قطر الجواز
“عقبال ما نفرح بيكي”
طب ما تفرحوا عامة يا طنط باكينام هي ليه فرحتكم متوقفة عليا؟
“عقبال ما نجيلك في بيتك السنة الجاية”
ما أنا فى بيتي أنا مش بايتة عند الجيران
والتقيلة بقى لما حد يقولي: “عقبال ما تفرحي ببنتك وهي عروسة!”
هل مسموح لي أفرح ببنتي عامةً ولا لازم أستنى أما تبقى عروسة عشان أفرح؟ أصل أنا بيختلط عليا الأمرعشان مش معايا كتالوج المرأة المصرية نسخة ٢٠٢١.
هنسيب كل الكلام ده بقى ونتكلم شوية عن كلمة “عانس”. وعن فكرة إن فيه أمهات كتير بتقول بنتي تبقى “مطلقة” أحسن ما تبقى عانس وأهو تبقى جربت حظها فى الجواز ويمكن تطلع بطفل يسليها!
أولا، لو بنتك بتتجوز وكلمة “مطلقة” في المعادلة من أولها يبقى بلاش منه والنبي. ياريت الأم الي متناسية الضرر النفسي اللي وارد جدًا تتحمله البنت لمجرد إنها يبقى مافتهاش قطر الجواز تفكر تاني.
القطر الأهم من قطر الجواز هو قطر السعادة، قطر النجاح، قطرالصحة النفسية والعقلية، إشمعنى دول ملهمش قطر؟
نسبة الإناث فى مصر ٤٨%
نسبة الإناث المقيدة فى التعليم العالى ٤٨%
نسبة الوزراء السيدات ٢٤%
نسبة مساهمة المرأة في قوة العمل ١٤%
عارفين النسب دى معناها إيه؟ معناها إن بينما نسبة الإناث في المجتمع تقريبًا نفس نسبة الذكور فبالتالي وهم احتمالية انقراض البشر وانحسار فرص الزواج ده مش موجود. لا داعى للذعر يا سادة. هتقولولي مش كل الذكور عندهم إمكانيات الجواز هقولكم إن النسبة الأكبر من الشباب اللي في سن الجواز من الجنسين غير مؤهلين للجواز أصلًا فماينفعش يبقى الكل بيجري ورا سراب!
قطر الحياة
لو بصينا على نسب التعليم ولقينا إن الإناث أخدوا نفس فرص الرجل فى التعليم لكن ربع فُرصه فى الوزارة وأقل من الربع فى فرص العمل يبقى لنا هنا وقفة! عنوسة إيه اللى بنتكلم عليها؟ الست اللي راضية بنتها تتطلق بس تطلع بطفل هتصرف على الطفل ده منين؟ هتبل شهادة الجامعة وتعمل منها شوربة؟
اللى هيقروا مقالتي دول فى الغالب مش جيل الأهل ولو إني أتمنى إن أي واحدة شابة صغيرة تقرا المقالة دي وتتأثر بيها تشارك أهلها وتقراها معاهم. عشان عارفين إيه الي مخلي نسبة تعليم المرأة عالية لكن نسبة المرأة فى سوق العمل قليلة؟ الجواز فى السن المبكر! أنا لا أنادي بالعزوبة ولا الزهد. لكن في عربات أخرى في القطار تستحق إن المرأة يكون ليها نسبة قوية فيها وتمثيل مجتمعى حقيقي قبل قطر الجواز.
أتمنى إني أشوف ٥٠% من المرأة في سوق العمل
٥٠% من المرأة فى الوزارة
١٠٠% من السيدات ناجحات
أنا ريجينا عنانى لايف كوتش وبركز أكتر على
مواضيع اللايف ستايل والكاريير.أنا من HR الطيبيين وإشتغلت في شركات مختلفة جوّة وبرة مصر. عندي إدمان للكتب وشرب القهوة! أنا بحب أقدم محتوى مختلف مبنى على خبرتي. إيه أكتر حاجة نفسي فيها؟ نفسي أشوف ستات اكتر فى مناصب مؤثرة وعندهم فرص لامتناهية في النمو والنجاح.
