لو تونس مش في قايمة الدول اللي إنتي عايزة تزوريها في أجازة الصيف، لازم تضيفيها! لإنها من أشهر الدول السياحية اللي بيزورها الناس اللي بيدوروا على السلام والراحة النفسية والتجديد. تونس معروفة بثقافتها اللي بتجمع بين الثقافة الإسلامية المتحررة والثقافة الأوربية العصرية. في كل مكان هاتروحيه في تونس هاتلاقي مناظر طبيعية خلاّبة، وحاجات جديدة تجربيها هاتخطف قلبك!
أهم المعالم الطبيعية اللي لازم تشوفيها:
تونس بلد مليانة مغامرات، ونشاطات سياحية زي السباحة في شاطئ الرمال الذهبية، وروعة المدن الفينيفية، واستكشاف الصحرا بالجِمال، والإبحار، و العلاج بمياه البحر.
قرطاج:
قرطاج من أشهر وأقدم المدن في تونس، مدينة كلها حضارة وثقافة، ومواقع أثرية زي متحف قرطاج اللي بيعرض مجموعات من التحف الأثرية اللي لاقوها في الموقع واللي بتمثل تلات فترات مهمة: الفترة الفينيقيـة، الفترة الرومانية الإفريقية، والفترة العربية الإسلامية؛ ومسرح قرطاج الروماني، والمسرح الدائري بقرطاج، والسيرك، والحي البونيقي والفوروم.
الحمامات:
مدينة في تونس، أحسن وجهة تروحيها لو عايزة تستجمي وبتدوري على الراحة والاسترخاء، وتمشي على الشط في جو حلو وهادي وإنتي شايفة المحيط قدّامك.
المطبخ التونسي العظيم:
تونس بتجمع بين المطبخ الشرقي وبهاراته وتحابيشه وبين المطبخ الفرنسي الأوربي، ومن أشهر الأكلات التونسية السلطة المشوية، والكسكسي.
الشوبينج في تونس:
في شوية حاجات لازم تعمليها قبل ما تشتري حاجة هناك، زي إنك ماتدخليش أبداً لأي محل صحابه يزنوا عليكي تدخليه، ولو لقيتي حاجة عجبتك ماتبينيش إعجابك بيها والأفضل إنك تسيبيها وترجعيلها تاني، وماتشتريهاش غير لما تلفي على كذا مكان تاني وتعرفي سعرها الحقيقي.
السهرات:
مع كل ده ولسة برضه في أماكن ماروحتيهاش في تونس، في كافيهات ومطاعم كتير للعشا والسهرات مختلفة عن أي مكان تاني في العالم، تقدري تستمتعي بيها مع جوزك أو صحابك.
أحسن وقت تروحي فيه تونس هو في الشهور الباردة، من أول سبتمبر لحد يونيه،علشان جوهم حلو، وبيكون فيهم مهرجانات موسيقية كتير في المسرح الروماني.
ترجمة: تسنيم عبدالله
