في أخر أيام السنة…شوية إيفنتات مينفعش تفوتها

فاضل أيام بسيطة والسنة تخلص وقبل ما نستعد لاحتفال رأس السنة واستقبال 2020 والعشرينات عامةً، محتاجين نودع 2019 بطريقة مختلفة ونستمتع بأخر أيام فيها. عشان كدة جمعنا لكم مجموعة من الحفلات والإيفنتات اللي هتحصل خلال الأيام الجاية عشان متفوتوش أي حاجة منهم!

19 ديسمبر: هاني مصطفى في ساقية الصاوي

في قاعة الحكمة الساعة 8 مساءً، هاني هيغني أغانيه الأصلية بصوته المميز اللي هيخلي أي حد يودع السنة بطاقة فنية جميلة. أدم عوض هيشارك هاني على الجيتار، فيليب أنور على الكيبورد، أمير غالي على الباز ويوسف القاضي على الدرامز. خلوا أغاني هاني تنقلكوا للسنة الجديدة!

هتلاقوا تفاصيل أكتر هنا

19 ديسمبر: محمد سعيد في ساقية الصاوي

في نفس اليوم وفي قاعة قريبة من نفس المكان، محمد سعيد هيحيي أول حفلة منفردة ليه مع فرقته في قاعة النهر في ساقية الصاوي الساعة 7 مساءً. أغاني سعيد معروفة بلونها المختلف واللي بتكون من  تأليفه، ألحانه، إنتاجه وغنائه. سعيد وعد جمهوره بحفلة مختلفة واللي مش هتحتاج تفوتها لو انت بتحب نوع المزيكا اللي بيقدمها سعيد. 

هتلاقوا تفاصيل أكتر هنا

20 ديسمبر: جولة للكلاب

جمعية HOPE لإنقاذ وإعادة تأهيل الكلاب البلدي هتنظم رحلة لزيارة تلات ملاجئ للحيوانات في المريوطية ومانفتكرش إن في طريقة  تقفل بيها السنة ألطف من اللعب مع حيوانات محتاجة. 

هتلاقوا تفاصيل أكتر هنا

20 ديسمبر: بلاك تيما في درب 1718

استعدوا يوم الجمعة الساعة 7 بالليل عشان ترقصوا على نغمات بلاك تيما والاحتفال بالسنة الجديدة في حفلة بطعم مختلف مع مزيكا بلاك تيما المميزة. 

هتلاقوا تفاصيل أكتر هنا

20 ديسمبر: بُلغة في عيش وملح

لو مهتمين بمنتجات بُلغة يبقى لازم تعدّوا على عيش وملح! يوم مليان بمنتجات كتير أنيقة من بلغة و أكلات لذيذة من عيش وملح يوم الجمعة اللي جاي من الساعة 12 الضهر. 

تفاصيل أكتر موجودة هنا 

يوم 20 و 21 ديسمبر: رحلة القاهرة النيلية 

كلنا محتاجين نعمل حاجة جديدة تخلينا نصفي دماغنا وكمان نحرك عضلاتنا فيها وده اللي بيقدمه نايل كاياك في رحلات نيلية والمرة دي هتبقى حوالين منطقة الزمالك. دي فرصة هايلة للتجديف والاستمتاع بالمناظر الطبيعية والهوا النقي! 

هتلاقوا تفاصيل أكتر هنا

20 – 27 ديسمبر: سوق الجمعة في أوسانا

الأسبوع ده في أوسانا، سوق الجمعة مليان أكتر بمنتجات محلية هتساعدك تدخل في موود الكريسماس. المنتجات الموجودة متنوعة من أكل المزرعة الطازة ومخبوزات وخضروات ده غير اللبس والاكسسوارات والهدايا. الإيفنت ده بيتكرر كل جمعة ويبدأ الساعة 11 الصبح لحد 3 العصر في حديقة أوسانا. 

تفاصيل الإيفنت

21 ديسمبر: أوركسترا القاهرة السيمفوني

في ليلة كلاسيكية الأوركسترا هتقدم مقطوعات مختلفة للاحتفال بالكريسماس مع نغمات الكورال.  

تفاصيل الإيفنت

21 ديسمبر: الفرعي في درب 1718

درب 1718 هيستضيف المغني والمؤلف الفلسطيني الفرعي عشان يقدم المزيكا المتميزة بتاعته في القاهرة في ديسمبر وسط جمهوره المصري ودي فرصة ممتازة للي عايز يسمع مزيكا مختلفة ومش بتتكرر كتير. 

تفاصيل الحفلة هنا

21 ديسمبر: الكريسماس في مقار

بمناسبة الكريسماس مقار هتعمل يوم عشان الناس تقضيه وسط المزرعة ووتغدى غدا مختلف بالتعاون مع شيف نبيل جاب الله و شيف نيرمين أمين اللي هيقدموا منيو لذيذ لكل الحضور. 

هتلاقوا تفاصيل أكتر هنا

21 ديسمبر: فيلم وعشاء في محمية وادي دجلة 

الفيلم الرسمي للكريسماس دايمًا هو Home Alone وعشان كدة ده الفيلم اللي هيتعرض يوم السبت 21 ديسمبر وسط مناظر الجبال الطبيعية في محمية وادي دجلة مع عشاء أوبن بوفيه للاحتفال بالكريسماس والشعور بأجوائه. 

تفاصيل اليوم هنا

22 ديسمبر: عرض فيلم الجوكر في مركز التحرير الثقافي، الجامعة الأمريكية

لو افلام الكريسماس والتخييم في أماكن طبيعية مش أكتر حاجة بتشدك، ممكن تتفرج على فيلم من نوع تاني في الجامعة الأمريكية في التحرير وهو فيلم الجوكر اللي كان من أقوى الأفلام في الفترة اللي فاتت وحكي عن منظور مختلف لقصة الشرير والفيلم هيتعرض الساعة 7 بالليل فاتأكدوا انكوا توصلوا بدري!
هتلاقوا تفاصيل أكتر هنا

25 ديسمبر: باليه كسارة البندق في دار الأوبرا المصرية

على موسيقى تشايكوفسكي، فرقة باليه أوبرا القاهرة هتقدم عرض الكريسماس الكلاسيكي اللي هيحسسنا بأجواء الكريسماس. 

هتلاقوا التفاصيل هنا

25 ديسمبر: حفلة الكريسماس مع إلهام مدفعي ودكان

في حفلة مميزة جدًا في كايرو جاز كلوب، الفنان العراقي إلهام مدفعي هيقدم مجموعة من الأغاني العراقية التراثية بس قبل العرض ده هيفتتح اليوم فريق دكان في عرض موسيقي مختلف!
تفاصيل الحفلة هنا

27 ديسمبر: سعاد ماسي في القاهرة

من أحلى الطرق اللي ممكن تستقبل بيها السنة الجديدة هي موسيقى ساحرة وصوت متميز زي سعاد ماسي وده اللي هيحصل في حفلة في مركز المنارة للمؤتمرات الدولية الساعة 8 بالليل يوم الجمعة.  

هتلاقوا تفاصيل أكتر هنا

28 ديسمبر: ستروبري سوينج في ساقية الصاوي

مجموعة من أغاني فرقة كولد بلاي هتلعبها ستروبري سوينج يوم السبت الساعة 7 بالليل عشان تخليك تعيش يوم على أنغام واحدة من أشهر وأهم الفرق العالمية في الفترة الأخيرة وتودع السنة بيوم ميتنسيش! 

تفاصيل اليوم هنا

No Comments Yet

Leave a Reply

Your email address will not be published.