مسلسلات رمضان كلها دراما معاصرة، وكان بقالنا كتير ماشوفناش مسلسل تاريخي يثبت وجوده في التليفزيون، ويلفت انتباه الناس كدة، زي مسلسل الحرملك.
فماكنش ينفع نفوت الفرصة ومانتكلمش مع الفنان باسل الزارو ، اللي لعب دور مارتن الجاسوس وخلانا نصدق فعلاً إنه جاي من زمن تاني، وبيتكلم عربي وإنجليزي وروسي كمان!
اتكلمنا مع باسل عن دوره في مسلسل الحرملك ورأيه في ستات زمان وستات دلوقتي، وإجاباته كانت لذيذة ومميزة جداً زي ما توقعنا!
- عملت دور مختلف جداً السنة دي في مسلسل الحرملك، الأدوار التاريخية صعبة وفيها تحديات كتير، احكيلنا أكتر عن تدريباتك علشان تتقن الشخصية؟
المسلسل مش إنتاج مصري، إنتاج عربي، سوري على إمارتي وفي ممثليين مصريين كمان؛ وده خلاني أهتم بالدور جداً وأتحمس أعمله، لإن الدور مختلف جداً وشدّني اختلافه وتفاصيله.
مارتن كان شخصية مليانة مفاجآت، ومختلفة جداً، وباسل أثبتلنا إن مهما كانت تفاصيل الشخصية اللي بيعملها جديدة لدرجة إنه يتكلم روسي! فمفيش حاجة صعبة عليه!
“في الأول الشخصية ماكانش فيها اللغة الروسي والتفاصيل دي، لما قابلت المخرج تامر اسحاق قالي شكلي جاسوس أكتر من مترجم، فبدأنا نشتغل على الإضافات بتاعة الجاسوسية والاكشن وركوب الحصان، الممثلة جيني أسبر اللي بحبها في المسلسل سورية روسية فهي كانت بتقولي الجملة بالروسي وأنا أقولها على طول في المشهد، بعت كلامي بالروسي لأصحابي الروسيين وشافوا إن اللهجة متنقة جداً، فزودنا الكلام الروسي مع الشخصية طول المسلسل.”
- إيه أكتر حاجة كنت خايف منها وانت بتعمل شخصية مارتن؟
أكتر حاجة هي إني ماعملتش دراما تاريخية قبل كدة، وطاقم العمل مش مصري، فطريقة شغلهم مش زي الطريقة اللي احنا متعودين عليها خالص، ومختلفة في كل حاجة تقريباً. في مصر ممكن المشهد يتعاد من خمس مرات لعشرين مرة، لكن معاهم 95 في المية من المشاهد بتتاخد من أول مرة، فلازم أدخل بتركيز كامل علشان أطلع أحسن حاجة عندي.
- إيه التحديات اللي واجهتك في الدور ده؟
ظروف التصوير في الصحراء، وإن المسلسل تاريخي فلازم نخلي بالنا من الكلام واللهجة، مع إن اللهجة عامية بس كنّا حريصين إنه يبقى عامي بيستخدم في الوقت ده، في 7 مصريين بس وسط 70 ممثل سوري، فكانت مسؤولية كبيرة أوي علينا إننا ناخد بالنا إحنا بنقول إيه، فكان في تحديات كتير طول الوقت، إني أحاول أتكلم باللهجة المصرية بحيث إنها تبقى مفهومة لكل البلاد العربية، وفي نفس الوقت تنفع تكون في الحوار اللي بيني وبين الممثل اللي بيتكلم سوري.
- الراجل زمان في زمن مسلسل الحرملك كان إيه اللي بيثبت رجولته؟
في كذا نوع راجل في المسلسل ده، في سامر المصري البلطي والرومانسي في نفس الوقت بس رومانسيته عنيفة شوية، وفي باسم ياخور المتدين الملتزم؛ اللي عاجبني فششخصية مارتن إنه برغم إنه جاسوس وإنه في بلد مش بلده وكل المشاكل اللي بتواجهه عرف يلاقي واحدة يحبها قبل كل المشاكل وفضل متمسك بيها رغم كل الظروف اللي بتواجهه.
فكل ده بيثبت إن مهما كان الزمان اللي إحنا فيه طول ما الراجل بيقدّر الست وبيديها حقوقها واحترامها هايلاقي الست بتديله أكتر من كدة في المقابل.
