نرمين النمر، خريجة الإعلام اللي كمان كملت دبلوم دراسات عليا في التسويق من الجامعة الأمريكية، اشتغلت لمدة 8 سنين في مجال التسويق والعلاقات العامة، بعد كدة اشتغلت في منظمة غير حكومية بتشتغل على تمكين قطاع تكنولوجيا المعلومات والاتصالات في مصر، بعد كدة اخدت القرار اللي غير كل شئ للأبد، نرمين قررت انها تشتغل كفريلانسر (تبقى عامل مستقل)، بس مالاقتش منصة مصرية تدعمها، وبروح المبادرة قررت نرمين أنها تبدأ رحلتها بتأسيس منصة الحريفة، وبناء مجتمع للفريلانسرز في مصر، الحريفة دلوقتي بتتعامل مع اكتر من 26 ألف فريلانسر وصاحب مشروع.
ايه اللي خلاكي تغيري شغلك من دوام كامل لفريلانس؟
المرونة في الشغل من حيث الوقت والمكان، وانا عانيت قبل كدة من نظام الإدارة في الشركات.
احنا بنركز على أننا نبني مجتمع نشيط عشان عشان يدعموا بعض في شغل الفريلانس مش بس إننا نعمل منصة توظيف
ايه الاختلاف ما بين المنصات المحلية زي الحريفة والمنصات العالمية زي Fiverr و Upwork؟
الحريفة ابسط منصة بتدي دعم محلي للفريلانسرز وفواتير خاضعة للضرائب للعملاء، احنا بنركز على أننا نبني مجتمع نشيط عشان عشان يدعموا بعض في شغل الفريلانس مش بس إننا نعمل منصة توظيف، احنا بننظم اجتماعات اونلاين وعلى الأرض ومحاضرات عشان نشارك خبرات أفراد المجتمع، بنعمل ورش عمل وفعاليات في معظم محافظات مصر، وكل يوم بنتكلم مع شباب من مختلف الخلفيات التعليمية.
الحريفة كمان بتدعم السيدات العاملات من البيت عشان يلاقوا انسب شغلانة عن بعد ليهم، عندنا قصص نجاح كتير مع ستات اضطروا انهم يسيبوا شغلهم عشان يخلوا بالهم من بيوتهم وأولادهم.
انا مؤمنة ان دي حاجة بتكبر في الشرق الأوسط، الإحتياج موجود والفرص موجودة، خصوصاً بعد الكورونا
ثقافة الفريلانس لسة ما انتشرتش اوي في مصر خصوصاً عند الأجيال الأكبر في السن، شايفة ان ده ممكن يتغير ازاي؟
الفريلانس أسلوب شغل بيوفر مرونة كبيرة للعاملين، وبيساعد أصحاب المشاريع انهم يخفضوا التكلفة، لأن مافيش حاجة لتأجير مكاتب كبيرة أو دفع فواتير كهرباء او اي مرافق، جيه الوقت اللي نركز فيه على النتائج ومخرجات المحترفين، وانا مؤمنة ان دي حاجة بتكبر في الشرق الأوسط، الإحتياج موجود والفرص موجودة، خصوصاً بعد الكورونا.
الشغل الفريلانس سمعته في مصر انه فيه مجازفة، بسبب ان أوقات العميل ممكن يختفي او يغير رأيه في اتعاب الفريلانسر، في رأيك ايه الخطوات اللي لازم تتاخد عشان ننظم الشغل الفريلانس ونحمي حقوق العامل والعميل؟
الحريفة منصة تعمل بالكامل للفريلانسرز والعمل عن بعد قادرة على توفيق العميل مع الفريلانسر وإجراء الدفع مقدماً قبل ما يخلص المشروع لضمان حقوق الجانبين، احنا بندير عملية التوفيق كلها لحد مايخلص الشغل، عشان نتأكد ان عملاؤنا والفريلانسرز راضيين.
عملاؤنا والفريلانسرز بيمضوا عقد بيتضمن نوع الشغل والجدول الزمني والميزانية وعدد مرات المراجعة لتجنب أي سوء تفاهم.
ايه خططك المستقبلية للحريفة؟
احنا بدأنا نوفر خدماتنا للمملكة العربية السعودية والكويت والإمارات العربية المتحدة، وخطتي المستقبلية هي اننا نوفر خدماتنا في كل أنحاء الشرق الأوسط وشمال إفريقيا، أنا مؤمنة اننا نقدر نعمل ده، احنا كمان عايزين نخلق مجتمع متكامل للفريلانسرز ومركز بيانات قادر على توفير كل المعلومات اللي ممكن يحتاجها مستخدميننا في أي من المجالات المختلفة اللي بيشتغلوا فيها.
اتعرفوا أكتر على الحريفة من خلال موقعهم.
