“روشتة الأنثى السعيدة” فى حوار خاص مع فاطمة خير

العلاقة بين الراجل والست دايما عليها علامة إستفهام، دايما حد فيهم شايف ان التانى لازم يتنازل علشان العلاقة تنجح ، مفاهيم غلط الرجالة ورثتها، منها ان الست اللى تربيها على إيدك هتريحك، ومفاهيم تانية إتكونت جوه عقل الست مع كل مرة بتسمع فيها حد بيقول “جوزك على ما تعوديه”، لكن الحقيقة إن العلاقة بين الطرفين عمرها ما بتنجح من خلال الصراعات، العلاقة الناجحة ليها أسس بتقوم عليها محدش فيها بيتنازل، لكن التفاهم والمناقشة فيها هو اللى بيخلق “المعادلة الصح”، علشان كده الكاتبة فاطمة خير حاولت من خلال كتابات مختلفة ليها تدى الروشتة اللى بتحقق المعادلة دى، واللى ادت ليها بُعد جديد من خلال كتابها الأخير “انثى سعيدة”.

 

 

ليه “أنثى سعيدة”؟

علشان ده إستكمال لمسيرة بدأتها من خلال كتاب “أنثى مع سبق الإصرار”، والهدف من المسيرة دى ان كل ست تقدر تكتشف كينونتها وتكون فخورة بإنها أنثى، وتشتغل على ده عشان تأكد وجوده، “هى مش محتاجه تكون ذكر علشان تعيش فى مجتمع يحترمها”، ودى روشته لكل انثى ازاى تكون سعيدة من خلال مجموعة من النصايح لو اتبعتها هتكون أنثى سعيدة.

إمتى اللحظة اللى قررتى فيها تقفى وتقولى أنا عاوزة ارضى نفسى ؟

لما حسيت انى متحققة جدًا لكن منهكة جدًا، فاكتشف إنى برضى كل اللى حواليا وبس، ساعتها قولت أنا عاوزه ارضى نفسى،  فى فرق بين انى أرضى نفسى وبين انى أحقق أهدافى، تحقيق الأهداف جزء من الرضا، لكن مش كل حاجة.

شغلك فى الصحافة ساعدك إزاى فى الكتابة ؟

خلانى اشوف انماط متعددة وأقابل حكايات مختلفة، وخلى قدرتى على تحليل الامور أكبر و أشمل.

شايفة ان السعادة جزء من تمكين المرأة ؟

السعادة جزء من تمكين أى إنسان، إذا المرأة مش سعيدة عمر الراجل ما هيكون سعيد.

ملمستيش فى الفترة الاخيرة أى تطور فى وجود المرأة ؟

آه احنا عندنا إمتيازات للمرأة، اغلبها واخد مسارات قانونية، لكن المشكلة فى المجتمع وقيمه، ورؤية المجتمع للمرأة، وده اللى خلق عند الست حالة من الإزدواجية، نابعة عن إحساها بإنها راجل، زيها زى الراجل بالظبط، لكن كمان مطلوب منها تتعامل مع نفسها زى ما المجتمع عاوز يتعامل معاها، كأنها قاعدة فى البيت، بالرغم من ان الست أكتر شجاعة فى إتخاذ القرارات على مر التاريخ، لكن للأسف لسه بدرى على ما نقول إننا عندنا تمكين حقيقى للمرأة، وأنا مش ضد قيم المجتمع أنا ضد اللى بالى منها ومش مناسب لعصرنا.

بتشوفى العلاقة إزاى بين الراجل والست ؟

للأسف كلها بقت علاقات تملك، الست عاوزة تتملك حاجة مادية من الراجل، فهو يعملهلها علشان يتملكها قصادها، وبالتالى تتحول لعلاقة اساسها التملك بيهرب فيها الراجل بعد كده لعلاقة بره اساسها الحب، وهى لما تحب مبتقدرش تعمل ده.

وإزاى شايفة ان الأم ممكن تكون مصدر خطر ؟

لان فى أمهات بترتبط ببناتها لدرجة انهم ممكن يفشلولهم مشروع جواز، وده أنا شوفته قدامى كذا مره لدرجة انى شوفت أم بتقول لبنتها “لما اموت ابقى اتجوزى”، وده ممكن يكون نابع عن حب، لكن ده كمان بيحطها قدام حرمان عاطفى وحرمان جنسى، مبتدركوش غير متأخر.

