مدربة اليوجا نيرين مسعود هاتقولنا كل حاجة عن روتينها في رمضان، وهاتدينا نصائح علشان نحافظ على نظام صحي من غير لخبطة في شهر رمضان.
إيه أنسب وقت للتمرين في رمضان؟
آخر كام ساعة قبل الفطار أحسن وقت بالنسبالي، ومهمين جداً، فالتمرين قبل الفطار بساعة بيناسبني أنا جداً. بس جزء مهم من ممارسة اليوجا هو إنك تسمع جسمك، ده المطلوب من كل اللي بنعمله. فلو التمرين في الوقت حسيت إنه كويس بالنسبالك استمر عليه، لو حسيت إن في حاجة غلط، وقفه.
إيه أحسن تدريبات ممكن تتعمل في رمضان؟
ده بيعتمد على تدريباتك في العادي عاملة إزاي. جسمك بيحتاج يتأقلم على الصيام، فالأفضل إنك تبدأ بحاجة مش مجهدة أوي.
إيه نصائحك علشان الجسم يفضل محتفظ بالمياه في رمضان؟
ده سؤال صعب! المفروض إن الجسم بيستهلك من 2-3 لتر مياه في اليوم فأنا دائماً بملى إزازة لتر ونص مياه وبحاول أخلصها قبل ما أنام. وكمان بتجنب الأكل المالح خصوصاً بالليل.
إيه روتينك في الأكل في رمضان؟
بكسر صيامي بتمر وقهوة عربي. وبعدين ببدأ بالشوربة، وببدأ آكل كميات صغيرة من البروتين والخضار. قبل ما أحلي بالحلويات الرمضانية، بتأكد إن إزازة المياه بتاعتي مليانة وكلت فاكهة. أنا عادةً مابتسحرش علشان مابعرفش أصحى بالليل، فبشرب رايب أو باكل شوفان بالزبادي والفاكهة.
