أولاً، مبروك ع البيبي الجديد..
ثانياً، ماتتورتيش.. أي دور جديد بتلعبيه في حياتك بيكون غريب في الأول وبتحسي إنك تايهة بس مع الوقت بتتعودي والموضوع بيبقى أسهل. وعلشان كده احنا هنحاول نساعدك في دورك الجديد كماما ونقولك حاجة من الحاجات المهمة اللي ماحدش هايقولك عليها..
أي خروجة بتخرجيها بالبيبي بتاعك مهما كانت قصيرة أو قريبة أوي من البيت ومش هتتأخروا، لازم تعملي فيها حساب كل حاجة.. حرفياً كل حاجة! لازم يكون معاكي في شنطتك أي حاجة وكل حاجة ممكن يحتاجها، لأنك لازم تكوني جاهزة لأي احتمالات. قبل ما تتوتري تاني وتحسي إنك هاتمشي في الشارع بالدولاب كله حتى لو رايحة لحد السوبرماركت، تعالي احنا نقولك واحدة واحدة هتحتاجي ايه وتبقي مرتبة أفكارك ازاي من غير ارتباك وجري يخليكي تنسي حاجة..
دي الحاجات اللي هتحتاجيها دايماً معاكي كماما جديدة:
مبدئياً، الشنطة نفسها:
في غلطة كبيرة كتير من الأمهات بيقعوا فيها وهي إنهم يشيلوا أكتر من شنطة؛ واحدة ليهم وواحدة للبيبي وحاجته. ده غير إنهم ساعات بيبقوا شايلين البيبي نفسه فطبعاً بتحس إنها ملخومة وشايلة الدنيا كلها. وده طبعاً بيبقى له أكتر من سبب، أولاً إنها مابتلاقيش حاجة شيك ينفع تبقى شنطتها هي وفي نفس الوقت واسعة وكبيرة كفاية إنها تشيل حاجتها هي والبيبي. بس الحقيقة إن النوع ده من الشنط هو أول خطوة في طريق راحتك وانتي خارجة بالبيبي ولو دوّرتي كويس هتلاقي حاجة شكلها حلوة وكبيرة كفاية
البامبرز
ودي طبعا بديهيات، دي أول حاجة لازم تكون في شنطتك وانتي خارجة بالبيبي
الwipes
مش بس علشان تغيير البامبرز بس كل حاجة ليها علاقة بنضافة البيبي محتاجة وجود الwipes على طول معاكي
بودرة تلك أو كريم ضد الإلتهابات
وده طبعا مهم وقت تغيير البامبرز
مطهر الإيدين
مهم جداً طول الوقت تستخدميه علشان البكتيريا والأتربة ماتتنقلش منك لطفلك
التتينا أو زي ما بيقولوا عليها “السكاتة”
طبعاً دي من أهم الحاجات اللي مش لازم تنسيها عشان وقت ما يقرر يفتح السرينة تلاقي اللي يسكتها على طول بالذات بقى في العزايم والخروجات المهمة
لبس زيادة
اعملي حسابك في لبس أو اتنين زيادة للبيبي علشان ماتضمنيش لما تيجي تغيّريله هتلاقي إيه تاني محتاج يتغيّر، أو لو حصل ورجع على هدومه.
تيشرت زيادة ليكي
أصل لو حصل ورجع عليكي انتي أو “قشط” ساعتها انتي اللي هتحتاجي تغيّري ولازم تبقي جاهزة
الببرونة ولوازمها
لازم تحضريله الببرونة من قبل ما تتحركي من البيت عشان لو جاع بره واتفتح في العياط ولا ألف تتينا هتعرف تسكته
الكاب
الكاب مهمة صيف أو شتا، لأننا لو في الشتا الجو ممكن يمطر أو يبرد فجأة، ولو في الصيف ممكن بالنهار الدنيا تبقى شمس بزيادة مايتحملهاش
مية
العطش من الحاجات اللي لو طفلك حس بيها هاتخليه يعيط بحُرقة وبتبقى دايماً من أبعد الحاجات اللي بتيجي على بالك علشان كده لازم يبقى معاكي مية في الشنطة
بطانية زيادة
بالذات طبعا لو احنا في الشتا، بس عموماً برضه ممكن تخلي معاكي واحدة إحتياطي خفيفة حتى في الصيف علشان لو البطانية الأساسية بتاعة البيبي حصلها أي حاجة واحتاج غيرها
مناديل
دي بديهيات برضه زي البامبرز بالظبط، من أهم الحاجات اللي مش لازم تسيب شنطتك.. حتى لو مش أم
لعبته المفضلة
أكتر لعبة بيحبها وبتلهيه عن العياط أو الزن، لازم تكون في شنطتك وانتوا خارجين سوا على طول
ماتنسيش نفسك
وسط كل ده افتكري حاجتك اللي لو بعد كل ده نزلتي من غيرها يومك هايتقفل وهتصابي بإحباط الأم اللي حاسة إنها محتاسة ومش عارفة تسيطر على حاجة.. خلي تليفونك، نضارة الشمس، الhand cream ومحفظتك هُمَ أول حاجة في شنطتك.
والأهم من كل ده إنك تاخدي الأمور ببساطة، إيه يعني نسيتي حاجة وانتي بره، كلمي أقرب صيدلية تجيبهالك. وبعدين لازم يكون في غلطات لأن من غير ما تغلطي مش هاتتعلمي ومش هاتبقي أحسن في كل مرة عن اللي قبلها. وافتكري دايماً لو بتنسي كتير إنك تكتبي ليستة بكل اللي بتحتاجيه وانتي بره علشان ماتنسيش حاجة. واستمتعي بأمومتك قبل أي حاجة.