشتغل ويغّير لمبات؟ إنتى مدركة كم المجهود المبذول فى عملية تغيير اللمبة؟ طيب المخاطر المصاحبة للموضوع، مش خايفة على الراجل؟
هتقوليلى منا بشتغل وبسوق زيى زيه وبروح وآجى وكمان شايلة البيت والعيال فوق راسى. هقولك شغلك رفاهية يعنى تسيبيه أى وقت! حتى لو عندك أقساط أو بتساعدى أهلك أو لا قّدر الله عندك أحلام، أو لا سمح الله طموح إنك تكبرى وتترقى وتنجحى إنتى شغلك رفاهية! بتروحى الشغل الناس تطبطب عليكى. مديرك بيقولك روّحى الساعة اتنين الضهر، بتلاقى ركنة لعربيتك فى درج مكتبك. سيبى الشغل عشان طالعلك فسفوسة فى مناخريك ولو لا قّدر الله شركة جوزك إستغنت عنه يبقى مفيش أى فلوس داخلة البيت. رفاهية يا بنتى!
اللى يضّحك إن الراجل شايف إن مراته طلباتها كتير لكن هو لو فى مشاركة هى أصلا مش هتحتاج تطلب لأنه هيبقى عارف دوره إيه زى ما هو عارف كويس دورها إيه وخصوصا إن تقسيمة الأدوار دى عادةً مفيش حد بيدى الست فيها مساحة لإختيار الدور اللى على مزاجها. هى بتشيل الجمل بما حمل وبينتهى بيها الأمر إنها تغّير لمبة الحمام عشان جوزها زهق من الزن!
الحل…
الحل فى المواضيع دى إنك تعرفى إنك تقدرى تعملى كل حاجة بنفسك بس إنتى اللى بتختارى بكامل حريتك إنك تعتمدى على شريكك فى بعض الأمور. لما تشيلى من قلبك عبء إنك متضايقة أو متعّصبة من تأخير تنفيذ الطلب، الموضوع هيبقى ألطف بكتير ومش هتحسى إنك متضايقة بالشكل اللى إنتى متّخيلاه. هزرى فى الموضوع وخدى الأمور ببساطة. زى ما الرجالة بيتريقوا إننا مبنعرفش نسوق إحنا كمان ممكن نتريق ونهّزر إنهم مش بيعملوا الحاجة اللى وراهم!
أنا ريجينا عنانى لايف كوتش وبركز أكتر على مواضيع اللايف ستايل والكاريير.
أنا من HR الطيبيين وإشتغلت في شركات مختلفة جوّة وبرة مصر. عندي إدمان للكتب وشرب القهوة! أنا بحب أقدم محتوى مختلف مبنى على خبرتي.
إيه أكتر حاجة نفسي فيها؟ نفسي أشوف ستات اكتر فى مناصب مؤثرة وعندهم فرص لامتناهية في النمو والنجاح.
