الحياة في القاهرة ممكن تبقى مرهقة ومؤذية جداً، فمفيش أحسن من إنك تفصل شوية وتروح مكان بعيد! سيوة واحدة من أجمل الأماكن في مصر، ولسة ماتشهرتش أوي ولا اتحولت لمدينة تجارية، وده اللي بيخليها مكان مثالي للروقان والاسترخاء!
أحسن وقت تروحوا فيه سيوة هو الشتا، الجو بيبقى دافي الصبح، وفيه لسعة برودة بالليل، يعني جو عظيم للتخييم والسفاري.
حبيت أقولكوا على كام حاجة تقدروا تعملوها لما تروحوا سيوة:
الزحلقة على الرمل
صحراء سيوة جميلة بشكل مايتوصفش وكلها كثبان رملية، يعني مكان مثالي للزحلقة على الرمل!
اللف بالعجلة في سيوة
سيوة مدينة ساحرة، فبكل سهولة هاتقدر تأخذ جولة فيها كلها وتشوف كل معالمها بالعجلة. وكمان سهل جداً تأجر عجل في السوق هناك.
اغطس في بحيرات الملح
سيوة معروفة ببحيرات الملح، مياه صافية وزرقا اللي صعب جداً مقاومتها. تركيز الملح في المياه بيخليك تعوم على وش المياه بس، وده اللي بيخليها تجربة كلها استرخاء ورقان.
الينابيع الساخنة
سيوة مليانة ينابيع مياه سخنة، ودي أنسب حاجة في الليالي الباردة. وكمان مثالية لإسترخاء العضلات، وتحسين الدورة الدموية.
التخييم
لازم ولا بد إنك تقضي ليلة في الصحراء في سيوة! تقعد حوالين النار، تشوي أكل، وتبص للسما اللي مليانة نجوم!
الشوبينج
سوق سيوة ساحر، معروفين بمنتجاتهم واكسسوارتهم المصنوعة يدوياً.
غروب الشمس
تقريباً كل مكان في سيوة يعتبر منظر ساحر تقدر تشوف منه غروب الشمس مش هاتنساه في حياتك. ورا الجبل، أو فوق البحيرة. مشهد ساحر يستاهل كل دقيقة من وقتك.
