يتّكون كومبو الإنترفيو بطبعه من مقّبلات وطبق رئيسي وحاجة تحلي بيها بقك! وكومبو الإنترفيو ده شئ لابد منه لو ناوي تشتغل
وخد بالك كويس إن إسمه كومبو ب B مش ب P عشان بس منخسرش بعض! المقبلات هي مرحلة ما قبل الإنترفيو اللي بتتضمن الإستعداد للإنترفيو.
والطبق الرئيسي واللي هو الإنترفيو نفسه وفيه هنتكلم المرة الجاية عن أنواع الإنترفيوهات (وحشة دي جدا – هو المفروض الجمع يبقى إيه؟)
والجزء الأخير خالص الل يهو الصنف الحلو اللي لو ربنا أذن وبقت الشغلانة من نصيبك يبقى الأوفر
المقبلات
هنتكلم النهاردة عن المقّبلات، يعني الحاجات اللي بتؤدي للإنترفيو.
على إعتبار إن في حد أخد بنصيحتي في العدد اللي فات وعمل سي في إبن حلال.
وعلى إعتبار إنه إتبعت لشركة بنت حلال مش مقضينها وسايط وبيبصوا على السي فيهات اللي بتجيلهم يبقى بإذنك يا ربك كدة بدون مقاطعة
لو عندهم شغلانة تناسب مؤهلاتك هيجيلك تليفون في ساعة ظريفة من ساعات النهار في يوم إبن حلال
ويحصل السيناريو إبن الحلال ده:
– ألو؟
– مساء الخير. أستاذ جعيدي؟
– أيوة يا فندم مين معايا؟
– معال باكينام من الشركة اللي بتشغل الناس منغير واسطة. أنا شفت السي في بتاعك وأحبب أحدد معاك معاد الإنترفيو.
الإنترفيو هيكون يوم كذا الساعة كذا
وإحنا العنوان بتاعنا كذا كذا. المعاد ده مناسب بالنسبالك؟- مناسب جدا. متشكر جدا يا أستاذة شاكيناز.
– مع السلامة
– أنشانتيه!
لنا هنا وقفة!!!! في المكالمة اللي عادًة بتستغرق بالكتير دقيقة ونص دي
في معلومات مهمة ومصيرية لازم تحصل عليها وتتأكد إنك كتبتها قبل ما تقفل الخط. زي إيه؟ خد عندك!
السي في وصل وهما شايفين إنك كفء والحمدلله، لكن المهم هما شايفينك كفء لإيه؟
أنا مرة جتلي مكالمة بعد ما كان بقالي سنتين ونص شغالة في الموارد البشرية عشان في شركة توظيف عايزيني أعمل إنترفيو عشان أشتغل ممثل خدمة عملاء لشركة من شركات المحمول في مصر على إعتبار إنهم عايزين حد فريش وأنا لسة مشتغلتش!!
أصل مبدأ تحديث قاعدة البيانات في الشركات ده مش متعارف عليه أوي ولذلك من المهم إنك تسأل عن الشغلانة اللي رايحلها الإنترفيو قبل ما تقفل.
الإنترفيو مع ميييييين؟
لو وصلت الشركة وإكتشفت إنك نسيت إسم البنت اللي كلمتك خصوصا لو إسمها صعب وأصلا نسيته على ما قفلت معاها، أما توصل طبعا هتحلفلهم ميت أمين إنك عندك إنترفيو مع مرفت يمين؟
إكتب إسم الشخص اللي هيقابلك في ورقة قبل ما تقفل عشان في أغلب الحالات اللي بيكلمك في التليفون مش بيكون هو نفس الشخص اللي هيعملك الإنترفيو.
طب في حالة حدوث ظروف هتمنعك من إنك تروح أو هتتضطرك إنك تتأخر؟ محتاج نمرة تليفون تتصل عليها!
وطبعا قبل ما نستخدم مبدأ الحداقة ونقول إننا هنتصل على النمرة اللي الشركة كلمتنا منها
لازم نحط في دماغنا إن أغلب الشركات بتكون شغالة على نظام إن الرقم اللي بيتصلوا منه ملوش علاقة بالرقم اللي أنت بتشوفه على التليفون.
