بنتي الحبيبة، حبي نفسك

الرسالة دي مش عن ايه الحاجات اللي تدوري عليها في الراجل، لا هي عن ازاي تبني علاقة مبنية على الاحترام والحب والتقدير المتبادلين.

ماحدش كامل، وفارس الأحلام مش موجود، نقطة، العلاقات بتتبني، والبناء بيتطلب تغيير مستمر، فأنتي لازم تلاقي ادوات بناء تقدري تعتمدي عليها وتبني أساس من القيم اللي بتترجم لعادات، دوري على ديناميكية جذورها الشفافية والتواصل القوي وقلبها هو التقبل، أي حاجة غالية علينا بتاخد وقت.

دايماً اتحكمي في مشاعرك وعواطفك، فإوعي تجري ورا الحب أو الحنان أو الاهتمام، الحاجات دي لازم اللي بيديها يديها بحرية، يعني ماتدوريش على حد ينقذك، انقذي نفسك، اوعي تعتمدي على اي حد عشان تبقي كويسة او سعيدة.

افهمي مشاعرك و اوعي تخليها تتحكم في تصرفاتك، المشاعر هي نتيجة مؤثرات بتتسبب في تأثير داخلي، وممكن تترجم في صورة تصرفات خارجية، السيطرة والتملك والتحكم والكبت ممكن يتنكروا في شكل الحب او الحماية، بس هما في الحقيقة بيوصّلوا لكره النفس، زي ما العلاقات المبنية على التقدير والثقة والدعم والحرية هتوصل لحب النفس، فكري فيها كدة، ايه الأحسن ان الواحد يقطف وردة أو يسقي زرعة؟ انه يحط عصفور في قفص ولا يبني مأوى للعصافير؟

الوجع جزء من الحياة والحب، وبيساعدك انك تكبري، ماتتوقعيش علاقة مافيهاش الم، توقعي علاقة تساعدك انك تعيشي حياة غير مثالية بدهشة كبيرة.

الحياة صعبة وحاجات وحشة ممكن تحصل، اعرفي تتحكمي وكملي لقدام عن طريق تغيير الحاجات اللي عقلك مش قادر يتقبلها، او تغيير طريقة تفكيرك عشان تتقبلي الحاجات اللي مش ممكن تتغير.

الوقت والإهتمام أقيم ممتلكاتك، استهلكيهم بانتباه على الناس المهمين بالنسبة لك واللي فاهمين قيمتك، احنا دايماً عندنا اللحظة دي وبس، اي نفس ممكن يكون الأخير، السعادة طريقة تفكير ماينفعش تطبيقها إلا في الوقت الحالي، هي مش نقطة في المستقبل أو لحظة من الماضي.

عيشي حرة عن طريق تحملك للمسؤولية، حرري عقلك من الكراهية، من الخوف، ومن الحكم على الغير، خلي المشاعر دي تمر واعترفي بيها بس ماتخليهاش تحركك، لحد مايفضل لك الإعتماد على النفس، وبعد كدة حاوطي نفسك بالناس اللي بتتماشى مع نفس طريقة التفكير، وماتخافيش من انك تديهم كل الحب الغير مشروط اللي تقدري عليه، عشان هما هيقدّروا ويحموا الحب ده وهيبادلوكي بيه، دوري على الحب جواكي، ماتجريش وراه، اجذبيه لنفسك.

وأخيراً اعرفي ان الحب اكبر بكتير من “بحبك”، الحب غريزة اكبر من المشاعر اللي زي السعادة او الحزن او القرف او المفاجأة، الحب حالة عقلية أو حالة وجود، متجذرة في وعينا، ومترجمة لتعبير بيولوجي، وكونه تعبير يعني أنه تصريح خارجي ليه تأثير على العالم.

نبيل رستم أب متألق لطفلين ورائد أعمال ومؤسس شركتي jumpsuite  و Wellness log
انستجرام:
Nabil Rostom

No Comments Yet

Leave a Reply

Your email address will not be published.