كلنا ساعات بييجي علينا وقت نزهق من البلاي ليست بتاعتنا وبنبقى بندور على نوع مزيكا جديد نسمعه وأصوات مختلفة غير اللي متعودين عليهم. لو انتوا من النوع اللي دايمًا بيدور على أغاني مختلفة تسمعوها، فهنا هتلاقوا أصوات ممكن تتابعوها عشان تسمعوا حاجات مختلفة.
محمد سعيد
من الناس اللي بدأت تظهر بشكل واضح في السنة اللي فاتت، وبدأ يعلم مع ناس كتير لأن المزيكا اللي بيقدمها مختلفة وليه ستايل بتاعه هو بس سهل تميّزه بسرعة. المميز جدًا في سعيد إنه بيعمل كل حاجة في الأغاني بتاعته، من كلمات ولحن وتوزيع وإنتاج وده أكيد بيشرح ليه أغانيه ليها طابع مختلف مش شبه الأغاني التانية.
مصطفى رزق
الفن النوبي ده نوع معروف بس ده مش الاتجاه اللي خده مصطفى رزق في الغُنا رغم كونه من أصل نوبي. الميكس اللي بيقدمه مصطفى مختلف لأنه جمع بين الجاز مع الأصالة المصرية في كلماته وصوته وده اللي بيخليه مغني مختلف لازم نركز معاه أكتر.
جاوي
هي مش فرقة جديدة بس اللي بيقدموه مختلف. جاوي هم باند بيركزوا على الكلمات بشكل أكبر والأغاني اللي بيعملوها بتبقى ميكس بين الألحان الشرقية اللي معظمها جاي من الجنوب والإيقاع الغربي.
نوران أبو طالب
“يا غالي” هي أغنية لفرقة جيتارا سمعناها في الفترة اللي فاتت بصوت مختلف وانتشر الفيديو بتاعها بشكل كبير بالذات على فيسبوك وبقى من أشهر ال covers اللي اتعملت في الفترة الأخيرة. نوران، مغنية الكوفر، هي بنت من عيلة فنية اتربت على الموسيقى المختلفة وخدت الموضوع بشكل احترافي أكبر بعد انضمامها لفرقة الجامعة للغُنا. نوران بتعمل حفلات في أماكن مختلفة وأقرب حفلة ليها هي يوم 14 فبراير في معهد الموسيقى العربية.
