كل أُم جديدة بتواجه تحديات كتير، تحديات إما إنها تكسرها أو إنها تقويها وتشكل شخصيتها. كوني أم لتوأم بيخليني أواجه صعوبات كتير، وساعات كتير بفكّر في الإستسلام والإنهيار. لكن لما بسمع قصص وحكايات أمهات تانية بيمرّوا بمواقف أصعب بكتير من المواقف اللي أنا بعيشيها، بيلهموني أكمّل وماستسلمش. علشان كدة حبيت أحكيلكوا قصة أُم جميلة لطفلين توأم، ألهمتني أنا شخصياً وغيرت كتير في حياتي.
في مقولة مشهورة عندنا بتقول إن “أولادنا هما نور عنينا”، وفي حين إن الجملة دي ممكن تبقى مُجرد كلام بالنسبة لناس كتير، لكن بالنسبة لسارة فهي أكتر جملة حقيقية في حياتها.
حكاية سارة:
من حوالي أربع سنين بدأت احس بألم شديد في رقبتي، ماكنش له أي تفسير؛ روحت لدكاترة كتير جداً في تخصصات مختلفة، بس ماحدش فيهم كان عارف الألم ده سببه إيه. الألم بدأ يأثر على الرؤية عندي، وفي يوم من الأيام صحيت ولقيت إني مش عارفة أشوف غير بعيني الشمال بس. روحت لأحسن دكاترة في العالم بس برضه ماكنش حد عارف ليه ده حصل. رجعت مصر وأنا حاسة بإحباط، لكن قررت إني ماخليش اللي حصل ده إنه ينهي حياتي.
كنت عايزة أعيش حياة طبيعية، وأكون معتمدة على نفسي، وأفضل ناجحة في شغلي. كل ده ماكنش سهل، واجهت تجارب فاشلة كتير وعوائق بس ربنا كان دايما ًبيديني القوة إني أكمّل. أنا مؤمنة جداً إن السعادة قرار، ده الشعار اللي ماشية بيه في حياتي. إنتي اللي بتقرري تعيشي سعيدة ولا لأ، مهما كانت ظروفك وهمومك اللي شايلاها في قلبك. لما عرفت إني فقدت عيني اليمين، ماكنتش عايزة إن دي تبقى الحاجة اللي أنا معروفة بيها. أنا طول عمري ست قوية ومستقلة ومعتمدة على نفسي، والحمدلله كنت شاطرة جداً في شغلي فكنت حابة أكمل حياتي بنفس الشكل اللي كانت ماشية عليه.
أنا مؤمنة جداً إن السعادة قرار، ده الشعار اللي ماشية بيه في حياتي. إنتي اللي بتقرري تعيشي سعيدة ولا لأ، مهما كانت ظروفك وهمومك اللي شايلاها في قلبك.
علّمت نفسي إزاي أستعمل اللابتوب بعين واحدة بس علشان كنت عايزة أفضل ناجحة في شغلي، اتعلمت إزاي أسوق بعين واحدة علشان ماكنتش عايزة أعتمد على أي حد. والحمدلله بعد شوية وقت قدرت أعمل كل حاجة لوحدي.
لفترة كبيرة كنت مضطرة آخد جرعات كبيرة من الكورتيزون، اللي بدوره أثر على هرموناتي، وبالتالي ماكنتش عارفة أحمل. بس عمري ما اشتكيت لأي حد غير ربنا. ويمكن ده السبب اللي خلاني أفضل متمساكة وقوية.
بس عمري ما اشتكيت لأي حد غير ربنا.
بعد كام شهر، عرفت إني حامل في توأم. وبقيت عايشة حياتي ومستمتعة بكل تفصيلة فيها، ودايماً بتمنى من ربنا إنه يحافظلي على عيني الشمال علشانهم بس.
بعد كام شهر، عرفت إني حامل في توأم. وبقيت عايشة حياتي ومستمتعة بكل تفصيلة فيها، ودايماً بتمنى من ربنا إنه يحافظلي على عيني الشمال علشانهم بس.
علشان كدة حابة أقول لكل أم، مهما كانت الصعوبات والتحديات اللي بتواجهيها في حياتك، لازم تفضلي قوية، وماتتكسريش ولا تستسلمي أبداً، إنتي الوحيدة اللي تقدري تقومي نفسك بعد كل مرة تقعي فيها، وتستمري في حياتك أقوى من الأول بكتير.
ترجمة: تسنيم عبدالله
