ترجمة: تسنيم عبدلله
في 2016 حصل حدث أثبت إن الستات في العالم العربي يقدروا يعملوا كل حاجة، انطلاق أول دوري نسائي لكرة القدم الأمريكية. الدوري تنافس فيه 3 فرق The Pink Warriors, GUC Eagles وCairo Wolves . حبينا نتكلم مع بطلة من أبطال فريق Pink Warriors ماهيتاب أحمد علشان نعرف منها أكتر عن تجربتها العظيمة في الخروج عن المألوف.
ماهيتاب بتحكيلنا “أنا كنت محظوظة جداً إني كنت جزء من الحدث ده، ومؤمنة إنه قدر يكسر حواجز كتير للبنات في مصر لإنه بيسلط الضوء على التفرقة الجنسية في الرياضات. لما أتقبلت في فريقي Pink Warriors ناس كتير كانت مستغرباني ليه اختارت رياضة عنيفة وقالولي إنها ماتتناسبش مع أنوثتي؛ بالنسبالهم البالية هي الرياضة الأمثل للبنت بس الحقيقة إن في العالم كله في رجالة كتير بيرقصوا بالية ومشهورين كمان. وفي برضه بطلات ستات في العالم في رياضات مختلفة زي الكاراتيه، والكونج فو. فـ مين اللي يقدر يحط حدود للراجل أو الست يلعب أو مايلعبش أي رياضة؟”
لما سألنا ماهيتاب إيه اللي خلاها تقرر تلعب الرياضة دي قالت: “الحقيقة أنا كنت متحمسة لتحدي جديد في حياتي، الرياضة دي بتختلف عن أي رياضة تانية شبهها لإنها مش بتحتاج لياقة بدنية عالية علشان تلعبيها. في ستات معايا في الفريق متجوزين، وفي أمهات كمان بس مفيش حاجة بتوقفهم. لو عندك شغف هاتكسري الدنيا.”
مع إن في رياضات كتير في مصر، وفي كل رياضة في أبطال متفوقين وبارعين فيها وبيفوزوا بميداليات عالمية إلا إن دايماً مالهمش شهرة ولا ظهور قوي في مصر؛ دايماً الأنظار كلها موجهة لكرة القدم بشكل خاص وللعيبة كرة القدم. سألنا ماهيتاب عن رأيها قالت: “كل لاعب أي رياضة في مصر عارف إنه عمره ما هايبقى حديث الناس والساعة زي لعيب كورة القدم. معروف إن المصريين من زمان الزمن مابيهتموش بأي رياضة غيرها. وده بيحبط لاعبين سكتير في رياضات مختلفة. لكن أنا مؤمنة إن إحنا كل ما هانحقق نجاحات ونفوز بجوايز أكتر الناس هاتاخد بالها مننا وكل الرياضات هاتلاقي التقدير والإهتمام اللي تستحقه مش بس كرة القدم.”
“إحنا عايشين في مجتمع قاسي دايماً منحاز للراجل، بيضطهد الست، وبيفرّق بينها وبين الراجل في حاجات كتير. ومن خبرتي أنا بقيت مؤمنة إن ممارسة أي رياضة هايساعدك تتخلصي من أي طاقة سلبية حاسة بيها؛ كرة القدم الأمريكية بالنسبالي مش بس علاج من الضغوط اللي حواليا لكن كمان هي شغفي.”
ماهيتاب أحمد وفريقها مثال عظيم على إن الستات مش بس يقدروا يعملوا كل حاجة، لكن كمان يقدروا يتفوقوا ويلمعوا في أي حاجة يقرروا يعملوها.