ايه الفرق بين العطاء والتضحية من وجهة نظرك ؟

التضحية هى إنى آجى على نفسى علشانك، لكن العطاء هو انى أديكى من غير ما ده يتعارض مع حبى لنفسى، علشان كده لازم أعمل توازن فى حياتى، ولو الست مش متوازنة نفسيا وعندها وعى بتنوع أدوارها، طبيعى بتطلع أولاد غير متوازنين.

شايفة إن الست المفروض تضحى عشان ولادها لو مش مستقرة فى العلاقة الزوجية ؟

التضحية مطلوبة فى العلاقات الإنسانية عموما لكن لازم يكون ليها مبرر ولازم يكون ليها حدود، ولو هتضحى لازم تكونى مدركة تماما لدة من غير ما تستنى المقابل، ولازم تفضلى فاكرة ان ده إختيارك.

ايه رأيك فى جواز الصالونات، ويا ترى بتشوفى دايما نهايته فاشلة ؟

أنا شوفت بعض جوازات استمرت، لكن جواز الصالونات مبقاش مناسب لزمنا، احنا فى زمن احتياجاته مختلفة، لكن إزاى اتنين ملهمش أى علاقة ببعض مجبرين يبدأوا حياة مشتركة بدون مقدمات، احنا فى 2017 عندنا 700 الف حالة طلاق قصاد 900 الف حالة جواز أغلبهم فى السنة الأولى، الجواز ونس ومودة وده لازم يبدأ بحب والفه وصداقة، وده أرحم من الخيانة، حتى لو الحب مش كفاية علشان الجواز ينجح، يبقى على الاقل مبرر ان الناس تعيش مع بعض.

تفتكرى الراجل ممكن يكتفى بست واحده ؟

لو بيحب! الراجل عاوز ست ملهاش علاقات قبله بس يا ترى هو بيحبها ؟، الراجل عاوز بعد الجواز مراته نسخة من أمه من غير ما يراعى انها شريكتة فى الحياة، والراجل اللى بيبرر لنفسه الخيانة من باب التغيير ده راجل عينه فارغة.

إزاى شايفة ان السوشيال ميديا فتحت باب للخيانة ؟

لإنها فتحت باب سرى للتواصل السهل، نص الرجالة عندها حسابات بأسامى تانية وخصوصا لو باص وورد الاكونت الأصلى مع مراته.

انتى مع ولا ضد ان الست تعترف للراجل بعلاقاتها القديمة قبل الجواز ؟

للأسف فى المجتمع الشرقى الراجل مبيغفرش للست انها تقوله انها كان عندها علاقات قبل الجواز، علشان كده ولا من الذكاء انه يسأل ولا من الذكاء انها تجاوب، وبالرغم من ان الصراحة مطلوبة الا انها لازم تقوم على فكرة المناقشة وكمان على حسب نوعية الراجل.

ايه الأسس اللى ممكن تقوم عليها علاقة سوية من وجهة نظرك ؟

الصراحة ثم الصراحة ثم الصراحة، لازم نحدد أهدافنا من اى علاقة، ولو حسينا اننا مش قادرين نكمل لازم نعترف بده، علشان حتى لو سيبنا بعض نسيب بعض بكل الود.

تفتكرى ايه هى أسس الحياة المشتركة ؟

الإلتزام تجاه العلاقة، والصراحة وان أهدافنا تكون واضحة بعيدا عن العفش والموبيليا، وده لازم يحصل من خلال الطرفين، ده غير التفاعل ومحاولة إحياء العلاقة دى بأشكال مختلفة، لازم يكون بينهم علاقة مستقرة، علاقة شخصين بينهم حياة مشتركة بعيد ا عن الاسرة .

وإزاى الست تعرف ان الراجل اللى معاها بيحترمها ؟

من تقديره ليها، لازم يحسسها بآدميتها وميطلبش منها حاجة فوق طاقتها ولا يهنها بشكل مباشر أو غير مباشر.

إزاى الشخص يطلع سوى بعيد عن الموروثات الأسرية ؟

إحنا كمجتمع لازم نحط مشاكلنا على الترابيزة ونناقش بشكل معلن المشاكل الإجتماعية فى الأسرة، ولازم نعيد تقييم قيمنا اللى ورثناها وهل تصلح للزمن ده ولا لا، ولازم يتم الإعتراف بدور الأستشارى الأسرى، ولازم المقبلين على الزواج يكون عندهم دورات تأهيلية فى مراكز إرشاد أسرى، ولازم الناس تلجىء للمراكز دى فى حالة وجود مشكلة، ليه نستنى لما نوصل لمحكمة الأسرة، أنا مش ضد الطلاق، لكن ضد إننا منحاولش نصلح قبل ما نوصل للمرحلة دى.

