ركن الطبيعة – مشروع راندا سيف اللي بيعيد تدوير مخلفات النخيل لمنتجات طبيعية

مين فينا مابيحبش الطبيعة؟ أو مابيحبش يقعد في مكان هادي بعيد عن كل الدوشة اللي موجودة في يومه؟ الإجابة في الأغلب هتكون مافيش حد، بس كام واحدة فينا فكرت انها تعمل المشروع بتاعها من الطبيعة و للطبيعة؟ مش كتير.

بس ده اللي فكرت فيه رندا سيف بنت الوادي الجديد و كمان أم لطفلين و صاحبة مشروع (ركن الطبيعة).

فكرة المشروع بدأت من لما كان عندها مشكلة في بشرتها و ماكانتش لاقيالها علاج لحد ما استخدمت البلح و فعلًا المشكلة اتحلّت و بعد كدة اتعلمت أكتر عن طرق عمل صابون طبيعي من البلح، مشروع راندا بيعمل منتجات كتير من مخلفات النخيل و بكده بتبقي بتعمل منتجات صديقة للبيئة و بتقلل من البطالة عن طريق توفير فرص عمل للحرفيين و العمالة اللي شغالين معاها.

كانت ايه أكبر عقبة في طريقك؟ و إزاي اتغلبتي عليها؟

أكبر عائق قدامي كان الفكرة نفسها و ان أصحابي و أهلي يقتنعوا بيها، تاني حاجة لما كنت عايزة اتعلم إزاي أعمل الصابونة نفسها و روحت لمكان عشان يعلمني بس للأسف ده كمان مانفعش، لحد ما قررت اني هاعتمد على نفسي و مش هستسلم و بدأت اجيب كل المواقع الاجنبية اللي موجودة على الانترنت اللي بتختص في مجال البشرة وصناعة الصابون الطبيعي و بدأت اتعلم، لحد ما فعلًا وصلت للصابونة اللي بنبيعها دلوقتي، مش بس كده كمان الصابون بتاعي مطابق للمواصفات الأوروبية.

من كل المواد الخام المتاحة اللي ممكن تستخدميها، ليه اخترتي خوص النخيل؟

من المشاكل اللي انا مقتنعة انها موجودة ولازم تتحل مشكلة مخلفات النخيل، بدأت ادور ازاي أعرف استفيد من المخلفات دي و احافظ على البيئة حوليا. اتعلمت اعمل قهوة نواة التمر ودبس التمر الغني بالفيتامينات والمعادن، و في نفس الوقت استفدنا من الخوص بأننا نعمل ديكور للبيت و شنط و اكسسوارات.

منتجاتك بتجمع ما بين نوع فن تقليدي وتصميمات عصرية ومختلفة، هل بتلاقي انه من الصعب انك تخلي الحرفيين اللي بيشتغلوا معاكي يمشوا على التصميمات دي اللي ممكن تكون مختلفة عن اي حاجة عملوها قبل كدة؟

كان هدفي من البداية من أول ما دخلت المهنة دي اني اجمع التراث و الهوية بالحاضر و الموضة. بصراحة مواجهتش أي مشكلة مع الناس اللي بشتغل معاهم لأن كلنا بنشتغل كأسرة واحدة و كل قطعة بيعملوها بتكون معمولة بحب و شغف.

شايفه اننا كمصريين بقي عندنا وعي أكتر اننا نستخدم منتجات صديقة للبيئة؟

شايفه فعلًا اننا بقينا مثقفين و عندنا وعي أكتر من الأول اننا نتقبل المشاريع الصديقة للبيئة، مش بس كده احنا كمان بندعمها.

ايه خططك المستقبلية لمشروعك (ركن الطبيعة)؟

بخطط المرحلة الجاية ان يكون عندي تنوع أكتر في المنتجات و أبدأ مبادرات جديدة تشجع إعادة التدوير.

راندا ست طموحة و صبورة و عارفة هي عايزة ايه كويس و بَنِت نفسها بنفسها و اتعلمت كل حاجة في صناعة منتجاتها من البداية لحد ما وصلت للمستوى اللي هي فيه، راندا و زيها كتير من اصحاب المشروعات الصغيرة تستحق الدعم و حقيقي مستنين اليوم اللي مشروعها يحقق النجاح اللي بتتمناه.

 

No Comments Yet

Leave a Reply

Your email address will not be published.