طلاقكِ مش نهاية العالم

قرار الطلاق مش سهل، ومحتاج شجاعة وقوة وتجاهل لكل الأصوات اللي جواكي أو حواليكي اللي هاتقولك إنك مش هاتقدري عليه وإنك إنتي الخسرانة؛ خدي الخطوة بقوة وماترجعيش فيها تاني، علشان تقدري تتجاوزي وتكوني أحسن وتعيشي الحياة اللي تستحقيها مش الحياة اللي تكوني مضطرة تعيشيها، وعلشان تقدري تستمري في القرار ده في خطوات لازم تعمليها.

الخطوة الأولى: إبدأي من أول وجديد

يمكن دي تبقى أصعب حاجة هاتعمليها، إنك تبعدي عن حد كنتي عايشة معاه فترة طويلة، وتسيبي حياتك اللي إتعودتي عليها، وتبدأي تبني حياة من أول وجديد. بس مفيش حاجة حلوة بتحصل من غير صعوبة ومعافرة، اللي هايبانلك صعب في الأول هايبقى أحسن حاجة عملتيها في حياتك بعد كدة.

الخطوة التانية: حاوطي نفسك بناس بتحبك

أكتر حاجة هاتساعدك تتجاوزي أي حاجة صعبة هو وجود صُحابك وأهلك جنبك، إن يبقى حواليكي ناس بتحبك بجد، فاهمينك ومراعيين مشاعرك، بيسمعوكي، بيخافوا عليكي، بيدعموكي، وبيقوكي. ماتسبيش نفسك للوحدة تتضعفك؛ لو عرفتي ناس بتحبك صح هاتبقي أقوى وأحسن.

الخطوة التالتة: ماتتجاهليش مشاعرك

ماتكتميش مشاعرك وتتعاملي إنها مش موجودة، فتترسب جواكي وماتعرفيش تتجاوزيها أبداً، إقبلي الزعل واتعاملي معاه، عيطي وإزعلي وإكتئبي؛ إحكي لصحابك عن اللي مضايقك أو مخوفك أواللي مش قادرة تتعاملي معاه وتقبليه. ولو مكانش متاح تحكي لصحابك إحكي لدكتور نفسي، هايساعدك تطلعي اللي جواكي وتلاقي لمشاكلك ومخاوفك حلول.

الخطوة الرابعة: إشغلي نفسك طول الوقت

لو يومك كله مشغول مش هاتلاقي عندك وقت تزعلي ولا تفكري في حاجة تضايقك؛ إشتغلي، إشتغلي كتير حتى لو وصل إن الشغل ياخد أكتر من نص يومك، إتعلمي حاجة بتحبيها، إلعبي رياضة، اخرجي مع صحابك كتير، ماتديش لنفسك وقت إنك تفكري في أي حاجة مضايقاكي، الإنشغال وقلة وقت الفراغ هاينسيكي كل حاجة مضايقاكي.

حياتك مابتنتهيش بعد الطلاق، حياتك بتبدي بداية جديدة صحية، مفيهاش ضغوط نفسية ولا معاناة.

 

كتابة: نادية شلكامي

ترجمة: تسنيم عبدالله

No Comments Yet

Leave a Reply

Your email address will not be published.