في ستات كتير بيفضلوا الولادة القيصيرية عن الطبيعية، علشان بيخافوا من آلام الولادة الطبيعية الشديدة، ومن المضاعفات اللي ممكن تحصل أثناء الولادة الطبيعية للطفل أو للأم.
إيه اللي بيسبب آلام الولادة؟
مرحلة الولادة بتبدأ لما الرحم يحصل فيه تقلصات، المع قُرب الولادة تقلصات بتبدأ تكون متواصلة وشديدة، وممكن تبقى مؤلمة جداً، وفي نفس الوقت فتحة عنق الرحم بتبدأ تتوسع علشان تسمح للطفل إنه يخرج منها. المرحلة دي بيحصل فيها إنقباضات كتير في الرحم وعضلات الجزء السفلي كلها عشان الطفل يطلع من قناة الولادة للمهبل ومنه لبرة جسمك. وخلال فترة الحمل في تغييرات بتحصل لجسمك بتهيأه وتخليه يكون قادر يقوم بعملية الولادة. لكن برغم التغييرات في الغالب هاتحسي بألم، خصوصاً في أول ولادة ألمها بيبقى أشد من الولادات اللي بعد كدة.
بس في حاجات ممكن تعمليها تخفف من آلام الولادة:
تحمُل الألم:
علشان تساعدي نفسك تتحملي الألم لازم تجهزي نفسك طول فترة الحمل، زي إنك تتمرني، تاكلي أكل صحي، تبطلي تدخين، تحسّني من لياقتك البدنية، وتحاولي تسترخي وتاخدي شاور دافي كل شوية؛ كل دي حاجات هاتساعد في تسهيل الولادة.
جهاز TENS:
جهاز TENS بيساعد على تخفيف ألم الولادة، ولما الجهاز بيتوصل بجسمك بينقله موجات كهربائية بتدلك العضلات وبتخليها تسترخي فـ بيقل الإحساس بالألم، وجسمك بيقدر يقوم بالولادة.
غاز إنتونوكس:
هو خليط من غاز الأكسجين وأكسيد النيتروز (غاز الضِحك). الغاز ده يبُعتبر مسكن قوي جداً للألم في الولادة؛ ومفعوله بيبدأ في 30 ل45 ثانية.
البنج:
البنج عبارة عن حَقن العضل بالمسكنات، وبتاخديه بالطلب؛ و تقدري تتحكمي في كمية البنج اللي داخلة جسمك، وتزودي الجرعات على حسب إحتياجك لحد ما تحسي إنك إرتاحتي ومفيش ألم.
مخدر موضعي:
المخدر الموضعي بيتحقن في المهبل لو إحتاج الدكتور إنه يعمل قطع جراحي للمهبل أثناء الولادة، والعملية دي بتخلي فتحة المهبل أوسع شوية، وده بيسمح للطفل إنه يخرج بسهولة أكبر.
الإبدورال (إبرة الظَهر):
الأعصاب بتاعة الرحم وقناة الولادة متوصلة بالمخ عن طريق عمودك الفقري، فدكتور التخدير بيديكي حقنة في الجزء السفلي من ضهرك عشان يخدّر الأعصاب دي وبالتالي ماتحسيش بألم.
في النهاية مفيش أي وسيلة بتقلل آلام الولادة بنسبة مية في المية، حتى الولادة القيصرية بتحسي بألم بعدها، الأمومة مش قرار سهل وعلى قد ما بيبقى مُتعب ومؤلم بس إبنك أو بنتك لما يتولد هاينسيكي كل التعب والألم اللي حستيه.
ترجمة: تسنيم عبدالله
