أحمد حاتم ’’أمى فيها حاجات حلوه غصب عنى بقارنها بالناس اللى بتعامل معاهم‘‘

 

حوار: ريم جميل

أحمد حاتم من الناس اللي بتطور من نفسها بشكل واضح جدا. ممثل شاطر وفنان موهوب قدر يكسب أجيال مختلفة من الجمهور وده مش سهل بالذات انك تبدأ صغير وتكمل وتكبر في مجال المنافسه فيه شرسه ومافيش مكان للفنان “العادى”. إختياراته كلها ناجحه حتي لما حب يعمل اعلانات كانت تجربة حلوة جدا. كان نفسنا نعرف أحمد أكثر واتكلمنا معاه على كذا حاجه اهمهم الاختيارات الصعبة.

 

إيه تأثير السوشيال ميديا على حياتك ؟

أنا مش النوع اللى السوشيال ميديا ممكن تأثر أوى فى حالته النفسية ، بس للأسف السوشيال ميديا بقت بتدى مساحة لأى حد يقول اللى هو عايزه وده مش كويس طول الوقت. السوق كمان بقى بيدور على الناس اللى بيبقى عندها متابعين اكتر مهما كان طبيعة المحتوى اللى بيقدموه، ودى حاجة غير منصفة من وجهة نظرى، بس على مستوى تانى طبعاً هيه فادتنا كلنا فى الشغل.

إيه أكتر حاجة فيك نفسك تغيرها فى شخصيتك ومش عارف ؟

أنا شخص مش بيطلع اللى عنده بسهوله فى الحياة  أو فى الشغل، واللى جوايا أكبر بكتير من اللى بيطلع، فبحاول اشتغل طول الوقت على إنى أقدر اطلع اللى جوايا.

عمر كان عندك معجبة لدرجة إنها رعبتك ؟

كتير. وده حطنى فى موقف إن حد جالى من القسم بسبب بنت هربت وصورتى كانت على مكتبها، وده كان مريب جدا بالنسبالى، وفى نوع تانى اللى بيعمل حسابات مزيفة ويكلم ناس بإسمى ، لمجرد إنه يا إما بيحبك يا إما إنت مبتردش عليه فقرر يحاربك لحد ما يوصلك، وفى نوع تالت ممكن يعمل صفحة وينزل عليها حاجات بإسمك، ده غير البنات اللى ممكن تشتم لو إنت مع شخص فى حياتك ويوجهوا إهانات للشخص ده، وده مزعج جدا بالنسبالى.

كل ما بتكبر الإختيار بيبقى أصعب، إزاى بتقدر تختار أدوارك فى كل مرحلة ؟

على حسب إذا كنت بتعمل حاجة بتاعتك وإنت المسؤول عنها ولا بتعمل حاجة مع حد، دى حسابات بالنسبالى بتفرق، فى الحالتين أهم حاجة عندى السكريبت. بقراه كويس وأشوف الدور ده أقدر اطلع منه إيه، ممكن أبقى عامل فيلم بطولة، وفى نفس الوقت عامل دور مع حد تانى مش بطولة، بس ممكن يكون هيفيدنى.

إيه أحلى مرحلة فى حياتك ؟

المرحلة اللى كنت لسه بحاول أمثل فيها، اللى أخدت فيها كورس التمثيل 2005، وكنت لسه داخل الجامعه، خطوة إنى افكر إنى امثل وقتها كانت قويه جدا بالنسبالى.

تفتكر أوقات فراغ بيمثل أى حاجة للشباب دلوقتى؟

لأ طبعاً، جيل كامل إختلف. الجيل دلوقتى هيشوف إن لما حد يقوله لما اصحى هرن عليك، هيحس إنه قديم، مع إن ده فى وقتها كان عادى، الجيل دلوقتى بقى متطور عن جيل 12 سنة فاتت.

تجربتك فى “قصة حب” إيه اللى كان مختلف فيها عن الحاجات التانية؟

عادة أنا بطلع فى شخصيات عنيفة، قصة حب شخصية ممكن تتحب، شخص بسيط، طيب مضحى، إتعرض لأزمة بتأثر عليه بشكل كبير، وده مختلف عنى تماماً.

إيه الدور اللى كان نقلة فى مسيرتك الفنية ؟

مسلسل “إبن حلال” ومكنتش متوقع ده خالص، لإنه خلانى أتشاف أكتر من قبل كده، واللى ساعد إن الدور ده يتشاف إنه كان مختلف عن أى حاجة عملتها قبليه.

تجربتك فى الإعلانات فرقت فى إيه بالنسبالك ؟

أنا عملت إعلانين ظهروا بشكل كويس، وده طبعا فادنى فى شغلى.

إيه مفهوم الرجولة بالنسبالك ؟

الرجولة مسئوليه وإحترام سواء لأهلك أو لحبيتك، وأنا بشوف إن الراجل فى شغله حتى لو مش محتاج الفلوس، غنى أو فقير، لازم يبقى مقدر النعمة اللى هو فيها ويبقى شخص مسئول.

مين الست اللى كان ليها تأثير على حياتك ؟

أمى فيها حاجات كتير حلوه غصب عنى بقارن بيها فى الناس اللى بتعامل معاهم، وأنا بعتبر إنى محظوظ بيها وده فارق معايا فى حياتى ومخلينى مش شايل هم حاجة.

إيه النصيحة اللى تقولها للستات ؟

أنا شايف إن الإختيار دلوقتى بقى مرتبط بالسوشيال ميديا، بقى الراجل أو البنت بيختاروا شكل الحياة من بره اللى هما عايزينه، مش الحياة الحقيقية، إحنا بقينا عايشين لايك وكومنت وشير، وكل ما ده بيزيد بنحس إن إحنا أحسن وده مش حقيقى، الناس لازم تعرف بعض بجد، ميختاروش بعض من بره .

 

No Comments Yet

Leave a Reply

Your email address will not be published.