شايفة ان الأهل بيتحاسبوا دينيًا على أى قرار بياخدوه الأولاد ؟

أنا ضد الفكرة دى، الأباء مسؤولين عن تنشئة الأبناء لكن فى الآخر كل حد بيتحمل مسؤولية قراره، وأنا شايفه ان ده  سوء فهم فى مجتمعنا، الآباء دورهم التوجيه، لكن كل إنسان مسؤول عن تصرفاته.

بتشوفى الست المصرية نكدية ؟

الست المصرية تعيسة علشان كده بتميل للنكد ، وده نتيجة لعدم التحقق العاطفى فى العلاقة الزوجية.

ليه العقبات بتزيد عند الست أكتر من الراجل مع تقدم السن ؟

علشان صعوبة حياة الست بتكون اكتر من صعوبة حياة الرجل، الست التراك بتاعها كله حواجز، ومهام الست اكتر بكتير من مهام الراجل، علشان كده المجتمع لازم يقدم تسهيلات اكتر للمرأة ولمهام المرأة كزوجة وام، وميقللش فرصها فى التوظيف والترقية.

ايه اللى الست محتجاه علشان تقدر تاخد فرصتها كاملة ؟

محتاجين يكون فى امان فى الشارع وفى المواصلات، وكمان الستات مينفعش تشتغل بعد الساعة 7 ، مش شتارة تنزل الست شيفت يوم الجمعة وتضرب دورها الاجتماعى، علشان كده المجتمع لازم يكون اكتر ثقة فيها ويوفرلها بيئة عمل امنة وشوارع ومواصلات امنه، الى جانب تدعيم صورتها فى وسائل الإعلام والتعليم والخطاب المجتمعى بشىء من التقدير، باعتبارها نص المجتمع ومسؤوولة عن تنشأة كل المجتمع.

إزاى الست تقدر تحب نفسها من وجهة نظرك؟

لما ست تانية تعلمها انها تحب نفسها، ولما تكون مقررة انها تحب نفسها وده لازم تكتسبة من نموذج قدامها، تجمعات الستات كمان ممكن تكون مصدر دعم نفسى للست.

إيه طبيعة الست اللى بتهديلها الكتاب ده ؟

انا بهديه لكل ست وراجل فى مصر وفى المنطقة العربية علشان نفكر مع بعض بصوت عالى إزاى نبنى علاقات سليمة عشان نكون اشخاص اسوياء ولكل ست عشان اقولها خلى بالك من نفسك، ومتأذيش نفسك وانتى فاكرة انك بترضيها، الست لازم تعمل حساب لشيخوختها علشان متأذيش اللى حواليها، وبنصح كل  ست تعمل وثيقة ادخار او وثائق تقاعد لحد ما تعترف الدولة ان ست البيت لازم يكون ليها معاش.

إيه النصايح اللى بتوجهيها لأى ست عشان تبقى أنثى سعيدة ؟

تعرف اللى ليها واللى عليها وتعرف حقوقها وتبقى حريصة انها تاخدها، وتعرف انها اساس الاسرة السعيدة والابناء الاسوياء، وانها لازم تساعد الراجل يفهم هيه عاوزه ايه، ولازم تفهم ان التمكين الاقتصادى اساس لسعادتها، لانه اساس للاستقلال وحرية اتخاذ القرار وده هيساعدها ترفض اللى هى مش عوزاه وبالتالى مش هتعيش حياة مزدوجه، وتعرف ان اى علاقة بتحتاج لجهد عشان تحافظ عليها، واذا كانت العلاقة خلصت مدة صلاحيتها لازم نعمل وقفة ونشوف قادرين نكمل ولا لا، وانها لازم تدى ولادها حب بلا حدود وتعبرلهم عن ده، وتعرف انها مش مسموح تكون ام لاى راجل لان لو ده حصل هيروح يدور على واحدة تانية تبقى حبيبته، وانها لازم تعتنى بصحتها.

No Comments Yet

Leave a Reply

Your email address will not be published.