كتبت: تسنيم عبدالله
بعد ما شافت قد إيه المنصات الإفتراضية مؤثرة وملهمة خصوصاً للستات، قررت دعاء تعمل منصة خاصة بيها وتشارك فيها تجربتها مع الشعر الكيرلي وتفتح المجال لكل الستات اللي شعرهم كيرلي زيها إنهم يشاركوا بتجاربهم الخاصة هما كمان. ومن قوتها والجروب بتاعها على الفيسبوك The Hair Addict بقى الوجهة الأولة لكل اللي شعرهم كيرلي، واللي بيلاقوا فيهم نصائح إزاي يهتموا بشعرهم، تشجيع ودعم، ومنه بيقدروا يزودوا ثقتهم في نفسهم وفي شكلهم! اتكلمنا مع مؤسسة الجروب العبقري ده، دعاء جاويش، وده اللي هي قالتهولنا!
إزاي جاتلك فكرة جروب the Hair Addict؟ وفي رأيك ليه مهم إن يبقى في مكان آمن على الأنترنت الستات بتشارك فيه نصائح الشعر؟
الموضوع جه بعفوية جداً. أنا كنت دائماً حريصة جداً إني اهتم بشعري واجرب مكونات طبيعية واخلطهم مع بعض واعمل وصفات علشان تطول شعري وتخليه صحي. لاحظت إن معارفي والدوائر القريبة مني بيستعملوا جروبات علشان يتواصلوا ويتكلموا مع ناس عندهم نفس اهتمامتهم، فجاتلي الفكرة وعملت The Hair Addict.. ومن وقتها، الستات بقوا يعتبروا The Hair Addict مكانهم الآمن اللي يقدروا يشجعوا فيه بعض ياخدوا الخطوة ويبدأوا رحلتهم في العناية بشعرهم.
تفتكري ليه شعر الست مهم أوي بالنسبالها؟ وإزاي بيأثر على حالتها النفسية؟
الشعر من أهم الحاجات اللي بتظهر في شكل البني آدم، وبتبقى وسيلة للست تعبر بيها عن نفسها وتقول هي مين. بالنسبالها مش بس شعر! كل ست دائماً بتدور على الراحة والثقة بالنفس عن طريق شعرها، سواء بقى إنها بتقصه، بتفرده، أو بتعمله كيرلي، لحد تغيير لونه. بس في وسط كل ده ممكن بجد تبوظ شعرها. علشان كدة إحنا مؤمنين إن الست اللي بتتصالح مع طبيعة شعرها –سواء كان كيرلي أو مفرود- وتتعلم إزاي تغير في ستايل شعرها من غير ما تبوظه، كدة تبقى بتقدم رسالة قوية جداً عن ثقتها بنفسها.
قبل ما تعملي الجروب، هل كان في مخططاتك إنك تتوسعي بالشكل ده في الحقيقة وتشاركي في تجمعات، وندوات؟
أنا كان في نيتي إن The Hair Addict يبقى مكان الستات بيشاركوا فيه نصائح للشعر، لكن بعد فترة لاحظت التفاعل الكبير والواضح بين أعضاء الجروب والاهتمام المتزايد بالشعر الطبيعي، فقررت أكبر ب The Hair Addict وأوصل رسالتنا اللي هي حب الذات والتصالح مع النفس، لكل الناس.
إزاي جاتلك فكرة إنك تبيعي منتجات محلية للشعر الكيرلي؟
كنت عايزة أتوسع بـ The Hair Addict أكتر وأحوله لبيزنيس علشان يبقى عندي وسائل أكتر أساعد بيها الستات وأدعمهم واخليهم يرجعوا شعرهم أحسن من الأول. بعد كدة قررت أكون فريق من الخبراء وعلشان نختبر وصفات وتركيبات أنا وعيلتي كنّا بنستعملها بقالنا سنين، ونجحنا في إطلاق أول منتجاتنا، The Indian Hair Growth Recipe، وصفة نمو الشعر الهندية. وبعد كدة، ضيفنا منتجات أكتر لخط إنتاجنا، والحمدلله نجحت، وعجبت الناس جداً.
إيه احساسك بعد ما الجروب بتاعك بقى هو الجروب المفضل والأول لبنات وستات كتير في مصر؟
مفيش كلام ممكن يعبر عن فرحتي باللي وصله The Hair Addict، كمية الحب والدعم اللي الستات دول بيدوه لبعض مالوش حدود، وده بيحفزني دائماً أنا والفريق بتاعي إننا نقدم أفضل حاجة عندنا. بنبسط جداً لما بشوف بنات ماشيين بشعرهم الطبيعي في الشارع، بحس إن مجهودنا وتعبنا اتحول لطاقة خلت البنات والستات دول يبقوا فخورين بطبيعة شعرهم.
برغم إن الحقيقة إن أغلب الستات المصريات طبيعة شعرهم كيرلي، الشعر الكيرلي كان دائماً بينتقد، تفتكري ليه؟
الشعر الكيرلي عادة بيحتاج عناية واهتمام أكتر من الشعر المفرود، علشان يبقى شكله صحي وحيوي. من غيرالمعرفة الصحيحة بالاهتمام بالشعر، أي ست هاتلاقي إن شعرها بقى كورة كبيرة، هايشة، وشكلها مش حلو، فبيلجأوا للحلول السريعة زي الكوي والكماويات، فمابيقدروش يشوفوا لو اهتموا بطبيعة شعرهم فعلأً هايبقى عامل إزاي. النظرة العامة دي بدأها التلفزيون والميديا اللي خلوا معايير الجمال والجاذبية عبارة عن ممثلات شعرهم ناعم ومفرود. بس ده بدأ يقل جداً دلوقتي، وبدأنا نغير النظرية دي دلوقتي.
كونك شعرك كيرلي، هل اتقالك تعليقات سلبية أو نقد على شعرك؟ لو حصل إزاي كنتي بتتعاملي معاهم؟
وأنا صغيرة كنت دائماً بلم شعري ضفيرة أو ديل حصان علشان شعري كان كبير أوي. كنت بحس إنه حاجة منفرة. بعد كدة استسلمت للتعليقات السلبية وكنت بكوي شعري كل أسبوع لسنين. أثر الضرر اللي كنت بعمله على شعري خلاني أفكر في كل حاجة بعملها، فقررت أعمل جروب The Hair Addict.
تحبي تقولي إيه لكل الأمهات اللي بناتهم شعرهم كيرلي؟
ماتختاروش أبداً تغيروا طبيعة شعرهم زي أنكوا تلموه بشد جامد وده نتيجته إن الشعر بيبقى أضعف وأخف كتير من قدام، في حلول بديلة، لازم تعرفوا طبيعة الشعر وإيه المنتجات والأساليب الصح اللي تنفعله. ولازم كمان دائماً تقولولهم إن شعرهم حلو وشكلهم حلو مهما كان طبيعته إيه.
إيه الخطوات الجاية ل The Hair Addict
إحنا بنخطط إننا نوسع خط إنتاج منتجات The Hair Addict، ونخلي الرجالة جزء من المستهلكين بتوعنا، ويكون لينا وجود في دول أكتر في العالم العربي زي الإمارات. وكمان بنخطط نعمل ورش تدريب لمصففين الشعر علشان يتعلموا فيها الطرق الصحيحة الطبيعية لقص وستايل الشعر، علشان نزود من الأماكن اللي بتهتم بالشعر الطبيعي، القرار ده جه بعد ما بقينا معتمدين –بمساعدة من مصفف شعر أمريكي عالمي- أكتر من 28 مصفف شعر في مصر، الإمارات، وروسيا.
