إحنا مستغنيين عن خدماتك!

هاتعملي إيه لو مديرك قرر إنه يقلل العمالة في الشركة، تفتكري كدة حياتك وقفت؟ لأ ماوقفتش لأن دي مش نهاية العالم. الموقف كله ممكن يعدي بكل سلاسة لو عرفتي تتعاملي صح. ولحد ما تعرفي موقفك إيه في الشركة، في شوية نصايح هاتساعدك تتكيفي مع الوضع:

  • اتأكدي إن يكون ليكي دور بيساعد الشركة، بيحسن وضعها المادي، وبيزقها لقدم مش بيعطلها.
  • خلي وجودك له قيمة كبيرة، ومؤثر بشكل ملحوظ بحيث إنه يكون صعب على مديرك إنه يتخلى عنك.
  • اشتغلي على المشاريع المهمة اللي ليها أولوية في الشركة، واعملي الشغل التقيل اللي ممكن موظفين كتير يكسلوا يعملوه.
  • وسعي دايرة علاقتك، واتواصلي مع ناس تانية بيشتغلوا في نفس مجالك.
  • دايماً اتعلمي حاجة جديدة، خدي كورسات وشهادات تضيف لشغلك وللـCV بتاعك.
  • اهتمي بالـCV بتاعك وضيفي عليه أي مشروع اشتغلتي فيه أول بأول، علشان ده أول حاجة هاتحتاجيها لو قرروا يمشوكي.

ولو حصل وفعلاً مديرك قرر إنه يستغنى عن خدماتك، في الغالب هايديكي مُهلة من شهر لـ تلات شهور تظبطي فيها أمورك، الفترة دي لازم تستغلي كل يوم فيها وتدوري على شغل تاني، خصوصاً لو كان عليكي إلتزمات واقساط؛ ولحد ما تلاقي شغل في 4 خطوات ممكن يساعدوكي تعدي الفترة دي بأقل خساير ممكنة:

1- عرّفي الناس إنك بتدوري على شغل، نزلي في لينكد إن أو تويتر أو حتى فيسبوك إنك سبتي شغلك وبتدوري على شغل جديد.

2- قيّمي وضعك المادي، إيه اللي ممكن تستغني عنه الفترة دي، وإيه الضروريات والأولويات.

3- لو في مبلغ كنتي دايماً بتحوشيه من مرتبك، ده هايساعدك تكملي الفترة دي.

4- ادي فرصة لمشاعرك، ضيقتك، وغضبك انهم يطلعوا؛ علشان ماتقضيش الفترة دي كلها كاتمة في قلبك ومضغوطة نفسياً.

إن شركتك تستغنى عنك دي فعلاً مش نهاية العالم، ولا قرار علشان عيب في شخصيتك أو في شغلك؛ ممكن يكون ظرف مؤقت وترجعي لمكانك تاني. لكن حتى لو ده ماحصلش أكيد هاتلاقي فرص تانية كتير هاتفتحلك مجالات أكتر، وممكن تخلي حياتك أحسن كتير عن اللي كانت عليه في شغلك القديم.

 

ترجمة: تسنيم عبدالله

No Comments Yet

Leave a Reply

Your email address will not be published.