أحمد مراد مش بس الروائي صاحب الروايات الأكثر مبيعاً في مصر، أحمد مراد كان دايماً بيتفنن في إنه ينقلنا بكل خفة لعالم تاني من صنعه، نعيش فيه تفاصيل مُبهرة ومختلفة، أفكاره اللي دايماً بتغرّد برّه السرب، هي نفسها اللي قدرت تغيّر مسارات حياتنا، وتأثر فينا على المدى الطويل.
إيه هي “الرجولة” من وجهة نظرك؟
في لغتنا، كلمة “رجلاً” معناها إنك تقف ثابت على رجليك في المواقف المختلفة، و”رجولة” فدي ممكن تبقى صفة عاملة تنفع تتقال عن الراجل والست كمان.
من وجهة نظرك، إيه هو تعريف المجتمع للـ “الرجولة”؟
الرجولة بالنسبة للمجتمع هي السيطرة، والتحكم في زمام الأمور. لازم الراجل كلمته هي اللي تمشي، وكل حاجة لازم تكون في إيده وتحت تصرفه، لإنه ببساطة “يقدر”.
هل في مفاهيم غلط عند المجتمع عن “الرجولة”
أكيد في، مثلاً فكرة إن الرجالة لازم تفضل متمسكة بمبادئها، ويرفضوا يغيروها أو إن حد يغيرهم فيهم؛ مع إنهم ممكن بسهولة جداً بتطورو مع الوقت والسن.
إيه مدى تأثير الأفكار دي على مجتمعنا؟
أي ولد بيتربى على فكرة إنه راجل، وأي بنت بتتربى على فكرة إنها تدرك رجولة الراجل، وبالتالي في أمهات كتير بيخلوا البنت تعمل أكل لأخوها أو تجيله مياه، وتروقله أوضته، ويبقى أسم الأم “أم فتحي” مع إنها بيبقى عندها نهى أو ناهد أكبر منه.
هل في حاجة كان نفسك تعملها وإنت صغير بس خفت من رد فعل المحتمع عليها؟
أحياناً كنت بحس إني ماينفعش أعيط، أو أشتكي، أو أتألم.
في رأيك إيه هي الأفكار الغلط اللي محتاجين نغيرها في مجتمعنا؟
محتاجين نبطّل نفكر إن الستات كائنات مختلفة تماماً عننا، وإنهم بيفتقدوا لصفات كتير عندنا، ومش أكفأ منّا. الفكر ده بيقف في طريق المساواة بين الراجل والست.
إيه هو دور الراجل في البيت؟
إنه يمارس رجولته من غير عنف، ولازم يكون في باله دايماً إن صوته العالي بيأثر على أطفاله سلبياً.
إيه النصيحة اللي تحب تقدمها لتربية الأولاد في المجتمع؟
لازم إبني يشوفني بعامل أمه بالطريقة اللي هي تستحق تتعامل بيها، يشوف حبي، وإحترامي ليها، من غير ما يفكر إن الحب ده حاجة عيب أو حاجة بتقلل منه.
كان إيه أسلوب أهلك في تربيتك كراجل؟
أنا مدين بكل اللي حققته في مشواري لكل الستات اللي في حياتي، لأمي اللي خلتني أقرأ، ولمراتي اللي شجعتني على الكتابة، ولبناتي اللي دايماً بيلهموني للطريق الصح.
ترجمة: تسنيم عبدالله
