أنا عندى أمل كبير إنك تكون اشتغلت أو هتستلم شغل قريب! أو يمكن تكون هتروح تشتغل في مكان جديد وهتسيب الشركة اللى أنت فيها حاليا. مش هتمنالك حظ سعيد لكن هكلمك فى شوية نصايح ممكن تساعدك فى إنك تكون ناجح في الكوربرت لايف – والنجاح لا يؤدى للسعادة بالضرورة بس أدينا بنحاول!
من المشاكل الكبيرة أو يمكن أكبر المشاكل على الإطلاق فى حياتنا هى التغيير:
الخوف من التغيير – عدم الرغبة فى التغيير – رفض التغيير – صدمة التغيير – محاولة التغيير – الفشل فى محاولات التغيير – إكتئاب ما بعد فشل التغيير!
View this post on Instagram
فى كبسولة تساعدك على التعامل مع التغيير في الكوربرت لايف بس المهم تاخدها وتبّلع بشوية مية من نيلها!
أول حاجة المعضلة!
مين معندوش رعب المكان الجديد؟
إحنا كلنا اتربينا فى ثقافة الكومفرت زون والرغبة في المحافظة على الاستقرار حتى لو كان استقرار سلبى لمجرد إن التغيير مش مضمون!
بس المرة دى أنت غّيرت شغلك ورحت مكان جديد أو اشتغلت لأول مرة…. خايف؟ متوتر؟
حاسس الناس مش هتحبك؟ يمكن مديرك يطلع وغد؟ واللبس اللى الواحد يروح بيه الشركة دى يبقى عامل إزاى؟ طيب لو رحت الساعة تمانية وربع هسمع كلمتين دمهم تقيل ولا هيتخصملي ولا محدش هياخد باله؟
عشان أرد على الأسئلة دى، لابد عن الكوربرت لايف أحكى!
View this post on Instagram
الكبسولة
الملاحظة! تركيزك بقى!
سيبك من كل الأوقات اللى كنت بتسرح فيها فى محاضراتك وأيام ما كانت مامتك تيجى تديك كلمتين على حاجة عملتها وكنت بتشغل موسيقى أمواج البحر فى دماغك وتقلع ودانك ومتسمعش!
رجاء التركيز من فضلك!
أنا هديك كبسولة أه بس لازم تبقى فاهم أنت هتبلع إيه!
المثل الإنجليزى بيقولك إيه؟
err on the side of conservatism
يعنى من الآخر لو مش عارف تعمل إيه، خليك فى الجانب المتحفظ من التعاملات لحسن تقلش منك وتلاقى الناس قفلت منك من أولها!
بالنسبة للمواعيد لازم تيجى فى ميعادك من غير تأخير ولا دقيقة
ويا سلام لو وصلت قبل معاد الشغل بعشر دقايق عشان تفهم مين اللى بييجى بدرى ومين متأخر والسبب لكل ظاهرة من الإتنين!
متستعجلش فى إنك تطلق أحكام عبقرية على أي مجموعة من الموظفين بناءًا على المواعيد اللى بيروحوا فيها الشغل!
يعنى فى شركات مثلا موظفين الحسابات بيروحوا فيها الشغل متأخر أما بيكون عندهم تقفيل عشان بيسهروا كل يوم بليل.
اللبس
بالنسبة للبس بقى تشوف الناس بتلبس إيه ومين اللى بيلبس اللبس ده.
يا ترى الناس اللى فى الإستقبال والمبيعات بس بيلبسوا بدل والباقى بيجامات؟
في حد بيلبس تيشرتات عليها أنجري بيردز ولا صعب؟
إتفرج وخد وقتك فى إنك تبنى حكمك على الشركة.
وإوعى تفتكر إن الملتيناشونال زى بعض! أبسولوتلي! يعنى فى قطاعات ممكن البنات يلبسوا براحتهم جدًا.
وقطاعات متحفظة جدا مفيش فيها حاجة اسمها واحدة لابسة حاجة فوق الركبة ولا ضيقة.
كمان ممكن يكونوا شركتين فى نفس القطاع لكن كل واحدة منهم عاملة لنفسها هوية corporate identity/culture مختلفة تماما واللى يصح فى واحدة يتاخد عليه جواب إنذار فى التانية!
العلاقات
بالنسبة للعلاقات مع الزملاء بقى ودى الحتة الصعبة جدا (كنت فاكر الصعب فات؟ قلبك أبيض!)
ليه أصعب حتة؟ عشان أى تفاعل قائم على إنسان وإنسان آخر يستحيل فيه التنبؤ بالنتيجة!
اللى ممكن فلان يقبله كتهريج ظريف جدا من زميلته البلونداية لو أنت هرجت بنفس الطريقة معاه ممكن يديك وش الكاوتشة المصدية!
أهم أنواع الحرص مطلوبة فى التعامل مع الناس اللى شغال معاهم.
افهم لغتهم وأسلوبهم فى التهريج.
بيخرجوا برا الشغل؟ يعرفوا أهالى بعض؟ الناس اللى من نفس الطبقة منعزلين عن الباقيين ولا كله متعايش مع بعضه؟ بيفتكروا أعياد ميلاد بعض ويحتفلوا؟
الجزء الحساس بقى (متفهمش غلط أرجوك) هو إنك متتحولش لسومة العاشق عشان الناس تحبك! بلاش حركات تشيزى ومجاملات ملهاش لازمة و “ميرسى يا قمر” وهدايا وكيك بالبلح!
آخر نصيحة
نصيحتي النهائية هى إنك متتحولش وتتغير عشان يقبلك الأخرين إلا لو كان التحول ده هيبسطك انت شخصيًا
التغيير مش وحش ولا بعبع بس المهم إنك تكون عارف انت غرضك إيه من التغيير
وتأثيره إيه على شخصيتك وعلى علاقاتك مع الأخرين.
وماله أما حد ييجى يقولك إنك إتغيرت؟
لو انت مبسوط ومبادئك فى الحياة زى ما هي وحاسس إنك بتتقدم عمليًا وشخصيًا وماله!
عادًة مش بحب أجيب سيرتى وأنا بتكلم لكن لازم أعترف إنى كنت شخصية سخيفة جدًا أول ما بدأت أشتغل والشغل والكوربرت لايف علمني التعامل مع الناس والتفتح لتقبل وجهات النظر المختلفة وتقدير مجهود كل الناس.
ولو في حاجة أنا قدرت أعملها يبقى أكيد أي حد ممكن يعملها لأنى مفتكرش إن في أي اختبار عملته وطلع فيه إني فائقة الذكاء! خليك واثق من نفسك ومن قدراتك وتأكد إن أكتر بني آدم ممكن يقف فى طريق نجاحك هو انت!
متقفش فى طريق نفسك وخد التغيير بالحضن!
أنا ريجينا عنانى لايف كوتش وبركز أكتر على مواضيع اللايف ستايل والكاريير.
أنا من HR الطيبيين وإشتغلت في شركات مختلفة جوّة وبرة مصر.
عندي إدمان للكتب وشرب القهوة! أنا بحب أقدم محتوى مختلف مبنى على خبرتي. إيه أكتر حاجة نفسي فيها؟ نفسي أشوف ستات اكتر فى مناصب مؤثرة وعندهم فرص لامتناهية في النمو والنجاح.