نيو لوك
صديقة عزيزة عليا قالتلى إنها إكتشفت إن جوزها يعرف عليها ست تانية. هى كانت شايفة إنها عاملة اللى عليها. هى واخدة بالها من بيتها وولاده بس يمكن تخنت شوية بعد الحمل والولادة. و قالتلى كتير إنها مستحملة أهله رغم إن أمه ولية حيزبون وكانت السبب فى فسخ خطوبته الأولانية. كمان قالتلى إنها بتحاول دايما تعمل تغييرات إيجابية فى حياتهم. ورغم إنها بتبقى تعبانة أخر اليوم من الجرى ورا العيال وشغلها اللى بتشارك بجزء من فلوسه فى مصاريف البيت، دايما بتحاول إن بعد ما الأولاد يناموا إنهم يسهروا سوا يتفرجوا على التليفزيون ولا يلعبوا كوتشينة.
قلتلها إنها متواجهوش ومفيش حاجة إسمها إنها تخرب بيتها. قلتلها تدور على بروفايل البنت دى على السوشيال ميديا وتشوفها بتلبس إزاى. واللوك بتاعها عامل إزاى وتحاول تبقى شبهها عشان تقرب من اللى جوزها حبه فى البنت دى. وأهم حاجة إنها تشغل نفسها! لازم تشغل نفسها عشان متضطرش تقعد تفكر أو تحس. هى ترس فى مكنة ولازم يفضل بيدور حتى لو مكسور. هي لو راحت جيم وعملت نيو لوك وإتعرفت على ناس جديدة ده كفيل بإنه ينسيها كل حاجة. مش مهم نحل المشكلة المهم نتشغل عنها. هى سمعتنى وسكتت لأن اللى قلتهولها هو نفس الكلام اللى قالته أمها وجارتها وصاحبتها، كلنا إتفقنا ضدها.
المشكلة فين؟
وقابلت صديق عزيز عليا قالى إنه إكتشف إن مراته تعرف عليه راجل تاني. هو كان شايف إنه عامل اللي عليه. هو واخد باله من بيته وولاده بس يمكن شعره وقع وبقى عنده كرش. و قاللي كتير إنه مستحمل أهلها رغم إن أمها ولية حشرية وكانت السبب فى فسخ خطوبتها الأولانية. كمان قالى إنه بيحاول دايما يعمل تغييرات إيجابية فى حياتهم ورغم إنه بيبقى تعبان أخر اليوم من الجرى ورا لقمة العيش عشان يلبي مصاريف البيت، دايما بيحاول إن بعد ما الأولاد يناموا إنهم يسهروا سوا يتفرجوا على التليفزيون ولا يلعبوا كوتشينة.
قلتله إنه ميواجهاش ومفيش حاجة إسمها إنه يخرب بيته. قلتله يدور على بروفايل الراجل ده على السوشيال ميديا ويشوفه بيلبس إزاى واللوك بتاعه عامل إزاى ويحاول يبقى شبهه عشان يقرب من اللى مراته حبته فى الراجل ده. وأهم حاجة إنه يشغل نفسه! لازم يشغل نفسه عشان ميضطرش يقعد يفكر أو يحس. هو ترس فى مكنة ولازم يفضل بيدور حتى لو مكسور. وبعدين هو لو راح جيم وعمل نيو لوك وإتعرف على ناس جديدة ده كفيل بإنه ينسيه كل حاجة. مش مهم نحل المشكلة المهم نتشغل عنها. هو سمعنى وقالى إنى مجنونة ومفهمش حاجة عن العلاقات بين البشر والكرامة.
المشكلة فى مجتمعنا إن الغلط مش فى الغلط نفسه، الغلط فى مين اللى بيعمله. لو اللى بتعمله ست يتعلقلها مشنقة ولو اللى بيعمله راجل ندعيله ونتمناله الهداية! وده خلقلنا أجيال من الستات اللى مهضوم حقهم ورجالة بيفلتوا بشتى أنواع الأخطاء.
فوقوا بقا!
أنا ريجينا عنانى لايف كوتش وبركز أكتر على مواضيع اللايف ستايل والكاريير.
أنا من HR الطيبيين وإشتغلت في شركات مختلفة جوّة وبرة مصر. عندي إدمان للكتب وشرب القهوة! أنا بحب أقدم محتوى مختلف مبنى على خبرتي.
إيه أكتر حاجة نفسي فيها؟ نفسي أشوف ستات اكتر فى مناصب مؤثرة وعندهم فرص لامتناهية في النمو والنجاح.
