دينا غلوش مؤسسة Curly Talks، “شعرنا لازم يبقى حاجة نتحب علشانها مش نتحب بغض النظر عنها!”

كتبت: تسنيم عبد الله

كانوا بيتريقوا عليها، وينتقدوها طول حياتها علشان شعرها كيرلي ومنفوش؛ دينا قررت تنقل معانتها مع الشعر الكيرلي للأنترنت علشان تلهم، تحفز، وتشارك معلوماتها مع كل البنات اللي شعرهم كيرلي زيها، علشان تقضي على شعورهم بانعدام الثقة بالنفس. اتكلمنا مع دينا غلوش، الست المتفردة الجميلة، عن أهمية شعر الستات في حياتهم، وده اللي حكتهولنا!

إزاي جاتلك فكرة Curly Talks؟

وصلت لمرحلة إني قررت إن خلاص كفاية نقد وتعليقات على الشعر! فكري اتغير بعد ما درست برّه فترة، وشفت إزاي ردود فعل الناس على شكل شعري مختلفة جداً وكأنه حاجة قيمة ومنبهرين بيها. رد الفعل ده كان جديد عليا. على قد ما حبيت الإحساس، كنت زعلانة جداً إن الناس في بلدي وثقافتنا، اللي 99% منهم طبيعة شعرهم كيرلي، كنت بحس إني غريبة وغير مرغوبة. وقتها بس قررت إن لازم يحصل تغيير في طريقة التفكير وعرفت إن مش أنا البنتت الوحيدة اللي بتمر بكل ده.

 

في رأيك، ليه بقى مهم دلوقتي إن الستات يبقى عندهم منصات يشاركوا فيها نصائحهم وخبراتهم لبعض؟

أنا بشوف إنه مهم جداً لأنه خلانا نبدأ نفهم إننا مش لوحدنا في كل ده. وإن في ناس تانية بتعيش نفس الحاجات اللي إحنا بنعيشها، ونبدأ نعرفهم ونتواصل معاهم، وده بيدعمنا وبيساعدنا نستمر.

 

ليه بتشوفي إن الشعر الست مهم بالنسبالها؟ وفي رأيك إزاي بيأثر على حالتهم النفسية؟

الشعر هو زينة الست ودائماً بيتقال مقولة “تاج المرأة شعرها” لسبب. لإنه يقدر يخليها قوية وجذابة ويقدر يخليها مكسورة وضعيفة، ممكن تقوليلي ليه المبالغة ده مجرد شعر، بس قوة تأثير اليوم اللي الشعر بيبقى فيه حلو\ أو وحش ماتتوصفش. ده جزء مننا، اتولدنا بيها وعايزين نتحب علشانه مش بغض النظر عنه! وعلشان كدة بنحس بالضيق من المجتمع اللي أجبرنا نغير في شعرنا وندمره علشان بس نرضي معايير المجتمع.

قبل ما تعملي البلوج بتاعتك، هل كنتي مخططة أو متوقعة التوسع والنجاح ده؟

ماكنش عندي أي فكرة ولا حتى كنت مستنية ده يحصل لما بدأت أعمل  CurlyTalks. كل اللي كنت عارفاه كان إني كنت عايزة أساعد البنات يتجنبوا يمروا باللي أنا مريت بيه؛ مايحسوش بعقد نقص، وقلة ثقة بالنفس. قلت لنفسي خليني أجرب البلوج لمدة شهر، وأشوف لو الناس هايلاقوا اللي هما محتاجينه أو حتى حاجة تجذب اهتمامهم. وكنت محظوظة كفاية إن الناس شافوها حلوة ومفيدة.

 

إيه النصائح اللي تحبي تقدميها للبنات اللي شعرهم كيرلي في المرحلة الفارقة دي؟

الصبر، الصبر، الصبر! أنا عارفة إن ده ممكن يبان بسيط (وصعب) لكن الحقيقة إن فعلاً العملية دي محتاجة صبر. اللي إحنا لازم نفهمه كبنات إننا قعدنا سنين ندمر شعرنا كله، فهنحتاج نفس الوقت علشان نصلح الضرر اللي حصل طول السنين دي.

 

إيه احساسك بعد ما الجروب بتاعك بقى هو الجروب المفضل والأول لبنات وستات كتير في مصر؟

ممتنة جداً ومبسوطة  إني قدرت أساعد ستات وبنات كتير. وكمان فخورة جداً بكل البنات اللي قرروا يغيروا الفكر اللي موجود دلوقتي، ومايهتموش بنظرة حد سواء أهل أو صحاب، ويقبلوا نفسهم. وده محتاج شجاعة كبيرة أوي، وبيلهمني جداً كل يوم.

 

برغم إن الحقيقة إن أغلب الستات المصريات طبيعة شعرهم كيرلي، الشعر الكيرلي كان دائماً بينتقد، تفتكري ليه؟

الموضوع بيرجع للتاريخ، زي كل حاجة في الدنيا. مصر استعمرت كذا مرة، وخلال الفترات دي المستعمرين ماكنوش بس مسيطرين علينا سياسياً لكن نفسياً وذهنياً كمان. والميديا مساعدتش في تغيير ده خالص. المعايير الغربية اتفرضت، سيطرت علينا،  ومن ساعة الاستعمار بقينا فاهمينا إن كل ما بقينا شبه الأوروبيين، كل ما بقينا أحلى وأشيك، في الشكل بقى، في اللغة، وحتى في اللبس. للأسف الفكرة دي ماتغيرتش طول السنين دي كلها.

كونك شعرك كيرلي، هل اتقالك تعليقات سلبية أو نقد على شعرك؟ لو حصل إزاي كنتي بتتعاملي معاهم؟

مرات كتير، وأنا صغيرة فردت شعري مرتين، ووأنا في الثانوي، بسبب الضغط اللي كنت بحسه علشان شعري “وحش”. كنت دائماً برفع شعري لفوق علشان أخبيه، وعمري ما حسيت إني مرتاحة جوايا. بس دلوقتي، بقيت بستنى أو بتحدى أي حد يفكر ينتقد شعري.

 

تحبي تقولي إيه لكل الأمهات اللي بناتهم شعرهم كيرلي؟

أحسن طريقة تخلي بيها بناتك يحبوا نفسهم هي إنهم يشوفوكي بتحبي نفسك، وإنك مش قلقانة على نظرة المجتمع ومعايير الجمال بتاعته اللي اتفرضت علينا. مفيش فايدة من إنك تقولي لبنتك إن شعرها الكيرلي حلو وإنتي بتفردي شعرك. إنتي مثلها الأعلى، ودليلها لكل حاجة حلوة ومفيدة، فأول خطوة تعمليها هي إنك تكتشفي جمالك الطبيعي.

 

إيه الخطوات الجاية لـCurlyTalks؟

الحقيقة أنا لسة مش متأكدة في المرحلة دي. بس أنا بتمنى إني أقدر أوفر منتجاب طبيعية وصحية للبنات اللي شعرهم كيرلي في العالم العربي كله. أنا حاسة إننا بجد محتاجين ده، بس خلينا نستنى ونشوف الحياة هاتودينا فين الكام شهر الجايين.

 

 

 

 

No Comments Yet

Leave a Reply

Your email address will not be published.