- لو في صفة واحدة تحب تفضل فيك من شخصية مارتن تبقى إيه؟
الباروكة! (بيضحك) الحقيقة عجبني جداً لبس وشعر شخصية مارتن وكل الشخصيات في مسلسل الحرملك، لإن كان فيه مجهود كبير جداً في الجزء ده بالذات، متخصصين الميك أب إيرانيين وعايشين في كندا فجابوهم مخصوص علشان يطلع شكل الشخصيات حقيقي كدة بكل تفاصيلهم. و رومانسيته طبعاً.
- في الفترة التاريخية بتاعة مسلسل الحرملك الستات كان عليهم قيود ولا كانوا واخدين حقهم من ناحية التقدير والاحترام؟
كان عليهم قيود بس كانوا واخدين حقهم بزيادة، الظاهر إن اللي في إيده السلطة واللي بيتخذ القرارات هو الراجل، لكن الحقيقة إن الست كلمتها هي اللي بتمشي بس بطريقة غير مباشرة. أما دلوقتي فالظاهر إن الستات واخدين حقهم وهما فعلاً واخدين حقهم.
- إيه رأيك في الأدوار النسائية في مسلسل الحرملك؟ وفي الأدوار في السينما والتلفزيون عموماً؟
أدوار رئيسية ومحورية جداً، أصلاً اسم الحرملك علشان بطولة نسائية وفي ستات كتير. الأدوار بتبين إن مش كل الستات كيوت ومغلوبين على أمرهم، لأ في ستات بتقتل وبتسمم. فالأدوار قوية جداً.
ابتدينا نشوف أدوار نسائية كتير في شخصيات قوية جداً، وده ابتدى يتنفذ ويتشاف في الدراما المصرية مؤخراً.
- في رمضان 2018 عملت شخصية آسر في نسر الصعيد، وكان راجل خاين، تفتكر ليه الخيانة ساعات الستات هي اللي بتتلام عليها في مجتمعنا لما الراجل بيخون؟ رأيك ايه في الموضوع عموما؟
علشان إحنا مابنجزأش الأمور دائماً بناخد كل حاجة كدة على بعضها، الست ممكن تكون عامل بيأدي للخيانة لما تهمل الراجل وتضمن وجوده؛ لكن مفيش أي حاجة بتبرر الخيانة، الراجل اللي بيخون بينسى نفسه ودي غلطته ماحدش غيره يتلام عليها مهما كانت الظروف.
- من وجهة نظرك ليه الخيانة بالنسبة لناس فعل طبيعي عند الراجل لكن بيبقى فعل مشين وكبير أوي لما الست تخون؟
في المجتمع العربي دلوقتي دائماً بنقول إن البنت زي الولد لكن مابنطبقش الكلام ده، أنا مقتنع إننا دلوقتي في 2019 بقى في أجيال جديدة بفكر مختلف، وطريقة تعليم جديدة، وتربية مختلفة. فدلوقتي في ناس تفكيرها مش كدة، زي ما هاتتصرف مع الراجل هاتتصرف مع الست، لو الست بتبقى مستعدة تسامح الراجل على الخيانة يبقى الراجل كمان لازم يكون عنده استعداد يسامح. لكن المفروض مايبقاش في خيانة من الأول!
- لو كان عندك ولد وبنت هاتربيهم بنفس الطريقة؟ ولا البنت مثلا هترجع البيت بدري عن الولد؟
هاجي على الولد شوية. أنا لو كنت اتسألت السؤال ده من خمس سنين كنت هاقولك إن الولد يرجع براحته وهو المسؤول عن نفسه غير البنت. لكن بعد ما تفكيري بدأ يتطور وبقيت أسافر كتير أشوف ثقافات مختلفة وطرق تربية مختلفة؛ أنا شايف إن الولد ممكن يرجع متأخر، لكن أنا هاخليه يرجع بدري شوية علشان مايبقاش في اختلاف بين الولد والبنت.
- مين الست اللي أثرت في حياتك وانت صغير أو دلوقتي؟
أمي؛ علشان هي اللي عملتني وهي السبب إني أوصل لكل ده دلوقتي، هي اللي كانت بتيجي على نفسها علشان نبقى أحسن، دخلتني الجامعة الأحسن حتى لو ده ضغطنا مادياً شوية، فدائماً أمي متهورة في قرارتها لمصلحتنا، يعني دلوقتي أنا عايزاك كويس وأحسن مش مهم بكرا هايحصل إيه، فأنا دائماً كنت ببقى كويس بسببها.
- ايه هو فيلمك المفضل؟
كل أفلام محمود عبد العزيز، كل فيلم بشوفهوله بحس إني قاعد في درس بتعلم.