نظرا لإني أدبي ومعنديش فكرة عن التكنولوجيا هجيب من الآخر وأقولوكو إن العالم أصبح قرية صغيرة
العولمة هتقف في ظريق نجاحك لو مأخدتش نمرة تكلمها وكتبتها!ّ
بعد توافر النقط اللي فاتت ممكن نقول إن ممكن تفكر هتلبس إيه.
أظرف حاجة بقى لو عندك طقم واحد جايبه بتروح بيه أي إنترفيو عشان الموضوع ده بيرّيح ومتبقاش مضطر إنك تدّور وتوجع دماغك.
الشركات في اللبس تلات أنواع ملهمش رابع، أو جايز يكون ليهم رابع وأنا معرفوش.
١. شركات الموظفين فيها بيلبسوا بدل وكرفتات للرجالة والبنات تايورات وقمصان شيفون وجو فيديو كليب أغنية شباب النيل بتاع إعلان ال FGF لو حد فاكره – هو موجود على يوتيوب عامة! إتفرج عليه هتحس إنك مبسوط جدا وتكتشف إن القوى العاملة في مصر كلها مودلز.
ما علينا! أمثلة على هذا القطاع الشركات دي (البنوك، شركات المراجعة (audit) ، شركات التأمين، المبيعات….)
٢. شركات الموظفين بيلبسوا فيها بنطلونات وقمصان بس – لكن مش جينز (بعض شركات البضائع الاستهلاكية (FMCG) ، بعض قطاعات البترول، أغلب شركات تكنولوجيا المعلومات، الخ)
٣. شركات الموظفين بيلبسوا فيها جينز أو أي حاجة تطلع في إيد الموظف الصبح (شركات صغيرة أو أماكن عمل تعتمد على الفن والإبداع)
نصيحتي إنك لو رايح للشركة اللي تبع رقم ١ البس زي رقم ١. لو رايح شركة تبع ٢ أو ٣، إلبس ٢ وخليك في السليم.
لأن حتى لو الموظفين في الشركة بيلبسوا جينز، ممكن يكون اللي بيعملك إنترفيو عايز يشوفك هتيجي لابس إيه.
حّضر نفسك كويس!
لازم تشوف السايت بتاع الشركة وتفهم خدماتها أو منتجاتها إيه.
تعرف هما شغالين في كام بلد وبيركزوا على أنهى قطاعات.
سواء كان اللي بيعملك إنترفيو هيسألك إذا كنت تعرف حاجة عن الشركة أو لأ، ذاكر برضو.
مش من المنطقي إنك تكون بعت السي في بتاعك لشركة متعرفش عنها حاجة وكمان أما كلموك عشان تعمل إنترفيو محستش إنك عايز تعرف دي شركة إيه.
من المهم برضو إنك تعرف مكان الشركة وتبقى فاهم المشوار من بيتك أو من النقطة اللي هتروح منها لحد هناك هتاخد قد إيه وقت.
لو مثلا المكان زحمة في وسط البلد ولا مكان تاني صعب تلاقي فيه ركنة خد تاكسي وريح دماغك.
ومش هيحصل حاجة أما توصل بدري على فكرة.
مش لازم توصل على معاد الإنترفيو بالزبط، مش ممكن تبقى الشركة في الدور ال 14 والأسانسير مش شغال؟
أتمني توصل في معادك وتكون مستعد.
إحساس الإستعداد ده بيدي الواحد ثقة في الإنترفيو ممكن هو شخصيا ميكونش حاسس بيها بطريقة مباشرة.
لكن بتنعكس على ردود أفعاله طريقة إجابته على الأسئلة اللي بيتسألها. إسألوني أنا! عملت 42 إنترفيو لحد ما إشتغلت!
معادنا ما الطبق الرئيسي العدد اللي جاي، هعملوكو بط بالبرتقان ونتكلم عن الإنترفيو نفسه!
