الاكس هو اللي هيساعدك في علاقتك اللي بعده

ليه دايمًا بختار الشخص الغلط؟

هعدي بكام تجربة فاشلة لحد ما أوصل للصح؟

هو لازم كل العلاقات تبقى بتوجع؟

أنا عندي commitment issues أو عقدة من الالتزام. هو ده الشخص المناسب؟

 

دي كلها حاجات بسمعها كتير من العملاء في الجلسات النفسية اللي بنعملها. الإجابة لكل سؤال من دول هي رحلة بحث واكتشاف بتختلف من شخص للتاني. بس دايمًا في حاجة واحدة ثابتة، الخوف من الوجع. في ناس بتبقى خايفة طول ما هي في العلاقة وناس قدرت تتغلب على الخوف ده وتستمتع بالعلاقة اللي هي فيها، طب إزاي قدروا يوصلوا لده؟

 

في الأول خلينا نتفق إن كل اللي بنتعلمه عن الحب والعلاقات واحنا بنكبر ده اسمه البرمجة العاطفية. البرمجة دي هي اللي بتحدد مين اللي نرتبط بيه وشكل الحب اللي عايزينه. لما البرمجة العاطفية بتاعتنا تبقى مليانة وجع وتجارب مؤلمة وسلبية، ده بيأثر في العلاقة بتاعتنا. فلو احنا دايمًا بنختار الناس الغلط، ده معناه إننا بنتشد للناس اللي بيأذونا وبيخرجوا أسوأ ما فينا، عيب البرمجة بتاعتنا! مع الوقت بنبدأ يبقى عندنا فوبيا من الارتباط وفي كل مرة بنقابل شريك محتمل، بنفضل نسأل نفسنا هل ده الشخص المناسب ليا؟ النتيجة بتبقى دايرة من التعب والعلاقات المؤلمة.

 

احنا عادةً متبرمجين على إننا نبعد عن الوجع. طب إزاي في الأخر بنوصل إننا نبقى في علاقات مؤذية لو احنا بنبقى عايزين نبعد عن الوجع؟

 

بما إن 95% من البرمجة العاطفية بتاعتنا بتبقى في اللاوعي، احنا مبنبقاش مدركين الاختيارات اللي بناخدها وازاي ممكن تحطنا في مشكلة. غير كدة، احنا معندناش معرفة كافية بفن وعلم العلاقات. في الأخر، بنبقى خايفين. لكن احنا لسه عندنا 5% واعيين بيه في البرمجة العاطفية بتاعتنا ونقدر نستغله في إننا نبنى علاقة سليمة وإيجابية. إزاي؟

 

اقفوا شوية وفكروا في التجارب المؤلمة. ليه اختارتوا الشريك ده؟ إيه اللي شدكوا ليه؟ وإيه اللي شده ليكوا؟ امتى بدأت تظهر المشاكل في العلاقة؟ إيه المبادئ المشتركة اللي كانت بينكوا؟ إيه المبادئ اللي اختلفتوا فيها؟ إيه الاحتياجات اللي كانت عندكوا وتغاضيتوا عنها؟ إيه الاحتياجات اللي كانت عند شريككوا وانتوا تجاهلتوها؟ وليه؟ ركزتوا على الحاجات المشتركة بينكوا؟ تعاملتوا مع اختلافاتكم إزاي؟ إيه اللي نقلتوه من تجاربكم القديمة للتجربة دي؟ والسؤال الأهم: إيه اللي اتعلمتوه من التجربة اللي فاتت عن نفسكوا؟

عشان احنا ببساطة مخلوقات اجتماعية، علاقاتنا مع شخص تاني ده جزء أساسي من وجودنا في الحياة. بننمو ونتبسط في علاقة سليمة وصحية ومُرضية وبنعاني في العلاقات المؤذية. عشان كدة، بنبقى عايزين نوصل للعلاقة السليمة وبنخاف من وجع الفشل. بالنسبة لمعظمنا، على الأقل في علاقة واحدة خوفتنا، وسابتنا في الخوف من تجربة الوجع تاني في علاقاتنا الحالية أو اللي جاية.

 

إجاباتكوا للأسئلة اللي فوق هتحدد انتوا هتبقوا مين في العلاقة وتحدد قد إيه الوجع اللي فات علمكوا. هتبين قدرتكوا على التعلم والنضج كشريك في علاقة صحية. محتاجين تقدروا اللي اتعلمتوه من التجارب المؤلمة اللي فاتت وتبقوا واعيين عن العلاقات، ساعتها هتقدروا تستمتعوا بالعلاقة اللي حلمتوا بيها. خلوا الوجع بتاعكوا هو اللي يعلمكوا.

No Comments Yet

Leave a Reply

Your email address will not be published.