إنك تبقي أم لوحدك دي وظيفة من أصعب الوظايف في العالم. أصل إنتي بتقومي بدور الأم والأب، بدور اللي بيشد واللي بيرخي واللي بيصرف.
كل المسؤوليات عليكي في نفس الوقت. لازم يبقى عندك دخل كويس عشان تعرفي تصرفي على نفسك وعلى ولادك. ومش بس كدة كل القرارات الكبيرة والفارقة في حياة عيلتك بتكون مسؤوليتك إنتي وبس. دايماً إنتي صاحبة الكلمة في إيه الأحسن والمناسب ليكي ولولادك. والأصعب من كل ده هو نظرة المجتمع، لان المجتمع في مصر شايف إن أحسن حاجة للولاد إنهم بتربوا وسط أم وأب، وإن أي زوجين لازم يكملوا مدى الحياة حتى لو الحياة بينهم مستحيلة. وبينسوا خالص إن مش دايما الحاجات بتمشي زي ما إحنا عايزين، وإن كتير الإنفصال بيكون أحسن للأولاد من إنهم يكملوا في بيئة مؤذية نفسياً. وفي نظر المجتمع أي حد مش بيمشي على القاعدة دي، بيتعرض لإهانات وأحكام من المجتمع وبالذات لو كانت ست.
اتكلمنا مع بطلات حقيقات فجأة لقوا نفسهم في الدايرة دي، سوزان ورويدا ونرمين؛ عرفنا وجهة نظرهم بالنسبة للموضوع من ناحية القانون والشغل وكمان العلاقات.
الستات ابتدت تاخد بالها إن مصر مفيهاش قوانين قوية بتحمي الست، لما بتبقى لوحدها، وحق الرعاية والحضانة كتير بيظلم الست والطفل. ده كان رأي سوزان إنما رويدا كانت شايفة إن اللي أهم من القوانين إن الوالدين يكونوا بينهم احترام لبعض وإنهم يبقوا على قدر من الوعي يخليهم يطلعوا ولادهم برة مشاكلهم. أما سوزان فكانت شايفة إن أسوء مخاوفها إن القانون يبعدها عن إبنها حيث إنها عرفت إن القانون بينُص على إن الولد يفضل مع أمه لحد عمر ست سنين غير البنت اللي بتفضل مع أمها بعد السن ده ودي حاجة رعبت سوزان. نرمين هي أم لطفل عنده تلات سنين وبتزعجها جداً فكرة إن لو عمرها فكرت تتجوز إبنها مش هيبقى معاها، مع إن مفيش حد يقدر يعوض دور الأم أبداً.
أما سوزان فكانت شايفة إن أسوء مخاوفها إن القانون يبعدها عن إبنها حيث إنها عرفت إن القانون بينُص على إن الولد يفضل مع أمه لحد عمر ست سنين غير البنت اللي بتفضل مع أمها بعد السن ده ودي حاجة رعبت سوزان.
أما بالنسبة للشغل كلهم كانوا شايفين إن يبقى عندك شغل ثابت، بساعات عمل محددة، مع واجباتك ومسؤولياتك حاجة صعب جداً، بس في نفس الوقت مطلوبة جداً. صعبة من ناحية إنك مابتقدريش تكوني موجودة جنب أولادك في كل حاجة، وضرورية علشان توفرلها كل إحتياجاتهم وطلباتهم، من غير ما تحتاجي لحد.
مريم حبيب هي أم لطفل عنده ست سنين، بتقول: ” بشتغل من ٩ لـ ٥ بس بحاول طول الوقت إني أكون موجودة مع ابني خصوصا إنه معايا تلات ايّام بس وباقي الأسبوع مع باباه، ف بفضل أجهز للتلات أيّام دول طول الأسبوع.” فـ أهم حاجة يبقى عندك مرونة في شغلك وإن مديرك يبقى عارف كل ظروفك. مريم بتقول: قلت لمديري على ظروفي من اول يوم شغل عشان ميحصلش مشاكل. كان لازم أكون واضحة وصريحة من البداية”.
أما بالنسبة للعلاقات كلهم أجمعوا إن اهم حاجة الشخص اللي معاكي يبقى عارف ظروفك بالظبط، وإيه مسؤولياتك وأولولياتك وقد إيه ولادك مهمين في حياتك. وده بيحافظ على التوازن في الحياة. رويدا شايفة إن كونها أم عزباء مامنعهاش إنها تكوّن علاقات زيها زي أي حد. نرمين كانت شايفة أن الست دايماً محتاجة اهتمام، بس لازم يكون في توازن، وتبقى عارفة إيه الحاجة رقم واحد بالنسبالها.
رويدا شايفة إن كونها أم عزباء مامنعهاش إنها تكوّن علاقات زيها زي أي حد. نرمين كانت شايفة أن الست دايماً محتاجة اهتمام، بس لازم يكون في توازن، وتبقى عارفة إيه الحاجة رقم واحد بالنسبالها.
كلهم في الآخر أجمعوا إنهم بيواجهوا تحديات، خصوصا كونهم لوحدهم. وكان عندهم نصيحة لأي أم وبالذات الأم اللي عايشة لوحدها: لازم تبقي صبورة ومؤمنة ومقتنعة إن لا يصح الا الصحيح. أه كل حاجة ليها تمنها، بس كل حاجة بتظبط في الآخر. وإنك ماينفعش تبقي مكسوفة ولا تسيبي العالم يوصمك أو يحكم عليكي، لإن مفيش حاجة هاتوقفِك، او مش تقدري تعمليها.
