الأم على الجروبات
“أنا عندى طفل صغير وراجعة الشغل ممكن ترشحولى حضانة؟”
“أنا محتاجة خد يرشحلى حضانة فيها أفتر سكول عشان باص المدرسة ينزل الأولاد هناك لحد ما أرجع من الشغل”
السؤالين دول بشوفهم بقالى سنين فى جروبات الأمهات اللى على الفيسبوك وأقدر أقول إن 80% من الردود ملهاش علاقة بالسؤال لأنها بتكون كالتالى:
- حرام عليكى البيبى لسة صغير إنتى ليه مستعجلة على الرجوع للشغل!
- هتندمى على فكرة كل لحظة بتضيع منك مع ولادك عمرك ما هتقدرى تعوضيها
- أنا بنت أخو مرات عمى ودت إبنها وهو لسة صغير حضانة وجاله دور زكام
- يعنى إيه ولادك يطلعوا من المدرسة يروحوا حضانة هما معندهمش بيت يرتاحوا فيه؟
- سيبى الشغل … سيبى الشغل … سيبى الشغل
- لو مش محتاجة الشغل سيبيه
- مفيش شغل فى الدنيا يستاهل إنك تسيبى ولادك
- إنتى كدة هتشتغلى سواقة بتودى حضانة وتروحى الشغل وتجيبى من الحضانة
ياختاااااااى على المزايدة!!! أقسم بالله العظيم إن ولا واحدة من دول إجابة السؤال! إنتو عارفين الأم دى إيه اللى هتحس بيه ويحصلها بناءاً على ردودكم؟ هتنام إزاى بليل وهتحس بإيه لما ينزل عليها سيل اللوم والعتاب والتقطيم ده؟
كيف مش كم
العلاقة بين الأم وأولادها مش بتتقاس! لا بالكيلو وبالمتر ولا بعدد الساعات اللى بتقعدها معاهم. الموضوع كله كيف مش كم. أنا ممكن أقعد معاهم ويبقى فى إيدهم موبايل ولا تاب بالساعات وكارتون عبيط طول اليوم بيتفرجوا عليه وبياكلو نجيلة حمضانة. حلو كدة أنا ألأم المثالية اللى ضحت بكل حاجة عشان ولادها؟!
مؤكد مش كل الأمهات اللى مش بتشتغل عشان تتفرغ لأولادها أمهات عظيمة ولا كل الأمهات اللى إختارت إنها تفضل تشتغل أمهات فاشلة.
فى ستات محتاجة الشغل سواء عشان الفلوس أو نفسيها أو يمكن مش حاسة بالأمان مع الإنسان اللى عايشة معاه والشغل ده تذكرة السفر بتاعتها؟ وفى أمهات لا تنطبق عليهم أى حاجة من دول لكن بتحب شغلها تخيلوا؟ بيحسسها إنها سعيدة وسعادتها دى بتنعكس عليها كأم وتخليها أم أحسن لأولادها ومثل أعلى جميل ليهم يحبوا إنهم يكونوا شبهه أما يكبروا.
الخلاصة
الكواليتى تايم اللى بنقضيه مع أولادنا ده ليه أسس محددة وبيبقى علاقة جميلة بيننا وبين الأولاد سواء بنشتغل ولا لأ. أغلب الأمراض النفسية مرجعها الطفولة وعلاقة الطفل بالأب والأم. المحافظة على التوازن الخاص بالأم بين البيت والأولاد من ناحية و الشىء الي هى بتتمنى تعمله في حياتها من الناحية التانية مش سهل ومش أى حد بيقدر يحققه بس والله فى ستات بتحققه وبتبقى بتقوم بأدوار عظيمة تستاهل عليها كل التقدير.
مش معنى إن فى واحدة إختارت بحريتها إنها ماتشتغلش إنها فشلت ولا بالضرورة إن اللى بتشتغل نجحت. النجاح على المستوى الإنسانى ملوش علاقة بالشغل. بس اللى أنا بتمنى من كل قلبى إن كل الستات بصفة عامة والأمهات بصفة خاصة إنهم يفهموه هو إن مش معنى إن إختيارى مختلف أو منجحتش فى التوفيق بين حاجتين إن الطريقة الوحيدة الصح هى إن كل الستات تعمل زيى. كل ست من حقها تختار وياريت بعد كدة يبقى الرد على أد السؤال عشان منبقاش بنزايد على بعض وبنحط على واحدة ملهاش ذنب غير إنها سألت عبء محاولة إقناع جمهور السوشيال ميديا إنها أم كويسة ومش مصاصة دماء.
أنا ريجينا عنانى لايف كوتش وبركز أكتر على مواضيع اللايف ستايل والكاريير. أنا من HR الطيبيين وإشتغلت في شركات مختلفة جوّة وبرة مصر.
عندي إدمان للكتب وشرب القهوة! أنا بحب أقدم محتوى مختلف مبنى على خبرتي.
إيه أكتر حاجة نفسي فيها؟ نفسي أشوف ستات اكتر فى مناصب مؤثرة وعندهم فرص لامتناهية في النمو والنجاح.
