كوني مسلمة بتمارس اليوغا، ماخدتش وقت طويل علشان ألاحظ أوجه التشابه الكثيرة بين الاثنين. على الرغم من أن اليوغا مش ديانة، إلا أنها لا تزال تحتوي على العديد من الممارسات الروحية اللي هدفها تهدئتك ومساعدتك لحالة من الصفاء والسلام الذهني.
المالا وسبحة الصلاة
في الإسلام عندنا حاجة اسمها “السبحة”: عبارة عن خيط متعلق فيه تسعة وتسعين خرزة اللي بتمثل أسماء الله الحسنى اللي عددها تسعة وتسعين؛ بتساعد على التركيز والراحة النفسية.
أما المالا فهي شبيهة جداً ليها؛ برضه خيط، بس عادةً بتبقى مكونة من 108 خرزة. بتعتبر طريقة من طرق التأمل. ممارسين اليوجا بيستعملوها لتكرار “المنترا”، أو خلال الترانيم. بتساعد على تقليل التفكير، وبتخلي عقلك حاضر في الحاضر.
أوقات الصلاة وأقوات التأمل
المسلمين بيصلوا خمس مرات في اليوم –الفجر، الظهر، العصر، المغرب، والعشاء. في أربع أوقات في اليوم بتبقى أحسن وقت للتأمل، وهما الفجر، الظهر، المغرب، والعشاء.
الإتنين متشابهين جداً لإن هي دي الأوقات المثالية للتركيز والاسترخاء. وضع الشمس بيساعد على تحقيق التوازن بين الغدة النخامية والغدة الصنوبرية –اللي بيخلق نتيجة ممتازة. ومن الأفضل تتأمل كل يوم في الأوقات دي علشان تدرب عقلك، وزي الصلاة، تخلي اليوجا جزء من روتينك اليومي.
لقيت إن التأمل بعد الصلاة على طول بيخليني أحافظ والتزم بالإتنين.
الصيام
الصيام جزء كبير من الإسلام؛ من الفجر لحد الغروب بنمتنع عن الأكل، والشرب، وحاجات تانية كتير من متع الدنيا.
الصيام في اليوجا مختلف شوية بس لسة في شبه. في أنواع كتير للصيام، منها صيام بيتضمن صيام الفاكهة أو العصير، وفي صيام الصمت، وغيره كتير.
المقصود بالصيام بشكل عام هو إيقاظ الحواس الثانية – وقت للاهتمام بكيانك الروحي. بحب أفكر في الموضوع على إنك بتجوع جسمك علشان تغذي روحك.
وضعيات الصلاة وتمرين تحية الشمس
وضعية الوقوف، الركوع والجلوس: كل دي أركان أساسية في كل من الصلاة وفي تمرين تحية الشمس، لإن الإتنين أهمية روحية، وفوائد بدنية. بتحسن وضعيات الجسم، وبتساعد على تنشيط الدورة الدموية، وتدليك الأعضاء الداخلية ، بالإضافة لفوائد تانية كتير.
فعل الأشياء على الجانب الأيمن
من المستحب في الإسلام إننا نعمل الحاجات بجانبا اليمين –ندخل أوضة، ناكل بإيدينا اليمين أو ننام على جنبنا اليمين. ناس كتير بتعمل كدة لإنه “سنّة”، مع إن في أبعاد تانية للموضوع ده.
اليوغا متشابهة إلى حد بعيد – تبدأ تسلسل من الجنب اليمين ، والتمرير إلى الجانب الأيمن في “سافاسانا” ، وينصح كمان بالنوم على جنبك اليمين.
خلينا نأخذ نظرة مفصلة أكتر عن النوم على الجنب اليمين: من فوائده إنه بيقلل من الضغط على قلبك ، وده بيساعد على تحييد ضغط الدم. النوم على يمينك بينشط قنوات الطاقة اللي بتساعدك على الاسترخاء ، وبيدي إحساس أكثر بالتبريد.
كتب: ديانا فابرج
ترجمة: تسنيم عبدالله
